Circione
Messages : 2212
Date d'inscription : 27/02/2012
 | Sujet: Ghjuvanteramu Rocchi, "Stendu à sente i vostri cori", scioglilingua è puesie, ADECEC 1975.  Dim 4 Mar - 14:31 | |
| - Citation :
- STENDU À SENTE I VOSTRI CORI
" Scioglilingua è puesie "
GHJUVANTERAMU ROCCHI
ADECEC 1975
mamma spazza lu purtò
mamma spazza lu scalò
mamma spazza spazzuletta
mamma spazza la piazzetta
***
una lumera pè ghjucà
na lumera una lumera
una lumera pè ghjucà
chì avemu l'elettricità
***
mela rossa chì matura
a ghjandaghja chì la cura
eccuci à ziu Francè
veni à maturà ind'è mè
***
ci hè una mela rossa à sparte
omu hè duie è ci vole l'arte
sta metà sarà per mè
questa qui sarà per tè
è a coda hè pè u rè
***
Maria curia pè u stradò
ci era una vacca chì venia
è Maria si ne vultò
O paurò !
***
Pirulì vede à Pirulà.
Pirulà ?
Pirulà vede à Pirulì.
Pirulì ?
Pirulì Pirulà
si ne vanu à sfrattighjà
***
coda di purcellu
piuma d'acellu
ciottami in stacca
erba tavacca
pezzu di pane
bocca di cane
u u u !
***
abbaghjava pè ride
era sempre cuntentu
u chjametenu " spaventu "
da u capu à a coda
era sumere sanu sanu
u chjametenu " fasgianu "
purtava cappellu curpettu
è mustacci à l'insù
ùn lu chjametenu mai più
***
una chjara d'ovu
in un stuvigliu novu
battu eiu batti tù
chjara d'ovu ùn ci n'hè più
***
Santa Lucia
hè stata in Bastia
à cumpassi
un bellu vestitu
ùn avia mancu un sollu
si n'hè ghjunta à strappera di collu
***
una volta ci era un rè
chì s'assumigliava à tè
l'anu messu una curona
d'alivu è d'erba barona
è po l'anu dettu avà
si rè pè l'eternità
***
trascinava una prisacca
rughjula d'erba tavacca
chì li piacia à fumà
a pippa senza piantà
***
una volta pè la stretta
l'hè cascata la baretta
vulendula ripiglià
l'hè cascatu u baccalà
***
eri un serpu s'hà persu un ovu
ghjè u nottulu chì l'hà trovu
l'hà cuvatu è chì hè natu ?
un pernicottu scialanguatu !
***
a ghjallina di Lillina
face un ovu chì cincina
a ghjallina di ziu Memmu
face un ovu chì stà fermu
a ghjallina di ziu Tittu
face un ovu chì sta rittu
a ghjallina di Teodoru
pesca è face un ovu in oru
***
una duie è trè
u sumere di Memè
a ghjallina di Martina
u gattucciu di Paulucciu
u catellu di Pistellu
l'anu visti à u macellu
oimè !
***
aghju un cane
chì ùn nè vole manghjà pane
aghju un gattu
magru cum'è un saragattu
aghju un scarpu
chì stà sempre bocchiapertu
pè la festa di Ghjesù
aghju un sollu chì ùn core più
***
u pesciu m'hà dettu :
ampara à nutà !
l'acellu m'hà dettu :
ampara à vulà !
u pallò m'hà dettu :
ampara à ghjucà !
È babbu m'hà dettu :
ampara à a scola !
***
dui boi
sò li toi
è sti sei
sò li mei
i feremu lavurà
pane ùn ci nè mancherà
***
Pè salutà à Marietta
chì purtava una bella faldetta
si hà cacciatu lu cappellu
u ziu Cuccurunnellu
suffiava un ventu scatinatu
Cuccurunnellu hè cascatu
malatu
***
eri sera madamicelle
hè nivatu tante stelle
chì in celu ùn si ne vidia
più mancuna chì lucia
quelle capulate in mare
l'anu i pesci pè cullare
quelle nantu à i nostri tetti
sò pè favvine frisgetti
quelle pè i nostri chjassi
pè fà frolli i vostri passi
***
A mo manu hà cinque diti :
u ditone, u ditu grossu,
tene tutti l'altri à dossu :
cun l'indice, ognunu a sà,
dicu " eiu " senza anscià ;
u maggiore hè pè fà trè ;
è l'auriculare, u ditucciu,
u mignulellu,
u più chjucu,
hè pè fà u bellu.
***
U MERLACCONE
Un merlaccone
vene è si pone
nantu à un schincone
di scopa secca
fu fu fuletta
cun l'ale sparte in banderetta.
Chjù chjù chjuchjetta
bocca spalancata chì aspetta.
