Gattaceca Patrizia

SENTI A FILETTA

Sposalu stu silenziu
Scialba issi muri vioti à fiure isulane
Imbotrati di celi è d’onde è di fureste
Chì u ventu pettina,
di muschi machjaghjoli à u spuntà di l’albe
quand’ellu si sbucina u tempu una stagione
di muschi machjaghjoli à u spuntà di l’albe
quand’ella si cincina a folla a to canzona
è senti a filetta...
Dimmi un pezzu di stonda
Quandi a notte desta u ventu à tiru d’ale
Fà batte un tempurale in li mio sensi accesi
È nasce mille fole in volu versu tè
Inventami un ricordu, tessilu sinu à noi
Cum’è un granellu coltu à l’oru di a luna
Inventami un ricordu tessilu sinu à noi
Cum’è un granellu coltu à l’ora di u sole
È senti a filetta...

Soli viaghji…

Soli viaghji mei, sò centu in le to vene,
È mi frisgia un suspiru, u ventu d’oramai...
À e sarre di lume, muscu di la to pelle,
Da quindi à u fiatu, u ventu, a carezza ;
Amaestrami l'ore stracquate pè u sognu ;
Battimi in grembiu un celu è dimmi u silenziu...
Di a vita u trenu fila à cecu bughjone
Per a via ferata ferita d’amarezza
Sò li viaghji...
Di frebba è di dulore i ghjorni mi cunsoÌi,
Scrittu è da la to manu u fogliu culuritu
Incensu in lu mio core, u mare tennerezza ;
È basgianu l’albori l’attrechjate surelle...
Muscu suale è sangue d’aostu cancellatu !
Soli viaghji...

U Marinare Innamuratu

O onda sposa meia
Dammi la mossa
Vogami u core in poppa
À mare grossu
Battimi lu marosu
À briglia sciolta
Cavallu mattu amori
Di ventu sciocchi
Di ventu sciocchi
È l'onda l'hà pigliatu
È l'onda l'hà pigliatu
O marinare meiu
Addisperatu
A to vascella hè stanca
È straziata
Hè livera la vela
Tortu lu maghju
Ùn temi lu mio cantu
Nè lu viaghju
È l'onda l'hà pigliatu
È l'onda l'hà pigliatu

U mo sognu isulanu…

U mo sognu isulanu hè di memoria sciolta
À l'arice di l'esse vanu silenzii arcani
A ferita profonda in la parolla tolta
Ciò chi a manu conta è facenu le mani

Hè solu un filu appesu à i canti landani
Una stonda preziosa à l'ispensata colta
Issa machja à fior di pelle ritornu à li verani
U mo sognu isulanu hè di memoria sciolta

A vascella s'hè persa è naviga rivolta
À u marosu mattu è i mari furdani
Verde spechju turchinu chì voca è girivolta
À l'arice di l'esse vanu silenzii arcani

L'amore si cunfonde in li penseri umani
Sbunurata laziosa in la filetta folta
I suspiri briachi di tanti mindumani
A ferita profonda in la parolla tolta

Destinu spalluzzatu è ghjunta senza accolta
Mandile sventulatu di l'addii dardani
U libru ch'è n'aprimu à la pagina volta
Ciò chi a manu conta è facenu le mani

Canzona zitellina da i solchi suprani
Voce linda di lume ardente chì scunvolta
È porta li so nomi à l'abissi lunati
Cù lu to requiem o mà issu lagnu volta
U mo sognu isulanu…

Bavella

Sbuffulata di lume
in l'alba nebbiacosa
Aspra ed eterna petra
Spunta granitu raspiu!
Una burasca lagna
da pini manganata
Hè barbaru issu cantu !

À quellu chì si ne và…

À quellu chì si ne và
chì si pò di?
À quellu chì ci laca
un orizonte foscu
un paisagiu mutu
una lettera nuda da leghje à l'oramai
À quellu chì ci laca
una muntagna alta à sculinà
À quessu quì chì si pò dì
s'elli ùn sò detti d'eternità?

S’alluntana a barca…

S'alluntana a barca
Pienghje u muchju à l'orizonte
u ventu sturdulitu
da spapersi prufumi
ùn pò sente oramai
a voce di l'onda
à e mo labbre.

A casa ch’è no fuimu…

A casa ch'è no fuimu
era un guaglinu
Ci ghjunghjianu à beie l'acelli
mezu à i nostri chjuchjulimi
lentati da e culumbare.

Matticciu

Scialbò destini frolli
in le to vene
u tempi muratore
o sempiterna petra
o matticciu!

Ritornu

Firmava insunnulita a petra
Eccu chì s'arrimba à l'usciu
quelli chì volta
Hè ghjornu di parolla à sparte

U to passu

À teneci svegli ogni sera
era u sperà di u to passu
A manu pesa a stanga
è ci porghje u to visu
nantu à ogni muru
a fiara
Chjamanu e nostre bracce
e to parolle d'acqua è di sole
Fole per una festa rimurosa
in issu castellu ch'è tù ci inventasti
al di là di u tempu.

Ùn c’era bisognu à dì…

Ùn c'era bisognu à dì
parlavanu i caghji
di e to mani pregne
di l'anticu sapè
Anu fattu maturà
i frutti chì stancionu
a nostra sete
In punta à u tavulinu
Si tù à scumparte
pane ed amore.

Eiu ùn sapia dorme…

Eiu ùn sapia dorme
senza tè nè vighjà
senza avetti à u mo latu
M'ai ascultatu sunnià
ciotta in u to scuzzale
biancu è prufondu
quant'è u to grembiu.
Azzeca l'aria
u gestu bellu di e to bracce
è mi porghje a to voce.

Lariciu

Hè scrittu tuttu quì
in u lariciu longu
chì a so vetta intinghje
u verde ind'è l'azurru.

Lugliu

Lugliu
di i ghjochi
d'ombra è di talavellu
d'acque prufonde è verdi
Ci emu dimenticatu
u farru di e parolle.

Nuvembre

Fora nisunu
Nuvembre
U so mantellu mucidu
di celu
di nuli
di tempu
Ticchitacchi tacchiticchi tacchi…
A contravita và u tempu
da ch'è t'ùn ci si più.

Ghjennaghju

Ghjennaghju incisu
da e parolle marmaru
ch'è tù mi diste
eterne
in u biancu suspiru
di l'addiu.

Cù u ventu

Si stinza tuttu
l'arburone spendiconi
è dà sensu à u tempu
chì cù u ventu
l'hà scultatu

A zitellina

Era longa a zitellina
ogni ripa alta à saltà
colma à ghjorni savuriti
Ti sì firmatu quallà
avvoltu in issu tempu
indefinitu.

Nunda hè cambiatu quì

Nunda hè cambiatu quì
duv'è a to manu ghjimba
hà spetratu a terra
è u to rispiru hà lacatu
u muscu di u t'abbracciu.

Una stonda simplice

Piglia fiatu a volta
cù a voce innalzata
in u chjaruscuru
di issa notte barocca
Trizineghja a luce
nantu à l'Altare vechju
sottu à u fremu di u cantu.
Sò prufondi i sguardi
attenti à u sensu misteriosu
di issa stonda simplice è frolla
tutta di pace.