Cronichi di i cunfini

Da 1969 à 1972, dòdici òmini ani marchjatu annant’à a Luna, tutti americani. Era ben sicura à i tempi di a Guerra Fretta, è i dui putenzi spaziali di l’èbica, a Russia è i Stati Uniti, si faciani cuncurrenza pà essa a prima nazioni à pona un pedi annant’à u satellitu di a Tarra. I Russii aviani marcatu u primu puntu cuncirnendu a cunquista di u spaziu, inviendu u cusmunotu Yuri Gagarin in u spaziu (1961), è ublichendu i so numici yankee, pà a prima volta, à ricunnoscia chì l’Unioni Suvietica era intruta in una mudernità chì pudia trapassà i pussibilità di l’astronòtica americana. Ma l’affrontu fù di poca durata, è u prisidenti Kennedy, in un discorsu di 1962 firmatu cèlebru (« We choose to go to the Moon »), annunciò chì l’America saria a prima putenza à riescia à purtà un omu annant’à a Luna, è quissa nanzi à a fini di u dicenniu. A scumissa, abbastanza sfruntata, si rializò cù i missioni Apollò, è u sbarcamentu di l’astrunoti Neil Armstrong è Buzz Aldrin annant’à l’astru selenu di luddu 1969.


U prisidenti Kennedy annuncendu a cunquista di a Luna à l'università Rice di Houston in 1962.

Malgradu a riescita di 6 missioni Apollò, i ristrizzioni bugetarii missini un tèrmini à ciò ch’iddu cunveni oghji di chjamà « a prima cunquista » di a Luna. È dipoi a missioni Apollò 17, di dicembri 1972, più nimu hè vultatu à visità u nosciu satellitu. Pò parè incridìbuli, ma ciò chì l’Americani aviani missu menu i deci anni à rializà, più nimu hè parvinutu à riprudùciala mentri i quaranta ùltimi annati. Nè i Russii, chì ani rinnunciatu dopu à a so « disfatta » di l’anni sissanta, nè l’Auropa, duvintata puri putenza spaziali in u frattempu (capaci par esempiu di gistiscia un vettori com’è a fusea Ariana, o di pona pà a prima volta una sonda annant’à Titanu, u satellitu di Saturnu). Ci fù bè un’ ùltima prova di sfida americana, quandi u prisidenti George W. Bush pruvò di fà sunnià à un ritornu di l’Americani annant’à a Luna, cù un prugrammu ambiziosu intitulatu Custiddazioni, ma u so successori, Barack Obama, dicisi d’abbandunallu dopu à i difficultà nati da a crisa finanziera di 2007.


A jeep lunaria d'Apollo 17, ùltima missioni annant'à a Luna (1972).

Ma a cursa à a Luna ùn hè puri finita. Dipoi una quindicina d’anni, sò i Chinesi chì si sò affirmati com’è a terza putenza spaziali daretu à i Stati Uniti è a Russia. A China, forti d’una crèscita ecunòmica di 9%, è forsa a sola chì fussi sempri purtata da u dogma nicissariu pà varcà i so propii lìmiti, sarà certamenti l’attori principali di a « siconda cunquista » di a Luna. U prugrammu spaziali chinesu hè ghjà beddu avanzatu : in 2003 u taikunotu Yang Liwei fù u primu Chinesu à andà in u spaziu, cù u veìculu Shenzhu 5, è in 2011 fù missa in òrbitu terrestru una pìccula stazioni spaziali, Tiangong 1, primu passu versu a rializazioni d’una grandi stazioni nanzi à 2020. Ma l’ughjettivu annunciatu da l’agenza spaziali chinesa hè bè a Luna. Dui sondi sò stati lanciati in 2007 è 2010 pà studià l’astru lunariu (Chang’e’ 1 è Chang’e’ 2), è d’altri suvitarani sin’à a fini di u dicenniu, cù a missioni di ripurtà nant’à a Tarra pezzi di tarrenu di u satellitu. Dopu pudarani cumincià i boli abitati, forsa versu 2025 o 2030. Nisciun altra nazioni, par avali, privedi di fà meddu. Tandu, è pà un pezzu di sicuru, a Luna sarà chinesa. Ci saria dunca una nova raghjoni, cridìbuli, di sunnià à un ritornu di l’omu annant’à Luna, ma u prughjettu chinesu ùn hè micca chè scentìficu, par disgrazia. I disiderii cumirciali – cù u sfruttamentu di l’helium 3, chì pudaria nutriscia in energia i cintrali nuclearii di a China – ùn sò mancu piattati da l’autorità, è u scopu militaru hè dinò affirmatu di manera aparta, cù una basa spaziali capaci di lancià i missili annant’à tutti i punti scelti di a Tarra… È tandu si risicaria ancu di veda u sonniu selenu trasfurmassi in veru sunniacciu terrestru.

