ISULA
Vous souhaitez réagir à ce message ? Créez un compte en quelques clics ou connectez-vous pour continuer.


Lingua è cultura corsa
 
AccueilAccueil  Dernières imagesDernières images  RechercherRechercher  S'enregistrerS'enregistrer  ConnexionConnexion  
-17%
Le deal à ne pas rater :
Casque de réalité virtuelle Meta Quest 2 128 Go Blanc (+29,99€ ...
249.99 € 299.99 €
Voir le deal

 

 Mundiale di l'animali

Aller en bas 
2 participants
AuteurMessage
Circione

Circione


Messages : 2212
Date d'inscription : 27/02/2012

Mundiale di l'animali Empty
MessageSujet: Mundiale di l'animali   Mundiale di l'animali EmptyLun 12 Mar - 1:06

Eccu una sturietta chì m'hè stata conta in francese da un amicu, m'hà datu l'idea di fanne qualcosa.



Centu pedi




Furiani, stadiu Armandu Cesari, pè u Mundiale di ballò, a Corsica riceve u Kenya, favuritu di a cumpitizione. Sò ghjunti numarosi i spittatori à sustene a so squadra ma dinù à vede ghjucà a dream team africana tinante di u titulu: nu a cabbia u Gurillu braccilongu. In difesa quattru arcefali: u Rinuceronte è u Bufalu annantu à i lati è l’Alifante è l’Ippupotamu difensori cintrali. Davanti à a difesa, dui mizani difinsivi di prima trinca : a Iena è u Facoceru. Numaru dece è capitanu, u Lione. Annant’à l’ale, a Gazella è u Ghjattupardu l’animali più rapidi di a savana. È ben’intesa, in punta, a Giraffa cù i so quattru metri d’altu…

Per a squadra corsa : guardianu, l’Altore – più di dui metri di largu alispartu. Fasgianu u Sumere è Bucchisgiolu u Boie in difesa cintrale, cù dui laterali, u Ricciu è a Tristughjine . À mezu, u Cignale, u Cursinu è a Muvra – chì porta a fascia di capitanu. Annant’à l’ale, u Cervu è u Ghjattuvolpe. Infine, attaccante cintrale, a Volpe.

Entrenu e duie squadre annant’à u tarrenu sott’à l’acclamazione di u publicu scatinatu. Bandere, corni, trumbette, tamburi… Furiani ùn hà mai cunnisciutu simule battabugliu ! Principia a partita. Sgualtri, tecnichi è putenti, l’Africani piglianu subitu a suprana annant’à i Corsi. In quattru è trè sette eccu a prima uccasione : accilirazione fulgurante di u Ghjattupardu chì manda un centru millimitratu à a Giraffa chì sciacca una capata… ancu di grazia, l’Altore sparghje l’ale è para u ballò! Pè stavolta i Corsi a si francanu. Cinque minuti dopu, u Rinuceronte parte solu à l’attaccu da i so vinti metri, Ghjattuvolpe, Cignale, Tristughjine, si para tuttu nanzu! centra annant’à a Giraffa, l’Altore prova à intervene ma a Giraffa, più lestra, rimette u ballò di capu à u Lione chì sciacca una ripresa magnifica ! A campa chì Fasgianu ch’era firmatu annant’à a so linea, riesce à sgagià incù un’erpiata di quelle. Una volta di più i Corsi a s’anu corsa brutta. A Tristughjine, firita annant’à l’azzione di u Rinò, deve sorte in catalettu , sarà rimpiazzata da u Ciocciu. Hè un macciu à sensu unicu, i Corsi sò tutti in difesa è benchì arciduminati, tenenu forte, incù i so pochi mezi è soprattuttu incù e so virtù : u curagiu è a sulidarità. Si face ch’e simu sempre à paru quand’ellu fisca u Corbu è manda i vintidui ghjucadori à u riposu. Zeru à Zeru, hè digià un risultatu pè i Corsi… sguasi una vittoria !