Frù frù frullera à frullallera
a merla nera
chì s'addispera
" Ùn stà custì, a volpe hè quì,
chjù chju chjuchjì !
Zitta è maligna
vulpaccia scrigna
a so riseta maladetta
bianca saetta !
Un cane abbaghja...
Eh ! la lamaghja !
Pè lu viottulu caprunu
frisgia lu tangu, zinga lu prunu,
à pediola chì spatanscendu si cunsola
di ghjunghje sana in la so tana.
Nantu à un schincone
di scopa secca
un basgiu d'acelli.
" Chjò chjò chjò... trè vermicelli "
***
U PINZIGLIONE
Di branca in branca
mai si stanca di svulachjà,
s'alliscia è ci canta
centu canzone
u nostru bellu pinziglione
Pè falli rabbia
da la callaghja
si n'entre in l'aghja
u vechju gallu
pizzichigiallu.
Ma chì primura !
Li piace l'altrura
à l'acellucciu !
A paglia è a pula
ellu le lascia à chì ruspula.
Di branca in branca
mai si stanca di svulachjà,
s'alliscia è ci canta
centu canzone
u nostru bellu pinziglione.
***
HE NIVATU
Hè nivatu stanotte.
In furia e nostre botte,
i nostri guanti,
a nostra sciarpa di lana.
Avanti !
Pè a piana
ci faremu un barone
più altu chè San Petrone.
È s'ellu ci piglia l'estru
pallate à u nostru maestru !
***
E FARFALLE
Duve vanu le farfalle
alibianche o aligialle ?
Alibianche o aligialle
vanu in pratu le farfalle
à ballà in u decoru
di fiori d'argentu è d'oru.
Duve vanu le farfalle
alibianche o aligialle ?
Alibianche o aligialle
vanu in celu le farfalle
à ballà in u decoru
di stelle d'argentu è d'oru.
Duve vanu le farfalle
alibianche o aligialle ?
Alibianche o aligialle
stanu in l'ochji le farfalle
à ballà in u decoru
di sogni d'argentu è d'oru.
***
Pè u sgiò ventu
mancu un pientu.
Pè u sgiò tonu
mancu un sonu.
Pè u sigiò fretu
mancu a punta di u nostru spetu.
Pè a signora neve
un salutu cumu si deve.
Pè cumpare veranu
un pratu sanu.
Pè cumpare l'estate
porte è finestre spalancate.
***
A CIOCCIA, I PUILI E U FILANCIU
Piuli, piuli, piulucci i mo ciucci,
venite vicinu à mè...
Tenè !
un grombulu di risu,
un brusgiulu di pane,
un pisu...
Tutti in tornu à mamma trizinata,
cullana d'oru, tesoru, ciucciata !
Sottu à l'ale di mamma nascosi
ghjumelli calli è pilucciosi,
zampine zeppe, zampine
dilicate è damaschine !
U filanciu in celu gira.
Gira u filanciu
Cù u pizzicu à granciu !
Piuli, piuli, piulucci i mo ciucci,
ùn piuppiulate più... più...più...più...
***
U RUSCELLU
Corgu corgu porgu porgu
cantu cantu tantu tantu.
In i mo spechji inargentati
si miranu i fiori incappuccinati.
À u mo cantu risponde quellu
di l'acelli.
È tù zitellu
duve sì cù i to battelli ?
***
A PERNICE
A pernice chì dice
à i so pernicotti ?
State zitti, ùn fate botti.
Mi pare di sente u rimore
di u passu di u cacciadore.
Alè alè, pedighjate à cullà,
à chì da quì, à chì da culà.
Eiu in un sbattulime d'ale
mi lamperaghju in fiuminale.
À truvacci stasera vicinu à l'aghja
a più suprana
in a lamaghja.
Si vo sentite una fucilata
ùn vi ne fate
saraghju digià
infilicaghjata.
***
I GUAI DI U TUPUCCIU
L'acqua piuvana
hà empiutu a tana
di un tupucciu
chì ùn sà micca nutà
è chì a ghjustu u tempu di scappà.
Per istrada trova un stucciu,
u nostru tupucciu.
Ne face u s'agguattu
dicendusi : " quì po, mancu u gattu
mi truverà ! "
Passa Mignulellu
un bravu zitellu
chì tene à ghjucà.
Un calciucciu in u stucciu.
Oimè u tupucciu
chì ùn sà micca cincinà !
***
GHJOCU
Fiaccule rosse, gialle, turchine,
ballu in cullana di centu falchine !
A manu tesa si cala è si pesa,
si mette in scuscesa
per inguantà.
Ma à voi fate
maliziose
chì ùn vi piace
mani chjose,
una à una
scappate scappate
pè la catena à piettavvi in grate.
Dumane torna venerete
ch'o riprincipiimu lu ghjocu
sopra à lu nostru capifocu.