A rivuluzioni di l’esopianetti

A scuparta di Plutonu, in 1930, chjudia un capìtulu chì monda cridiani difinitivu, o impussìbuli da arricchiscia pà l’òmini di u XXu sèculu : quissu di a cunniscenza di u sistemu sulariu, è di i pianetti chì u cumpuniani. Da l’Egizziani à no, 4000 anni erani passati, 4000 anni pà apprufundiscia è tuccà i lìmiti di a cunniscenza di ‘ssu spaziu vicinu, ma à tempu immensu, ind’è chì no evuluemu. 4000 anni infini pà, da u caldu Mercuriu à i cunfini ghjacciati di u nìvulu d’Oort, ùn cuntabilizà chè 9 pianetti. Trà qualissi ben intesa a noscia, a Tarra, un locu ùnicu è maraviddosu chì u nosciu stintu autocintratu ùn pudia imaginà chè com’è u solu locu di vita pussìbuli in tuttu l’universu. Infini, i millai d’annati par misurà chì, al dilà di u nosciu sistemu misareddu, i nosci tècnichi dèbbuli ùn ci pirmittiani micca di sapè ciò chì si piattaia culà in l’infinitu, à l’umbra di a strana materia nera, in i circundarii mistiriosi di l’altri stiddi, à u cori stessu di a Galassìa…

I rivuluzioni i più maiori si passani anch’iddi à l’appiattu. È a scuparta di i primi pianetti « strassularii » fù una falsa scuparta, vinuta cù u gustu acervu di a disfatta. L’omu chì invintò ‘ssa rivuluzioni, chì scrivisti ‘ssu primu intròitu à u libru senza fini di a cunniscenza di l’Altri Mondi, fù un circadori pulunesu chjamatu Aleksander Wolszczan. Anzianu cummunistu, affidatu à i sirvizii sicreti di u so paesu, ùn avia micca tuttu à fattu u prufilu d’un eroi di i tempi muderni, nè forsa a rispittabilità puliticamenti curretta ch’iddu s’aspittaia da un geniu di a scenza dopu à a caduta di u muru di Berlinu, à u mumentu stessu di u trionfu di u liberalismu è di l’intruta di u mondu mudernu in a « fini di a Stodia », una teuria chì, à l’imàghjina di a visioni di i scèntifichi di tandu, scumittia chì i lìmiti di l’evuluzioni suciali – o spaziali – erani stati tocchi. Ma a Stodia ùn era finita, è i porti di l’universu s’aviani da spalancà di colpu, à modu trimendu è dulurosu. Hè in ghjiru à un pulsar, una stidda morta, chì l’astrunomu pulunesu scupristi in 1992 i dui primi pianetti for di u nosciu sistemu. Ghjà in 1990, Wolszczan avia pussutu binifizià d’un tempu curtu pà i so studii à u radiotelescopu d’Arecibo, annant’à l’isula americana di Porto Rico, è n’avia prufittatu pà scopra, dunca, u pulsar PSR B1257+12. Dui anni dopu, u studiu di u stessu ughjettu cilestu li palisò uni pochi d’anumalii ch’ùn pudiani vena chè da a prisenza di dui pianetti urbitendu in ghjiru à ‘ssa stidda à neutronu. Era una nutizia impinsèvuli : a prima usservazioni di pianetti for di u sistemu sulariu, ma in un locu cussì pocu clàssicu, cussì imprubàbili par raportu à ciò ch’iddu s’aspittaia, un locu dinò cù un nomu chì mancaia par troppu di glamour è di rumantismu, chì a cumunità scentìfica mundiali firmò senza riazzioni. Peghju, u dùbbitu è i scherzi intacconi a credibilità di a scuparta, malgradi una publicazioni in a rivista Nature, puri di i più sedii è di i più stimati in u duminiu di i scenzi. È par disgrazia l’effettu d’annunciu fù un fiascu, u silenziu presi a sèguita, è l’anzianu agenti di a pulizza sicreta di Jaruzelski vultò cussì prestu à u so bughju. Piccatu. Subratuttu chì a data, simbòlica, cuincidaia d’incantu cù i fistighjeri di i 500 anni di a scuparta d’un altru nuvellu mondu da u Ginuvesu Cristofanu Culombu…


U sistemu di u pulsar PSR B1257+12, indu funi trovi i dui primi esopianetti in 1992 (oghji si sà chì i pianetti in ghjiru à 'ssa stidda sò o mancu quattru)

Più prisintèvuli erani forsa l’astrofisiziani Didier Queloz è Michel Mayor, dui Sguìzzeri chì annuncioni in 1995 chì a « prima » pianetta strassularia era stata scelta à parta da l’Usservatoriu di l’Alta Pruvinzia. A nova pianetta, un mostru caldu da paragunà à Ghjupiteriu, gravitaia à 48 annati lumi di a Tarra, in u sistemu di a stidda 51 Pegasi. Fù dittitata suvitendu u mètudu di i vitezzi radiali, sempri aprudatu à l’ora attuali, è chì cunsisti à analizà i variazioni di u lumu d’una stidda, pà sapè s’iddi sò influinzati da a prisenza d’un astru in a vicinanza. Ed era ben intesa u casu pà « l’esopianetta » 51 Peg b, cussì batizata à usu bàrbaru – com’è tutti quissi scuparti pà a sèguita – nanzi chì u numìgnulu ufficiosu di Bellerophon li fussi attribuitu pocu fà. Infini, pà u colpu a cumunità scentìfica, i rivisti spicializati, i media di tutti i modi si scatinoni pà salutà l’evenimentu, è filicità i dui astrunomi d’avè pirmissu, i primi, ‘ssu nuvellu « passu di ghjiganti » pà l’umanità…

Ed era vera chì a scuparta di Queloz è Mayor apria un’ arghja nova pà a cunniscenza di l’altri mondi spaziali. Dipoi, più di 700 esopianetti sò stati ufficializati, è 2000 ghjà usservati – subratuttu da u novu telescopu Kepler – aspettani a so cunfirmazioni. Sò mondi cù una diversità chì nimu avaria pussutu imaginà, certi tamanti è ricuparti di gasu, viaghjendu à tocca à tocca cù a so stidda, d’altri bagnendu in i lavi, eterni inferni pronti à fassi divurà da l’astru chì l’abbaraculighja, d’altri dinò cù un’ atmusfera di vapori d’acqua, veri pianetti uceani ma indu i lìquidi sariani in unu statu supercrìticu chì c’era scunnisciutu sin’ad avali, d’altri infini sò pari à a Tarra, o li s’assumiddani più o menu, è viaghjani in a zona d’abitabilità di u so sistemu, aspittendu forsa chì a signatura di a vita ci fussi palisata un ghjornu da l’astrunomi…


Vista d'artistu di l'esopianetta 51 Pegasi b, scuparta in 1995.

‘Ssi mondi, diversi è carchi à prumessi ch’iddi sò, funi scuparti pà a prima volta in 1992 da un Pulunesu ch’ùn sapisti micca, o ch’ùn pudia micca, fà capiscia l’impurtanza di ciò ch’iddu vinia di svilà à u mondu. È duvistini aspittà chì dui Sguìzzeri, forti d’un’ altra raprisintazioni, puliti d’ugni ambiguità, più di u so tempu pà dilla chjara, li dessini trè anni dopu un’ esistenza cridìbuli è accittèvuli. Comu ùn pinsà micca, tandu, à ciò ch’era successu cinqui sèculi nanzi, in 1492, à u mumentu di a scuparta di l’America ? Culombu, u prima, missi u pedi annant’à u novu cuntinenti, po’ s’impuzzò in i so falsi certitùdini, a so avidità, è infini in a disgrazia è l’infamia. Vespucci, iddu, capisti ciò ch’iddu s’era trovu, è firmò par mai com’è « l’invintori » di u nuvellu mondu, à tal puntu ch’iddu fù iddu à lacalli u so nomu… Stunanti, ‘ssa stodia chì si ripeti, è chì ci ramenta quantu i più grandi rivuluzioni fermani inghjusti è implacàbili pà i so primi attori.

L’ànghjuli di Vènera

A vita. Eccu a quistioni maiori, tantu filusòfica chè propiu scentìfica, chì faci matriculà l’astrunomi dipoi i sèculi. Scantà u quistiunamentu annant’à a vita, à nomu di l’irraziunali, o di a fantasia, è vulemu bè dì di a vita in altrù, for di a Tarra, saria com’è di nigà a pulsioni primiera chì boca l’omu versu u Spaziu. Da i primi usservatori di l’Antichità à no, hè quissa a chièstula maiò, chièstula fundamintali è ingusciosa : sapè sì no semu i soli à campà in l’universu. Par avali a risposta chì s’imponi hè bedda chjara : i cundizioni di a vita, di u so sbuccià, di a so prisenza affirmata, ‘ssi cundizioni ùn sò prisenti chè annant’à a noscia pianetta, a Tarra, u solu locu chì senza cuntesta – è par forza – a vita ci hè accirtata. Ma puri a visioni di i scentìfichi hà oghji evuluatu, è u discorsu annant’à i pussibilità di scuntrà formi di vita, è micca chè in i cunfini i più alluntanati, micca chè suvitendu u solu mudellu tarrestru, ‘ssa visioni cunnosci certi sfumaturi di i più intarissanti. Meddu : hè ‘ssa prublemàtica chì cummanda i missioni scentìfichi i più ambiziosi di i nosci tempa.

È senza andà sin’à spiculà annant’à i pussibilità arrigalati da i novi cuntrati chì s’aprini oramai à a noscia cunniscenza, ma troppu luntani par palisà i so sicreti – com’è par esempiu i circundarii mistiriosi di l’esopianetti – hè bè u nosciu sistemu sulariu chì s’affirma com’è u locu u più favurèvuli pà truvà un ghjornu a vistica cussì ricircata. U sistemu sulariu parchì quì vicinu, manenti ancu, è subratuttu monda più divirsificatu chè ciò chì s’era pinsatu sin’ad avali. Un’ equazioni, chì s’appoghja annant’à a sola spirienza chì no t’avemu di a vita – a noscia – ci boca à circalla indu chì l’acqua hè prisenti, è subratuttu l’acqua lìquida. Oghji, a sapemu, l’acqua hè bè dapartuttu in l’universu, ma sì no l’avemu scelta sutt’à a forma di ghjacciu, o di vapori in l’atmusfera d’altri pianetti, hè a forma lìquida chì pari di vulessi fà di i più rari. Ma raru ùn voli micca dì inesistenti, è i scuparti di i trenta ùltimi annati ani rivuluziunatu in ‘ssu duminiu tuttu ciò chì no sapiamu, è tuttu ciò chì no pudemu aspittà à parta da ‘ssi cunniscenzi novi.


Raprisintazioni artìstica di l'uceanu d'Auropa, un satellitu di Ghjupiteru.

L’acqua lìquida, ùn la truvaremu indocu annant’à a surfazia di calchì astru ch’iddu fussi di u nosciu sistemu. Ma purtanti esisti, senza dùbbitu, in certi cundizioni particulari chì oramai ci tocca à piddà in contu. Ghjà annant’à Auropa, un satellitu di Ghjupiteru appena più minori chè a Luna (3121 km di diametru contr’à 3474 km), emu capitu ch’un veru uceanu d’acqua salita si piattaia sutt’à una crusta di ghjacciu sdrisgiata com’è a noscia Banchisa. A intarrugazioni hè di sapè quantu hè spissa a prutizzioni di ghjacciu d’Auropa, ma i stimazioni vani da 30 à 10 km sicondu i spicialisti, cù forsa i loca menu spissi à u niveddu di l’equatori. L’uceanu stessu faria 100 km di prufundori, è saria abbastanza caldu, o riscaldatu in certi zoni, pà favurizà a nàscita d’una vita. Hè d’altrondi dui volti più maiori chè tutti l’uceani di a Tarra arriuniti ! Hè dunca talmenti presa in cunsidarazioni ‘ssa pussibilità d’una vita stratarrestra annant’à Auropa chì i missioni di splurazioni futuri duvariani parta versu 2020, piddendu a sèguita di a sonda Galileo chì, in 2003, palisò l’esistenza di l’uceanu chì no evuchemu. Dopu, i scentìfichi fecini chì a sonda si lampessi da par idda in l’atmusfera di Ghjupiteru, è quissa pà schisgià una cuntaminazioni d’Auropa par via di i batterii tarrestri…

Ma Auropa ùn hè mancu u solu locu di u sistemu sulariu à prisintà i cundizioni prupizii à a nàscita di a vita. Si supponi par esempiu ch’un uceanu, o più esattamenti i mari, esistariani dinò sutt’à i ghjacci d’Enceladu, una luna attiva di Saturnu, indu i geyser sò stati visti à u polu miridiunali. È d’altri satelliti com’è Callistu o Titanu pudariani piattà anch’iddi un uceanu luntanu sutt’à a so crusta ghjacciata, ancu puri sì quì i cundizioni di l’affacchera d’una vita micrubiana parini appena più diffìciuli. Infini, cuncirnendu l’ùltimu mintuvatu, ùn hè mancu tantu a prisenza di l’acqua lìquida chì intarrughighja a cumunità scentìfica, ma u fattu chì Titanu, astru veramenti maiori di più di 5000 km di diametru, fussi u solu locu for di a Tarra indu i lavi è i mari lìquidi siani prisenti in surfazia. Ma sò infatti lavi d’ettanu o di mettanu, alimintati sicondu i staghjoni cù i piuviti di a stessa cumpusizioni. Sì no pricisemu u fattu chì Titanu pussedi dinò un’ atmusfera zippa fatta d’azottu à 98%, truvemu quì i cundizioni i più vicini à ciò ch’iddu ci fù annant’à a Tarra quandu a vita ci nascisti, 3 o 4 migliarda d’annati fà. L’ipòtesi ch’una vita batteriulògica fussi prisenti annant’à Titanu faci chì l’Americani è l’Auropeani ani missu i so forzi in cumunu pà mandà una grossa spidizioni rubutizata, « Titan Saturn System Mission », chì duvaria parta à a fini di u dicenniu, è tucca u satellitu à l’orizonti 2030. Pacenzia dunca, ch’uni pochi di risposti l’avaremu tandu.


Mudellizazioni rialista d'un lavu di mettanu o d'ettanu lìquidu annant'à Titanu, satellitu di Saturnu.

Ma comu evucà a ricirca di a vita in u nosciu sistemu senza parlà di Marzu, è sapendu chì tutti i spiranzi sò piazzati in quissa pianetta chì, à modu rigulari, hè a più vicina di a Tarra (55 miglioni di km). À prima vista, Marzu hè un disertu infinitu, una pianetta prisintata in generali com’è sicca, ma quantunca cù dui calotti pularii fatti di ghjacciu di carbonu in surfazia, è forsa di più di 15% dinò di ghjacciu d’acqua (monda di più pà certi spicialisti chì pensani chì i quantità sprupusitati d’acqua ghjacciata si piattariani sutt’à una cuprèndula carbònica). Una prisenza di l’acqua, in tutti casi, oghji cunfirmata ancu in l’altri rigioni di a pianetta, ancu puri s’idda si piatta – sempri ghjacciata – sutt’à a pulvariccia russa è ussidata chì dà à Marzu u so culori cussì cèlebru. Ma un’ acqua chì, in certi cundizioni, pudaria curra par poca durata, sdrughjindu sutt’à una sciappa di ghjacciu riscaldata da u soli. È certi fottò di i più sedii attestani di ‘ssu fenòmenu. A vita pussìbuli annant’à Marzu, dunca ? Ferma sempri diffìciuli d’èssani cunvintu, o mancu s’iddu si fighjola i cundizioni attuali annant’à a pianetta, ma inveci a prubabilità d’una vita passata, à u mumentu chì Marzu era ricupartu d’un uceanu d’acqua – più di 3 migliarda d’annati fà – ùn hè mancu appena scantata da l’astrunomi, è u dibàttitu hè ancu statu rilanciatu pocu fà, cuncirnendu una vita attuali, quandi una squatra di circadori australiani hà dimustratu chì Marzu pudia essa abitèvuli ma… suttitarra, è più esattamenti da 7 à 36 km in prufundori sì a purusità di a pianetta hè quissa chì no imaginemu. Veni à dì chì, in certi sàpari è inzìculi di u so tarrenu prufundu, Marzu pudaria permetta chì l’acqua lìquida è a timparatura dulci siani prisenti quant’è nant’à a Tarra ! Un paradisu pà una vita micrubiana, ma chì par avali nimu hè andatu à svirghjinà cù u so zapponu…