Un quartu d’ora dopu voltanu i ghjucadori annant’à u tarrenu è ripiglia a partita. A duminazione africana si face risente ancu di più cà in principiu di macciu ma i Corsi, eroichi, ùn cappianu nulla è tenenu cusì sin'à l'ora di ghjocu. Ma à quindeci minuti di a fine, u Facoceru scarta annant’à l’ala pè u Ghjattupardu chì rimette in dirizzione di u Lione chì hà siguitatu, affacca a Muvra di corrimiu sarratu è sciacca una intisgiata trimenda à u Lione : penalty! U capitanu africanu piglia u ballò è si face ghjustizia cù una zampata vindittera chì piglia l’Altore à contrapede, Kenya 1, Corsica 0. Cinque minuti dopu, a Gazella si ghjoca di a difesa corsa è manda un centru à a giraffa chì stavolta u mette in fondu, 2 à 0.

I Corsi ùn ne ponu più, sò sfiatati, lecchi, scuragiti. Ferma una dicina di minuti à ghjucà, l’addestradore – u coach per dilla in francese… – dicide di fà entre un ghjucadore frescu. U Cervu, stancu mortu, cede a so piazza à u Centupedi. Appena intrutu in ghjocu, quellu piglia u ballò, cù una vivacità è una tecnica eccezziunale ecculu chì si face un veru fistivale, picculu ponte à u Lione, rastellu per sbarazzassi di a Iena, passamenti di zampe – i pò puru fà chì ne hà parechje – à l’Alifante, è infine infrugna a balla nu e rete africane! À a suspresa generale i Corsi riducenu a marca, 2 à 1. U publicu ripiglia fiatu ! Cinque minuti dopu, parte torna u centupedi capicalatu, passa in rivista u Facuceru è a Iena è dà un ballò in oru nu u spinu di i difensori, a volpe ch’avia anticipatu ùn hà più cà à puntà a balla in fondu à e rete, 2 à 2 !!! U macciu hè per compiesi, intrimu nu u tempu addiziunale. In più bella, riparte u Centupedi, duie fisichette à u Bufalu, u colpu di u sombrero à l’Ippupotamu, è marca cù una ripresa magistrale! U Gurillu stumacatu hè custrettu à ricote u ballò in fondu à e so rete pè a terza volta … Furiani esulta, hè una vittoria storica.

Finitu u macciu, afflittu è vargugnosu ma sempre fair-play, u Lione và à filicità a Muvra.

— Ùn ci hè nulla à dì, ete ghjucatu bè, vi site battuti, mirdate a vostra vittoria.

— Emu fattu un maccione hè vera, ma ete ghjucatu megliu voi, à 2 à 0 ùn eramu cusì fieri… à ringrazià à Centupedi ! ellu sì chì ci hà rimessu annant’à e raglie !

— Ghjustappuntu ! stu Centupedi, pocu ghjucadore nò! ùn capiscu micca ch’è vo u fiate entre solu à dece minuti di a fine… cumu hè ch’ellu ùn sia micca titulare un ghjucadore cusì?

— O amicu, risponde a Muvra, ci vole à lascialli u tempu ch’ellu si metti i scarpi è ch’ellu s’appiccichi i straglieri!
Revenir en haut Aller en bas
Ruclinonu Solechjari

Ruclinonu Solechjari


Messages : 518
Date d'inscription : 27/02/2012
Localisation : Casinca

Mundiale di l'animali Empty
MessageSujet: Re: Mundiale di l'animali   Mundiale di l'animali EmptyLun 12 Mar - 7:52

Hè una storia vera o micca ?
Revenir en haut Aller en bas
http://appuntamentu-corsu.forums-actifs.net
 
Mundiale di l'animali
Revenir en haut 
Page 1 sur 1

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Prosa-
Sauter vers: