Claudio Villa, Stornelli.

Cantadore assai cunnisciutu in  Italia, Claudio Villa hà cantatu miraculi di successi in particulare canzone pupulare classiche cum'è  Torna  Sorriento, Chitarra  romana  o  O sole mio:









Stu ripertoriu talianu pupularizatu  da Claudio Villa ma dinù da  cantadori  cum'è  Carlo Buti  piacia  assai ancu  à  i Corsi. Tino  Rossi cantede parechji  successi  cusì, è  più  tardi Maì Pesce n'hà fattu  altru  è tantu.

Ma di Claudio Villa ciò chì mi piace u  più   sò i  so  stornelli romani,  è  ghjustappuntu   i  Stornelli  di  Claudio Villa l'aghju intesi  a prima  volta annant'à  una  cassetta chì  Maì  avia impristatu  à  un amicu. Fù  per mè  una doppia  scuparta, quella  di una  voce  è di una  maestria eccezziunale ma era dinù a  prima volta  ch'e  sintia  qualcosa  chì  s'assumigliessi tantu  à  u nostru  cantu tradiziunale.

À  l'eplica  avia  a niscintria  di  crede  chì e  nostre rivuccate chì facenu a spicificità di u versu nustrale ùn  esistianu   cà in Corsica. L'universalità di a musica è  attempu  a  vicinanza musicale trà cantu  corsu  tradiziunale è canti   pupulari  taliani ùn  m'eranu mai  apparsi di modu cusì chjaru.

I primi  stornelli  ch'aghju intesu, sò quelli di  Carlo Buti – ch'e  citava più  sopra – in  quellu filmone  di Martin Scorsese, Raging Bull,  una  stonda magnifica, tantu di  musica  cà  di sinemà:



Ma  ancu  sì Carlo Buti  hà una  classa  scema quand'ellu canta è ch'ellu sbucina  e so  rivuccate cun  garbu, Claudio Villa ci  porta a un livellu  ancu più altu.

Eccu dunque dui  giuvelli, Stornelli Romani à  dispetto, è  Stornelli amorosi.  I primi sò cantati  in voce piena, quill'altri in  sottu  voce. Rimarcarete u  cambiamentu di  rigistru vucale. Ùn  parenu mancu cantati da u listessu cantadore...  

Eccu, aghju parlatu  abbastanza, avà "enjoyate"   

uni pochi  di  strornelli  di Claudio  villa trovi annant'à  Youtube



"In cielo  ci è una  falce  inargentata..."



Omu  è donna,  dui  versi magnifichi!



stornelli macagna:



Quì  un  chjama è  rispondi  in  stornelli, o piuttostu un cuntrastu omu / donna

Sta canzona hè quella d'un rifughjitu  napulitanu  chi s'appronta à turnà in a so cità dopu i bumbardamenti di u 43.
S'aspetta à ritruvàla mezza che strutta, particularamente in u centru, induve si tene u famosu Munasteru di Santa Chjara, ruinatu da e bombe è u focu.

N'aghju fattu un adattazione in corsu :

Munasteru di Santa Chjara

Dumane ? Mà vularia parte sta sera !
Luntanu nò, un ci resistu più
Si dice ch’hè firmatu solu u mare
U stessu chi prima, u mare turchinu

Munasteru di Santa Chjara
Tengu u core scuru scuru
Ma perchè, perchè ogni sera
Pensu à Napoli cum’è era
Pensu à Napoli cum’è hè !

Funtanella è Capimonte
Questu core in me si sciappa
Quandu sentu dì la ghjente
Chi s’hè fattu malfattore
Stu paese, mà perchè ?

Nò, nun hè vera
Nò, nun ci credu
E morgu di sta brama di vultà in Napoli
Mà ch’aghju à fà ?
Aghju a paura di turnàci

Paura sì, si fussi tuttu veru
Si a ghjente avessi dettu a verità
Tutta a richezza di Napuli era u so core
Si dice ch’ella hà persu puru quellu

Munasteru di Santa Chjara
Chjose nentru a quattru muri
Quantu femine sincere
Si perdianu l’amore
Spusendusi à Ghjesù

Funtanella è Capimonte
Ci si tenenu l’amante
E mezzu à centu è più
Una sola femina nucente
Dice a ghjente n'un si ferma

Nò, nun hè vera
Nò, nun ci credu
E morgu di sta brama di vultà in Napoli
Mà ch’aghju à fà ?
Aghju a paura di turnàci

Munasteru di Santa Chjara
Tengu u core scuru scuru
Ma perchè, perchè ogni sera
Pensu à Napoli cum’è era
Pensu à Napoli cum’è hè !

A ringraziatti o Cà!