A morte di u pastore
Per istrada, a soia, era u pastore. Arresu, frustu, s’era arrimbatu à una petra pusatoghja chì u cunniscia à a so ansciata. Di zerga inguantò u so barbazzale ch’ell’ùn avia più spuntatu dapoi parechji ghjorni è u stinzò forte per dassi di rimenu. Ma sta volta capì chì e so forze si n’andavanu. Si inghjuttì una tasa d’acquavita è piense, assai, appughjatu à u so bastone. Cume pienghje un zitellucciu intravanatu appughjendu u so capu à u senu di a so mamma. Chjamò a soia mamma chì vense subitu, aprenduli e so bracce è u so core. « Sò quì, cun tè, a sai, nèh ! ». U core di una mamma hè infinitu amore. Pisendu l’ochji voltu u celu, visse e rondine in altu vulà. Veranu si spannava. Si arriquiò una cria è si vultò versu a so banda per dassi capu s’ella era accumpulata. Micca troppu. « Li ci vole un antru pastore chì li dia a bella investita nova ! », cusì pensò. Funu stonde benedette quelle passate, dopu, à l’assolu, incù u maestru Supranu ch’ellu servì, cun fede, durante a so vita sana d’omu, dunque di pasta frolla. Li ricumandò l’anima soia è li cherse, sinceru, u so perdonu. Poi ripigliò a so ardente prighera, appinzendu l’ochji nantu à a so banda chì trapughjava : « Un antru pastore, un antru pastore, un... antru… »
FRINGHELLU
Accueil 
