"Feu pour feu" di Carole Zalberg

Cum’è un longu vuciaratu…

.
Inde a tradizione corsa, u vuciaratu tocca à e donne ferite da a morte tragica d’unu di i soi. À primu intoppu, a sumiglia ùn hè cusì linda cù issi lamenti funerali aspessu impruvisati à tempu à l’orlu di a fossa. Eppuru, u cantu di u so dulore m’hà ribumbatu in core longu a mio littura di « Feu pour feu ». A storia, ancu per esse quella di u drama d’un omu chì offre u so spinu à a so figliola cum’è una donna li offre u so corpu, hè a voce di Carole Zalberg chì a ci dice.

Cù issu nuvellu rumanzu, ci porghje l’imbuleghju d’una appocalisse persunale intricciata à un’antra, cullettiva, chì mena senza sceglie. Strughjendu a carne di quelli chì s’ascondanu in a morte quant’è l’anime di quelli firmati arritti stessi à funambuli. U babbu d’Adama hè di quessi. Cerca l’allivellu, prova à viaghjà drittu nant’à u canapu finu di u so sonniu. A vole salvà di a so propria tarra è buscane un’antra ch’ellu annacquarà di lacrime è sudore da ch’ella si scordi sin’à ciò ch’ella ùn hà mai sappiutu. U surrisu di a so mamma, i turmenti d’un cuntinente sanu invasu d’inghjustizia è rosu d’inumanità, l’esiliu è a sradichera.

Custì batte u core di u libru. Aldilà d’un bellu è tragicu racontu tissutu di parolle pricise pisendu di tuttu u so sensu, sò duie, à compie un paragraffu à a pagine 62 : « Te replanter ». A simplice smisura d’una spiranza senza avvene chì trascina in sè u germu di u so fiascu. L’alburu, puru criaturu, hà bisognu d’accolta assuluta è sincera. S’è u sole hè sbiaditu o l’acqua appena torbida, forse fiuriscerà ma nisun fruttu mai ùn pisarà à e so frasche. Pò esse chì e so radiche truvaranu ricchezza è prufundura ma nulla ùn rimpiazzarà a tarra chì u vide nasce. Assuffucatu da una nustalgia ch’ùn saparà capisce di ciò ch’ùn hè per ellu mancu un ricordu, criscerà, tinendu in u so suchju ogni amarezza di u so mondu tralasciatu. S’addattarà, turcendusi da ingrandà malgradu tuttu.

Eccu ciò ch’aghju intesu in a voce italica d’Adama l’alburucciu. E parolle di issi zitelli urfagni d’identità chì si n’inventanu una, sfurmata, imparfetta, periculaso per elli è per l’altri. Scrivanu e so regule, e facenu rampali di a furtezza chì i prutece di tuttu ciò ch’ùn hè elli, quì hè a so salvezza è attenti à chì a minaccia.    

« Feu pour feu » dà à a tragica rialità di ciò ch’omu chjama un « fait divers » una dimensione chì solu a literatura pò arricà. Duve l’anonima folla viderà solu a cunsiquenza d’una gattiva educazione o un difettu d’integrazione, Carole Zalberg sbulica u prufondu di e cause. Mai ùn ghjudicheghja nè ghjustificheghja, si face a voce chì impresta a so puesia à dui essari cinti d’addisperu, spiccati di silenziu. Dui monolochi chì s’intisgianu è sò sfarenti tantu da u vucabulariu cà a crunulugia, unu dicendu u passatu è l’altru u prisente fin’à a so addunita in un stessu abissu.