puisia di Lampedusa

Saluta, vengu di rendami contu chì quissu spaziu era distinatu à a puisìa, dunqua mi parmettu di lampavi un picculu scrittu ch'aghju cumpostu tempu à issi straghji.
Postu chì socu sempri un principianti, m'intarissarìa monda d'avè u vosciu parè, é sè ci volini dinò, i vosci rimarchi, da pudè avanzà.
bona littura !


LAMPEDUSA

Ti lacasti la to tarra quidda mani à l’albori
Cù dui centu cumpagni à un schifu azzingati,
Pronti à sfidà u mari é i venti scatinati
In circa di un dumani luntanu da u tarrori.

Sè tù l’imigranti incù a menti illusa
Di custruì un avvena à l’orlu di Lampedusa

Fiddolu di a miseria t’ani prumissu a paci
È vindutu quissu sonniu di una nova libartà,
Fughjendu à vita persa versu l’Auropa culà
Da sminticà u dulori d’un populu chì si taci.

Sè tù l’imigranti ch’ugni fruntiera ricusa
Vistichendu una gioia à l’orlu di Lampedusa

Middi funu i prigheri l’ochja fissi trà i steddi
Da scunghjurà u distinu di a to povara ghjenti,
Animi à malavìa in brama d’un cuntinenti
Ch’accittarà a prisenza di li so tinti ziteddi.

Sè tù l’imigranti ch’ugni paesi accusa
Abbandunatu da tutti à l’orlu di Lampedusa

Ma culà ùn l’ai trova quidda ghjusta tullarenza
Ch’ùn c’era chì a vargugna à fighjulà da u molu,
Affundà i to spiranzi trà i pienti é u dolu
D’una stirpa casticata da l’umana indiffarenza.

Sè tù l’imigranti é nimu dumandò scusa
D’aveti lacatu mora à l’orlu di Lampedusa ...

@GC

hè una bona cosa di scrive annant'à Lampedusa moltu più chì l'affare ùn s'hè micca passatu tantu luntanu...

n'aviamu parlatu appena ancu quì: https://isula.forumactif.com/t645-lampedusa


Ùn ci hè tante rimarche à fà, hè una puesia fata cum'è una canzona, incù stu disticu chì ripiglia à ogni colpu rima cù Lampedusa. À mè mi pare riisciuta.


a sola piccula rimarca saria annant'à " attesa " ùn la sò s'ella si dice attesa à u participiu passatu, quì hè a imprissione data, infine eiu l'aghju capitu cusì , tullarenza aspittata è micca attesa = tullarenza ma forse mi sbagliu .

vi ringraziu in prima pà quissa pagina nantu à Lampedusa, ch'ùn avìa vistu, ie semu ghjustu accantu, é pudiamu essa nò dinò !
Oghji ghjornu semu tutti omi, ma quantu sò umani ? sarìa un longu dibbatitu ...


é dopu dinò pà u cunsigliu di scrittura, ùn avìa fattu casu, ed hè vera chì dopu à una rilittura, " attesa " ùn ci và !    (Principiu dinò ad amparà i facci     )

di tantu in tantu s'ùn vi diranghja, vi lamparaghju d'altri scartafacci.

Vulinteri!

Ghjasepppu Cardelli :Lampedusa :
 
A prima volta ch’aghju vistu u to nome è a foto dà Piccuvaghja
mi sò dettu : ‘se tu hai a scrittura cum’è a vista ? »
Avà ch’aghju lettu, possu dì ch’elle si valenu …di fà l’avvinta !
Mi piacenu tasti è scrittura novi è puru s’o strazziu cù i I i A è I DD
seguitu l’ambiente è l’andatura .
Andà à appichjàssi à un tastu simile ci vole à sentesila !
ci si pare esse à bordu di sta barcaccia, à colpi di remi contra un mare sanu
A storia si ripete chi ci'era statu 'a zàttera di a Medusa'
stalvata per u sempre da un gran pittore.
Teneti puru l’insetu,che se tu n’hai altre di listessu mostu :
« Qualcosa leghjeremu ! »

Vi ringraziu o Lùlù ! Ie a vista hè bedda, ma sin'à quandu ? L'ingurdizia ruzzica di più in più i nosci invistiti, ci voli à tena !
Una bona ghjurnata
GC

in u filu di a discursata, oghji l'ingurdizia immubiliaria si voli impadruniscia di tuttu, induva c'era un pastori, oghji t'avemu un centru cummirciali, com'è a dici cussì bè, u nosciu (spergu) " ex " merri di Portivechju " on va pas leur laisser que du maquis a nos enfants " si capisci, chì sè nò ci lachemu fà, saremu fritti da quì à pocu.
dunqua femu di manera à salvà u pocu chì ci ferma, é femu ch'idda voghi à caternu a spiculazioni !

ERA MEA


Era a me tarra
Quissi vaddi é issi piani,
Indù l’animali vani
À pascia in libartà.
Era a me tarra
È cussì sempri hè stata,
Nimu mai l’hà cuntistata
Ma tuttu hè cambiatu avà.

Oghji indè mè sò stranieru
Spuddatu senza parmessu,
Da vò chì par intaressu
Brameti quì un imperu,
Ma cumbattaraghju fieru.
Pà ciò chì mi fù cuncessu.

Era a me tarra
Pascura senza uguali,
Ma culpita da u mali
Di chì si voli apruprià.
Era a me tarra
Ci aghju ugni ricordu
Ma pà u soldu ingordu,
Di quì mi volini stirpà.

Oghji mi vuleti fora
Cum’è tanti ammansatu,
Pronti à scurdà u passatu
Da fà a voscia dimora,
Ma ùn lacaraghju mora
I loca indù sò natu !

@GC

Bravu!

O Ghjasè, mi possu sbaglià ma torna una volta a imprissione data da a struttura di a to puesia hè più quellla di una canzona.


Sè qualchì musicante o sè solu puetu?

  

Ti ringraziu Circiò ( ti dicu di tù   ) mi piaci a musica quantu a scrittura, di tantu in tantu pugnu à frustà i sei cordi di a me chitarra, ma ùn socu tantu capaci    
provu u più ch'è possu à truvà un sensu in a me impinnatura, certi volti veni d'altri nò ... hè u misteru di a puisìa