Di Meglio Alanu

A serva

Eiu paisanu fieru
Ghjurnatantu è disgraziatu
Vogliu cantà l'addisperu
Di lu mio amore scunciatu
Anghjula pura è fantina
Di u veranu più bellu fiore
Si n'andò quella matina
À fà serva à li signori.

Anghjula Anghjula mea
A ruvina mi purtasti
Stu ghjornu duv'è n'andasti
In li sgiò
È ne francasti lu purtò

L'estate l'aria infiarava
Eri stanca à la funtana
A to ciretta pisava
Sott'à quella sciappittana
Eiu rozu travagliadore
Ùn truvai mai la stonda
Ellu giovanu signore
Bellu ti girava in tondu

Anghjula Anghjula mea
Fù cusì nun ricusasti
A to giuventù li dasti
À stu sgiò
Chì in la so casa t'ingannò

Trà a cardellina è u corbu
Matrimonii ùn ne pò nasce
Puru un criaturu in corpu
U sgiò ingratu ti tralascia
Stu ghjornu era festa in piazza
Misurasti a to sciagura
Spusava una di razza
Ricca di ceppu sicuru

Anghjula Anghjula mea
Issa pistola ch'è tù purtasti
A ti cacciai, ùn la mi dasti
È u sgiò
Fù la mio manu chì u tumbò

Simmai

Simmai vesta ci vistarani di disprezzu
Fin'à truvà novi cavezzi
ùn mancarani l'argumenti
Par ùn lascià à sicutera
Mughjà issu pizzucciu di terra
Si sbrimbarà torna un avvena
è sippur mai
Da risparà ci qualchì muca
C'impararani, c'impararani à essa chjuchi

Isuli


Sintili
in u sussuru di a sciuma...
tutti i partenzi
scritti da i timoni

Testi mori

Ghjuntu ch'e sò,
stò accantu,
vicinu
ma accantu.
Issa tralucenza
chì si spicca,
a possu paspà.
I me mani incaddosi
ùn lasciani stampi.

Fermu accantu,
vicinu
ma accantu,
sempri.
In a ghjustra
di l'omini di quì
mai ci entru.

A carezza di l'acqua

A carezza di l'acqua
arrimbata à i monti
scrivi a to custera
d'un’impussibili parafrasa

Attrachju di silenziu

Attrachju di silenziu
Bunaccia morta
Russu sirenu
Torrulu di paci
chì si poni in pichjuli
nant'à l'oliu marinu
senza frighja
Manca una vela sulca
l'aria piumbina

Si sticchisci u ricordu
in a durghjulera di u tempu

Lettara muta


U me sguardu s’appudda, ùn trovu ch’è bughjura
Hè nera la scrittura
Ùn ci hè versu
Ùn so leghja ad avà è morgu d’ùn sapè
D’ùn sapè O Savè !
Hè quant’una prighjò d’ùn essa stata à a scola
Chì li manca a parola
À stu fogliu
A me penna ùn sà scriva a lettara par tè
Iè par tè, O Savè !

O dì comu fà    
Ùn possu dì nè palisà
Indu’ sarà Issa culomba, cù lu me cantu da purtà
Se’ partitu O Tisò d’ùn sapè lu m’amori
Avà mi trica l’ora
A primura
Chì ti voddu stracquà i mei li parè
Hè quant’hè O Savè

Da fà andà culà in l’Algeria strana
A nutizia luntana
A me pena
Quì tuttu mi s’hè spintu è morgu senza tè Senza tè O Savè

Morgu di tè
Ùn la ti possu fà sapè
O Savè
Hè cusì ingratu d’un pudè  
Carizzà quiddu fogliu è lampà li me sensi
Com’è fiori di carta da pudetti incantà
Signuzzà li me pienti intruscendu filari
Da caccianni altr’è tantu è po’ fatti vultà.

Di u filu tesu di l’orizonti
a musica
Di issa puntetta di sciuma chì sfrisgia a custera
u filà
D’un silenziu à impastà
u levitu
Di i fiati aduniti
u ventu
Di issu bughju
l’inchjostru

 

I parabbuli bianchi
infunghendu i tetti
stani muti
nantu à i muri grisgi
Fighjolani i steddi
prighenduci lagnosi
è suttimissi
un’ acquata cattodica

Ori oranesi




Wahran si mira
in mari d’Alboran
Induvina a Spagna
à l’oru uccidintali
Ci buddi l’Auropa
è l’ora uccidintali

Wahran si senti
à voci di muezzinu
Ribomba a rivuccata
nantu à i muri fiacchi
di l’aria zippa malba

Si stinza Oran Wahran
è si faci tissutu
è po’ s’arici d’Africa
s’ammanta d’Orienti
è vesti centu panni

Eccula stesa avà
à l’orlu culuniali
com’è una sciuma di marosu

Da Santa Cruz in sù
ci si mori un forti
è piegni una madonna

 

