Aiò ch'hè ora !!

Scusatemi capu nenzu
S'è tamanta pace rompu
Fà chì u vostru silenziu
Qualchissia u v'hà compru
Almenu chì di ghjennaghju
Qualchì pesta v'appia compiu

Circione privu di musa
Oghje ùn hà più nund'à divvi
Sidussincu hà a scusa
Di scrivi quaranta libri
Eppuru pè impruvisà
Basta chì unu principii

Vecu avà u to dispacciu
Chì u core mi ralegra
Subitu risposta facciu
È n'aghju sguasi a frebba
Sò cum'è u cacciadore
Chì hà sculinatu una levra.

Vecu ch'è tù vai à caccia
Tù sì ch'ai tempu à gode !!
Ma lascia corre a lefraccia
Chì frà pocu hà da chjode
Chjappemuci à Sidussincu
Chì hà di più polpa à rode

Ma quessa mancu per ride
Caru amicu petralbincu
Ùn cappiu u mio fucile
Per chjappà à Sidussincu
Resta poca polpa à rode
Chì avà hè tuttu schincu.

À chì hà pane è cultella
Taglia la fetta à so modu
S'ell'hà l'osse sottu pella
Fittu è magru cum'un chjodu
Ci teneremu e schinche
È ci ne feremu un brodu

U schincu po hè savuritu
È noi simu bocchifini
O Caparrittu t'invitu
Chì tanti brodi pullini!
Cun quellu di Sidussincu
Ti facciu i tagliarini.