Pè u sicondu giru di l'elezzione prisidinziale, avaremu a pussibilità di piglià parte o innò à stu votu chì, ch'è no a voglimu o innò, ci cuncerna. U fattu d'esse naziunalistu, o puru
indipindintistu ùn cambia nulla, chì da l'avà
indipindenti ùn simu ancu. È ancu puru s'e fussimu indipindenti, st'elezzione ci cuncirnarianu quantunque cum'elle ci cuncernanu oghje l'elezzione di l'altri paesi di u mondu. Pudiamu crede chì u naziunalisimu corsu fussi surtitu di l'etnucintrisimu dipoi un pezzu, ma pare ch'ellu ci sia una rigrissione in parechji duminii.
Allora di sicuru l'astenzione ùn hè micca un delittu – è à u fondu ùn hè ùn delittu mancu u votu "Bleu Marine"– è ùn ci vole micca à cundannà a scelta di i nostri cumpatriotti. Basta chì i Corsi chì scigliaranu di ùn vutà micca dumenica sianu cuscenti chì, cum'ellu l'hà detta chjaramente Gilles Simeoni, aiutaranu a vittoria di Le Pen in Corsica.
Ma ci hè quantunque una vera cuntradizione in li cummenti di certi chì chjamanu à ùn vutà micca " per mandà un missagiu chjaru à u Statu". S'elle ùn ci cuncernanu micca st'elezzione chì n'emu da fà di ciò ch'elli ponu pinsà da mare in là? Scigliariamu di piglià u risicu di lascià passà à Marina solu per una quistione di simbulu? Soprattuttu quand'ellu si sà chì ancu s'ella diventa dumenica l'astensione a scelta numaru unu di i Corsi, s'ella hè "siconda " Marine, u missagiu mandatu sarà nanzu tuttu quellu di una Corsica Bleu Marine.
Ma ùn simu più à un paradossu vicinu: For di Femu a Corsica, l'altri muvimenti naziunalisti – Corsica Libera, A Manca, U Rinnovu – chjamanu à ùn vutà micca. Ognunu incù ragione è mutivazione sfarente, ben'intesa. Avemu ancu noi i nostri
ni-ni di manca, o simpliciamente i stumacati, è ùn si pò cà capisce a so scelta. Si face chì à u tirà di e rete, u risultatu hè u listessu: Issi muvimenti naziunalisti chì tuttu oppone à gruppi cum'è Leia Naziunale si righjugnenu annantu à stu puntu postu chì u votu " Pasquale Paoli" è l'astenzione anu più o menu listessu valore.
Benchì l'intinzione ùn sianu mancu appena listesse, un "dinuminatore cumunu" ci hè: " St'elezzione ùn ci cuncerna micca". Annant'à stu puntu pricisu, ancu e streme si righjugnenu.
Ci resta à spirà ch'elli vutaranu megliu in cuntinente cà quì.
Accueil 
