Site in vittura, andate à favvi un giru in bissicletta, in più bella v’arvidite ch’è vo v’avete lasciatu a vesta in casa, vultate annant’à i vostri passi è davanti à a casa v’aspettanu dui omi armati. Ùn piantate micca, scappate, ma ghjustu sopra vi truvate di punta à una vittura. Escenu dui omi incagulati è armati di fucili d’assaltu chì vi coglienu mira, vi calate, sciaccate a marchja in daretu è vi cacciate à fughje. L’omi armati aprenu u focu ma, ancu di grazia, riiscite listessu à scappà. Subitu dopu ricivite un colpu di filu di a vostra moglia « Volta ! hè a pulizza ! ». Eccu ciò chì hè accadutu à Jean-Louis Emmanuelli stu 6 di farraghju in Munticellu. Quellu si hè resu subitu dicendu ch’ellu ùn avia micca vistu ch’elli eranu gendarmi. Cume avaria pussutu fà postu ch’elli eranu in civile è ch’ellu ùn ci n’era mancunu chì purtava minima fascia. A prova si n’hè chì u cummandante di l’uperazione l’hà palisata mentre u « prucessu » cuntendu ciò ch’ellu hà dettu à i gendarmi nanzu ch’ellu si rindissi Jean-Louis:
« Sa femme l'a eu au téléphone, il revient se rendre. Il a eu très peur. Attention pour l'interpeller, mettez au moins deux brassards visibles... »Jean-Louis hè statu « ghjudicatu » in cumparuzione immediata è a cundanna, o piuttostu a sintenza hè stata for di misura : CINQUE ANNI DI PRIGIÒ ! Cinque anni – trè anni fermi è dui attimpati – per avè fattu ciò chì tutt’ognunu avaria fattu in simule cirtustanze.
Arrisera, à u sinemà Fogata, eramu numarosi à esse à fiancu à a so famiglia è à sustene à Jean-Louis, un omu travagliadore, unestu è dirittu, un capu d’intrapresa stimatu da tutti, un omu incunnisciutu da i servizii di pulizza incù un librettu pinale pulitu.
Un omu vittima duie volte :
Vittima di u zelu di sti gendarmi cowboys chì fecenu focu senza mancu circà à capisce, à u risicu di tumbà un omu nucente, un babbu di famiglia scozzulu è in tinuta di bissicletta. Basta à leghje e dipusizione di i giandarmi per essene cunvinti. Jean-Louis a s’hà corsa brutta : anu ritrovu una quarantina di stucci in pianu. Annant’à a camiunetta ondeci impatti di balle, parechji inde e purtiere. Un'arrestazione? Una bella impiastrata pulizzera sì ! è un miraculu ch’ellu ùn sia mortu!
Vittima dinù di una parudia di ghjustizia, una sintenza chì pare più dittata da u bisognu di copre quella impiastrata cà da a necessità di fà spuntà a virità.
Ùn si pò accittà l’iniquità di sta cundanna.
Ùn sì pò accittà ch’ellu ghjustificheghji u « statu d’urgenza » ch’elli possinu agisce cusì pulizzeri è giandarmi è tirà à vista annant’à a ghjente chì ùn hà nulla à rimpruvarassi.
Ùn si pò accittà ch’ellu sia imprigiunatu un omu chì ùn hà fattu male à nimu è chì u so solu tortu hè d’avè avutu a paura di fassi tumbà.
Aspittendu a rivisione di u so ghjudicamentu in appellu è spirendu stavolta in una ghjustizia indipindente è imparziale, ùn sì pò cà bramà ch’ellu sia subitu rimessu in libertà Jean-Louis.
LIBERTÀ PER JEAN-LOUIS EMMANUELLI
Accueil 