Ma si pudaria ancu chì a vita ci sbucchessi di colpu, indu ùn l’aspittemu micca, in certi cundizioni ch’ùn pudiamu priveda. Senza acqua lìquida, senza surghjenti di calori favurèvuli, luntanu da i cuntesti clàssichi chì a Tarra ci imponi d’imaginà… È tandu pinsemu à a pianetta Vènera, a più vicina di a Tarra, 45 miglioni di km, quissa chì li risembia u più dinò in murfulugia, cù 12 000 km di diametri, ma a menu fraquintata dinò da i sondi tarrestri, par via di i so cundizioni infirnali di surfazia : una atmusfera carca à timpesti, centu volti più zippa chè quissa di a Tarra, una timparatura di 490°, è una prissioni di 90 bar chì ci sfracicaria di colpu com’è chì no fussimu stati furmìculi, infini un’ attività vulcànica di i più intensi, cù fiumi di lava à 1000°… Ma quissa hè par ciò ch’idda ci rigala Vènera à u niveddu di u tarrenu, o in a so atmusfera bassa, chì in altitùdina i cundizioni sò altri, è ancu par dilla franca, si poni prisintà sutt’à una forma accittèvuli. À 50 km d’altezza, par esempiu, i ballò meteò lacati da i sondi suviètichi vegà, in 1985, misuroni i timparaturi chì andaiani da 30° à 40°, cù una prissioni da paragunà à quissa prisenti annant’à a Tarra. In a stessa zona, si scupristi dinò chì l’acqua era prisenti à 25% (à mezu à un bagnu pocu accuglienti, hè vera, cumpostu subratuttu d’àcidu sulfùricu). Infini, un fènomenu di i più strani, è par avali firmatu senza spiicazioni, fù usservatu à 80 km d’altitùdina, subra à a sciappa maiori di i nìvuli : « calcosa », suvitendu a furmulazioni di u spicialistu Charles Frankel*, ingutti à ‘ssu niveddu a mità di l’energia ultraviuletta vinuta da u Soli, un pocu com’iddi facini i pianti annant’à a Tarra. ‘Ssa bizarraria, unnancu spiicata, pudaria avè un’ orìgini biulògica sicondu à uni pochi di scentìfichi, è tandu ci truvariamu davanti à una forma di vita di i più strani, di i più impinsèvuli sì no ci fidemu à i schemi i più raprisintati oghji da l’esobiulugia. Una vita chì bularia – sutt’à chì forma ? – in i stesi vintosi di Vènera, aspittendu chì i missioni futuri stabilissini ciò chì saria l’evenimentu maiori di l’insembu di a noscia Stodia : u primu cuntattu.


Vènera hè un infernu, ma si pudaria chì una prisenza biulògica bulessi in a so atmusfera alta.

Ma da st’ànghjuli imprubàbili di Vènera à i pussìbuli criaturi amfìbichi d’Auropa, da l’eventuali batterii marziani à i microbi tichji à mettanu di Titanu, par avali ni semu sempri à spiculà. Nisciuna prova di vita hè stata arricata, è nienti hà vulsutu bruddicà davanti à i radar di i nosci sondi intrèpidi. Ma una cosa hà avanzatu, à for è à misura chì l’ignuranza di u Cosmu pirdia u tarrenu, un’idea chì paria scema fin ch’ùn aviamu imparatu a pirmanenza di i stessi règuli univirsali di a fìsica chì ci inturniighja : ciò chì hè pazzia hè di creda chì no sariamu ùnichi, è soli in tuttu l’universu. Sì a vita hè nata quì, è sì i cundizioni pà a so cumparizioni parini d’essa cussì prisenti in tuttu u sistemu sulariu, voli dì certamenti chì, più chè d’essa prubàbili, si pudaria chì a vita sighi infatti "a règula". D’ùn pudè veda oghji ciò chì d’evidenza hè unniprisenti, eccu ciò chì ci duvaria renda ùmili, in l’accittazioni di i nosci lìmiti, è di a noscia vera diminsioni in quissa immensità fatta à miglioni di migliarda di sistemi altri, è di pianetti chì, par piatti ch’iddi fermani, esistini bè. È oghji quissa l’emu capita.


*Quissa hè pà a cacciata annant’à Wikipedia, o Circiò.