***
A LUMACA E U SOLE
Una lumaca longa tirata
nantu à una fronda d'insalata,
briaca di bazza,
caccia è so quattru corne è spazza
l'alba.
U sole chì era piattu daretu,
crosciu intintu, mortu di freddu,
si mette à ride in i so raggi
po li manda quattru basgi
in punta di e corne.
Alè, face a lumaca, avà
possu puru andammine à dorme.
Calla infiarata
s'hè inchjuppulata
sottu à una fronda d'insalata.
U sole ?
U sole s'hà fattu una scaccanata.
***
FATULINA
Fatulina fatulina
tù chì cum'è la vadina
corri lesta è cantarina
da la sera à la matina...
***
Fatulina chì si sola
a to voce mi cunsola
veni è contami una fola.
***
Se tù veni, dumatina
ti purteraghju à la scola
pietta dentru à a mo cartina.
***
Fatulina chì so sola
a to voce mi cunsola
veni è contami una fola.
***
PANNU VIVU
A sepe si riveste à paru
di pannu vivu è cusì raru.
Trecce di luppiu, di vitalba,
ciuffi di veccia, stampi di malba,
ricami, ricami, tutti i fiori
richi di muscu è di culori.
Una ciatta legera ci balla.
L'apa à ghjucassi hè zampigialla.
Triulendu d'amore, un acellu
filu à filu ci tesse un ghjuvellu.
A sepe si riveste à paru
di pannu vivu è cusì raru.
***
U VENTACCIU DI GHJENNAGHJU
Statelu à sente,
statelu à sente
a fritulone
cum'ellu pichja à lu purtone !
Statelu à sente,
statelu à sente
à pienghjulone
chere una piazza à lu fucone !
Si lagna è si sfetta,
corre à l'albetta,
corre à lu tettu,
corre quant'è lu fullettu,
u ventacciu di ghjennaghju
carcu à bori d'acquifraghju !
Ma u purtone hè chjosu à ferriale
è u nostru fucone hè senza cappa.
L'albetta di castagnu vechju ùn sciappa.
U tettu in techje ùn teme tempurale.
Statelu à sente,
statelu à sente
à fritulone
cum'ellu pichja a lu purtone !
Statelu à sente,
statelu à sente
à pienghjulone
chere una piazza à lu fucone
U ventacciu di ghjennaghju
Carcu à bori d'acquifraghju !
***
SONNIU
Hè vera chì mi n'aghju da andà
quandu seraghju grande mà ?
È puru, sai, à a scola amparu !
Tù chì mi teni tantu caru
stai à sente isse scimità ?
Ùn t'attristà
a scelta hè fatta.
Mi staraghju quindi è po basta.
Ghjustu s'o m'alluntaneraghju
ogni tantu à fammi un viaghju.
A sera penseraghju à tè.
- S'ella ti garba o mà
parterai cun mè.
***
U SONNU
Misgiu, misgiu, vechju misgiu
pelilisciu è peligrisgiu !
Stacciu, stacciu, fine stacciu,
setine di lu mustacciu !
Focu, focu, stancu focu
guasi smattu è voci rocu !
In u scornu di u fucone
callu callu lu mattone !
Pianu pianu Ciprianu
entre è mi piglia la manu...
U mo lettu sin'à ghjornu
chì ne cascu da lu sonnu.
***
ARRITTI O ZITELLI CHI HE ORA
Arritti o zitelli chì hè ora,
u sole hè digià altu fora
è u chjassu s'empie di sguille :
" O donne pesci freschi, anguille,
triglie è ragnole di regalu " !
Sentite u panatteru !
U panatteru dice :
" Falu da u Sivarecciu à cufe piene ;
l'appitittu paghi le pene.
Pane, migliacci è falculelle,
culmate le vostre curbelle " !
Arritti, aiò ! Un niulincu
vanta in rime u casgiu pincu
ch'ellu baratta pè canzone.
U circulu hè ghjuntu. Un lione
porta un scimiu pè cavaglieru.
Ci hè un corbu biancu, un topu neru.
Durmite quant'è u saccone !
ch'elle ci voglinu e ciccone !
A saperete chì ci hè a scola ?
" Iè o mà, torna una stonda, sola sola ".
***
BASGI
Pendini rossi,
suchjosi basgi
di sole appesi à i chjarasgi!
Pichjate, pichjate o zitelli
à spartevili cun l'acelli.
Pendini rossi,
suchjosi basgi
di sole appesi à i chjarasgi.
***
DOPU CENA
Cum'ellu si stà bè
a sera dopu sena
cun l'ochji chiosi appena
di punta à lu caminu
unu à l'altru vicinu !
Babbu conta una fola chì c'incanta.
A nostra mamma cosge. U focu canta.
