Storia bella particulare pè "Johnny got his gun". Rumanzu trattendu di a Prima Guerra mundiale, publicatu à u principiu di a Siconda (1939), hè diventatu infine durante l'anni settanta u portabandera ideale pè tutti i muvimenti pacifisti è antimilitaristi mentre chì un terzu cunflittu, quellu di u Vietnam, scuzzulava torna l'America.
Sunniendu issu prugettu dapoi parechje annate, ghjè u so autore, Dalton Trumbo, unu di i tristamente famosi "Dece di Hollywood" maladetti da u maccarthysimu chì realizò l'adattazione di u so libru, cù l'aiutu d'un certu Luis Buñuel.
"Johnny got his gun" conta a storia d'un omu sfiguratu, senza bracci nè gambe, ridutu à u statu di tronculu dopu à un obus ricevutu pè isse trincee. Inchjudatu nant'à un lettu d'ospidale, incapace di parlà, diventatu ancu un legumu pè i so duttori unicamente primurosi di fà prugressà a scienza, Johnny ùn n’hà in fin'di contu di spressione ch'è a so voce interna empiendu u spettatore durante a maioparte di u filmu.
Cù quella voce interna, Trumbo svela e so immense facultà di cuntore, detagliendu cù una precisione d'orefice a lenta presa di cuscenza ch'eseguisce u so persunnagiu in raportu à a so infirmità. Una infirmità d’altronde mai esplicitata direttamente ; u cineastu à u cuntrariu, s’attacca à ùn mustrà ch'è e parte salvate, piattendu accuratamente à u sguardu e zone atrufizzate. In què, "Johnny got his gun" hè propiu un elogiu di u pudore, è sta spezia di pudore cinematugrafficu, tuccante è ammirabile, ùn face in fine ch'è rinfurzà a prufundezza psicologica di a so lente introspezzione, appurata è difficilmente sustenevule.
In un stridu d'addisperu, u cineastu parvene cù ritenuta à tesse un doppiu sguardu, ghjucatu agilmente nant'à i culori ; negru è biancu per e scene d'ospidale, culori per e scene d'antiguerra, quesse finiscendu ancu per tuccà rapidamente una visione ireale, fantasmata, ciuttendu u poveru Johnny in la cunfusione a più tutale. Imagine qualchì volte dissennate d’un passatu ingarbugliatu è sinuosu, altieramente incarnatu da Donald Sutherland in a pelle d’un Cristu accumpagnendu cù cinismu u macellu.
Surtitu face avà quaranta-trè anni, pudemu fà senza prublema a scumessa chì "Johnny got his gun" sippia esatament u listessu da quì à un mezu seculu ; a so putenza emuziunale ùn hà difatti di paru ch'è a so intempuralità, a so capacità scema à fà soie tutte l'eppiche, tutti i cunflitti.
Accueil 