Tè è biscotti in l’Udaià
T’inguddi a menta di l’ued
inzuccarata di locu
U sirenu mischja mondi for di mondu
Rabat s’alliscia com’è una sarpa

Scavata è rialzata
Malta si pesa
chjuca è bianca
ornata di l’assenza di l’Africa

Donna
U velu di a to pena integrali
mascarighja stu mondu ingratu
carcu di rena inde l’ochji…
U Simun soffia in ogni disertu

 

Aminà
lu to mandili
mi veni senza dilla
di fanni una vela

Solu l’isula
À Siham


Quì solu a to mancanza
mi pò essa più zitta
franchendu l’arruganza
di sti mondi infiniti

Com’è s’iddu bastessi
un sintimu di ribba
arrimbatu à i sensi
da fà fiascà l’immensu

U cunsolu hè di ventu
è m’arreca u to fiatu
Mi cresci una spulera
chì m’annoda à un viaghju

Quì solu possu torna
arrimbammi à un ansciu
arresa à u to muscu
chì issa luci addiletta

A to tomba di spini
quì solu mi s’hè lettu
d’una seta di celu
chì mi sfrisgia è mi pesa

À li canti di quì
ricunnoscu a to chjama
chì s’adorna di voci
è s’ammanta di monti

Quì u mondu s’unisci
è l’altrò s’avvicina
Quì solu possu creda
à l’unica cunfina

U ventu asciuva i lacrimi
Fà girà l’euliani
chì dani energia à u lavapanni
è asciuva i panni puliti
Metti viaghji in i veli
Asciuva maghju è ci lascia l’istati
cù i so fiari azezi
U ventu
amutulisci a vaddi
Ùn aghju più lacrimi
nè viaghji
I me panni sò tanti brutti
chì mi puzza a vita
U me nomu
u s’hà paratu u silenziu
Ma chì venti sò ?

Sognu clandestinu

L’estru ci voga tondu à un calà di soli
è l’eterna biddezza ùn pianta d’essa quì
Ùn fiacca u pueta d’invintà i to foli
À guardatti in i lochi mi possu ancu dì
chì sare’ sempri quì

È puri in a bucìa adasgiu custruita
t’ani lasciatu ghjacia circhendu i to virtù
T’ani azzingatu un’ ancura tù isula bandita
di modu chì par dì è cantà ciò chì fù
ùn la sapissi più
Tù, lu me innu
Lu me sognu clandestinu

Trà l’anima d’un tempu è u muscu di l’anni
feci chjassu à l’avvena cambiendu a lizziò
À tempu à l’idea nascìa ancu l’ingannu
in lu moghju trimendu d’un partu à l’arritrò
è seppi dì di nò

Dì nò da chì parà u libru d’una storia
ch’in i schizzi di sangu circa penna à ciuttà
chì canta i so versi à sonu di murtoriu
chì chjama chì rispondi è chì torna à chjamà
Solu tù à parà
Tù, lu me innu
Lu me sognu clandestinu

Iè pocu premi avà di lampà lu prucessu
di circà accaniti a culpa di qual’hè
Nemmenu voddu fà di dumani una messa
Ma ferma in lu me cori issu tamantu vulè
Issu destinu cun tè
Tù, lu me innu
Lu me sognu clandestinu

 

L’alba hà sbuchjatu a notti
è parturisci u ghjornu.
Sò tendi teatrini chi s’aprini di novu.
Mi t’affacca stu mondu
fattu di luci mea,
è ci sò guasgi tutti
o u pocu chì basta.
Ma sti buchji di notti…

A passi minuti
a donna
pulisci u sulaghju di a cappedda,
accendi una candela,
manghjichighja dui fiori…
E dendu di mani à u marmaru amatu
acconcia appena
u linzolu di silenziu.

O sterpa di li me avi
A voscia prucessiò
mi s’alluntana
è po’ si ficca in a nebbia
di a me curcia mimoria…
Un gabbianu zotticu
pidda
è s’appodda
nantu à a cruci.

Piovi.
Sò neri i fusti di l’alivi
trosci di malincunia
è tuttu s’annigrisci
puri i so frutti.
À l’ultimu
a so fragnata
ci rindarà l’oru.

Vaghjimi in portu.
Nantu à i tarrazzi
di i caffè
a tramuntana bianca
fischja in l’armaturi
disincarnati da li so tendi statineschi.
Scheletru schirzosu
di l’ori più belli

Prima guazza,
pientu di l’alba
di a statina offesa.

Primi frizzuri di l’aria...
Dulcezza tricaticcia di l’acqui marini...
À gallu
l’umbra stinzata
si stinza torna
fin’à stinzassi sana.
À l’arici
a puntetta di sciuma
finisci u linzolu di friscura.

Com’è un fogliu
piegatu à sparaventu,
a to maghjina
si stà daretu à i me palpetuli...
Da chì chjudu l’ochji
ùn possu più dorma.