D'Amore l'ore è di Pace tamanta !
Cum'ellu si stà bè
a sera dopu cena
cun l'ochji chiosi appena
di punta à lu caminu
unu à l'altru vicinu !
Cum'ellu si stà bè !
***
U BATTELLUCCIU
Nantu à u mare
turchinu turchinu
u ventu ghjoca di viulinu.
Quanti
battellucci bianchi
chì si mettenu à ballà !
Ghjimba da quì...
Ghjimba da culà...
Ci n'hè unu, u più chjucu,
nimu ùn lu vole invità.
Strappa l'ancura è si ne và
nantu à u mare
turchinu turchinu
cù u ventu chì ghjoca di viulinu.
***
DUI AMICHI
À tempu ella mi vede,
a mo cagna principia,
ghjucarina ch'ella hè,
à saltichjammi in giru.
D'ùn pudella alliscià
a letecu è suspiru
pò ci n'andemu inseme,
ella nanzu, eiu appressu,
pè una longa spassighjata.
A machja ci cunnosce
è ci cunnosce a strada.
In paese quallà
l'avemaria scucca.
U sole si ne và,
digià pianu travucca.
Hè più dolce u ritornu
à francà basse è spichi
quandu more lu ghjornu
è ch'omu hè dui amichi !
***
UN' DORME ANCU
Fideghja u mo ciucciu,
fideghja
a piaghja chì spampilluleghja.
Mì culà ver di Bastia
s'hè calata una stella
tamant'è una cità !
Ùn dorme ancu.
À mumenti babbitu stancu
hà da ghjunghje da l'ortu,
babbitu stantu mortu
ti vulerà basgià.
Ùn dorme ancu.
Fideghja u mo ciucciu,
fideghja
a piaghja chì spampilluleghja.
***
U LAMENTU DI U FOCU
Ghjera u focu di u fornu
di notte cum'è di ghjornu.
Ghjera u focu di a ziglia
contu cum'è di famiglia.
N'averaghju cottu pani ?
N'averaghju scallatu mani ?
N'averaghju cuvatu amore ?
U populu chì mi stava à u latu
perchè avellu sparnicciatu ?
Senza ellu sò u focu à sguarru,
scatinatu
pè e machje è pè l'orte,
figliolu di l'oddiu
è babbu di a morte.
Quandu picciu ùn sentite
è stride di a strage ?
Ladri ! ladri ! rendite
l'omu à u focu in e so case.
***
VERANU
T'arrizzi una matina
è ti senti cummossu.
Un' nunda t'agradisce,
ai lu bè à dossu.
T'intratteni cù i fiori,
e petre ; u to purtellu,
capisci u caccianile
è capisci l'acellu.
Ti trovi à mandà basgii
in u circondu sanu.
Canti à voce rivolta.
Hè cusì lu veranu !
***
PO' SUFFIA' !
Poca timpesta scatinata !
A intenna di televisione,
sdradicata,
ghjace sottu u nivaghjone.
Cun stu fretu ci hè vulsutu tuttu
u nostru contu di mazuttu !
Pè dalla compia, da stamane in quà
simu ancu senza elettricità.
Pocu fà
babbu hà messu un bellu capifocu
chì hè di lecciu.
Ci hè digià callu in ogni locu.
Pò suffià s'ellu vole,
U libecciu !
A fiara face lumo
Senza mancu stampa di fume.
Pò suffià s'ellu vole !
Saranu più longhe e nostre fole.
***
I PASSI PERSI
Passi di a mamma
chì passa è chì vene.
Passi di u babbu
chì parte è chì ghjunghje.
Passi di i ciucci,
passucci.
Passi di i innamurati,
passi asgiati.
Di mammona è di babbone
Passi in giru à lu fucone.
State state à sente
u silenziu pisiu di i passi persi
chì passa !
***
PIUVIA
Piuvia achigliuli d'argentu.
Sentu
ch'aghju u capu
carcu cum'è un zampinaghju
di gucciulette.
Mi scuzzulu.
Nantu à l'arbette
piove achigliuli d'argentu.
***
L'ACELLU
Stamane à u nostru purtellu
hè ghjuntu à cantacci un acellu.
Veranu... veranu... veranu...
à tutti quelli chì ùn la sanu !
È noi, corri à torce mazzette
Pè fanne tante fisculette !
***
SO MIRACULI !
Nantu à u vetru ammachjatu
facciu u stampu di u mo nasu.
Ci apru un ochju in catarochju.
Sò miraculi !
Hè nivatu
da u stampu di u mo nasu !
***
SILENZIU
Nantu à u passu chì si n'hè andatu
à u paese abbandunatu,
à u muru chì si n'hè falatu,
à u boscu chì hè statu brusgiatu,
hè nivatu.
Silenziu !...
*** | |
|
