2084.
Dapoi più di quarant'anni avà, è dapoi l'avenimentu di l'autonomia, tutta a pupulazione di Corsica si cuncentreghja per a piaghja è longu e marine. Solu unepochi chì ricusavanu 'ssu mudellu di sucietà sò stati à campà in l'interiore, abbandunati da i puteri publichi è da i so paisani chì sò falati in ghjò. Un ci hè più strade per ghjunghjeci, ùn ci hè chè piste, a machja, i lamaghji avvampanu u circondu è parenu una fruntiera naturale cun u bor'di mare, induv'ellu si cuncentreghja u sviluppu, a civilisazione, u béton, l'otelli di lussi, e case di ricconi, è i casamenti, rifugii di i disgraziati.
Un ci hè più agricultura per a piaghja, tutta l'economia hè girata ver'di u turisimu, i ghjochi è i burdelli. A Corsica hè diventata u Las Vegas di u mare terraniu.
10 Ghjugnu.
Lili vene di finì di spazzà. U calore angusciante di 'ssu principiu di ghjugnu li ne face falà quattru per ochju, ma ùn hà ancu à finì, li ci vulerà à lavà i piatti, pulì i vetri, è dopu pigliassi una duscia, chì Monsieur Filippon l'aspetta in a camarona. Oghje a moglia ùn ci hè, è 'ssu vechju cuccu hè imburritu, siguramente u calore. Parechje volte, Lili vuleria ricusà, ma ùn a ci face chì Monsieur hè sempre generosu dopu à l'amore. Hè ghjunta à fassi sin'à trè volte a paca di un mese, lasciendusi andà à i capricci sessuali di u banquieru in ritirata. Hè vera chì di e volti, hè dura, e partite à trè cun a moglia, i ghjochi sadomasoscisti, e bucie ch'ellu ci vole à cuntà à u maritu, a sera in casa, parechje volte hà resu di disgustu. Ma hà sempre ricuminciatu, l'hà fatta per u ciucciu, per mette i soldi da parte per pacalli un avvene in altrò, in Francia o in America, ma micca quì à fà u servu à i ricchi, u vidore in un cabbulò, o u cruppieru in qualchì casino.
Hè surtita fora à fumassi una sigaretta, è fideghja ver'di a muntagna. A so mamma li cuntava chì quand'ella era chjuca, da a piaghja si vidianu i paesi di a Casinca, oghje ùn si vede chè machja, u salvaticume à l'infinita.
Forse chì quassù si seria campatu megliu, lenta ghjittendu a sigaretta.
Si volta è riguara u gode chì Monsieur li hà preparatu annant'à u tavulinu.
Chì vulerà fà torna cun què 'ssu porcu..
Lili s'avanza ver' di a casa, u longu di a piscina, è d'un colpu u so sguardu hè attiratu da una mansa di carne tazzata chì reghje custì.
Da u schiffeghju, hà lampatu u gode ind'è a piscina.
Monsieur Filippon hè in tarra, u colpu tazzatu, e tripe à l'infora, u capu ruzzicatu.
1mu d'Aprile. Aiacciu
In u so scagnu, u presidente di regione Paulu Camellu di Rocca Gobba suda cum'è una salciccia. Una catamansa di dossiers li facenu fronte, è in più di quessa ci vulia ch'elli ghjunghjissinu tutti oghje à rompeli e stacche.
S'incende una sigaretta è chjama u so cunsiglieru. A u capu di dece seconde, quellu entre in un pezzu.
Chì ci hè o sgiò presiden' ?
Mr Fillipon, u presidente di l'associu di e residenze sicundarie, m'hà scrittu. Si lagna chì ellu è d'altri anu avutu à soffre miraculi disguasti fatti da cignali chì falanu da a muntagna.
Ié è?
E è, un cornu volu ch'arreguleghjimu u prublema. Puttana, ùn capiscu micca li lasciemu a muntagna sana à 'ssi cignalacci, chì faleranu à facci cacà quì. A crede chì quassù ùn ci sia più nunda à rumà.
Circheremu una suluzione o sgiò presidente. Ci hè altri affari, dicenu chì i naziunalisti volenu fà una manifestazione.
E ghjura la madonna, perchè? Puttana, l'affari eranu chjari, u putere puliticu à noi, i ghjochi è u turisimu à a maffia è à elli i burdelli, ùn anu di chè lagnassi.
A sò, ma à ciò ch'aghju capitu, ùn li hè piaciutu chè vo ricusessite di lascià apre una buatta per issu Fulelli.
Ma sò conni o chè? Un ci hè più acqua,avemu bluccatu tutti i permessi di custruì per u mumentu, a sanu anch'elli. Chì volenu? Chè no collimu à circalla in muntagna?
Dicenu chì ci vole à pensacci.
S'ella fussi cusì faciule. Quale hè chì sà ciò chì ci aspetta quassù? Dimmi appena, sì solu in bureau ?
Ié o sgiò presiden' .
Sò cuntrariatu, ci vole ch'eo mi cacci a piconia, vedi...
Ié o sgiò presiden' .
U giovanu cunsigliere chjova a porta à chjave, poi passa sottu à u scagnu di u presidente, quellu hà digià sbragagliatu u so pantalone, è quandu Stefanu ingolle u so sessu, lenta un suspiru di piacè.