infine grazia à diu, sidussincu ritorna

o campane silenziu
ùn rumpite stu sognu
chì sidussincu passa
arresu è malinconiu
di trè ghjorni di vacanze
ellu n'avia bisognu

A cunsigna cusì chjara
Vecu ch'ùn l'ai capita
Chì mi parli di vacanze ?
Avale falla finita !
Mi si pare ch'a to zucca
Hè pocu è micca salita...

Di sale in zucca ancu tù
Ne saristi bisugnosu
Ma l'aria di u cuntinente
Soca ti rende ritrosu
Statti qualchì ghjornu in più
Ch'ai bisognu di riposu

Ci vole à riceve i cunsigli
Ancu di un giuvanottu !
Eu a li spiegu dirittu
E ellu capisce tortu
Ma sta volta u seguitu
Chì ritornu u vint'ottu.

Era ora ch´è tù volti
Ch´è t'ùn fussi mai partutu
À rombu di stà culandi
Diventi pratinsiunutu
E poi quand´è tù parli
Ai l'accentu pinzutu

Mi dumandu veramente
Duve vedi pratinsione
Quandu invichjatu in Francia
Ripigliu un pullastrone
Chì face passà l'accentu
Nanzu u dettu è a ragione.

Chjappu ai a mentalità
È l'accentu di stu locu
Scusami o Sidussincu
Ma ragione ùn ti ne docu
Ch'in lu toiu u ragionu
U sensu hè bellu pocu

Ch'è tù un mi dessi ragione
Un ci hè troppu da stunassi
A chì n'hà pocu per sè
N'hà ancu menu per l'astri
E quand'ellu si ne ghjova
Un face chè belli impiastri.

L'impiastri ch'è tù mi dici
M'arrecanu u stumacheghju
Capiscu ciò ch'elli sò
Solu quand´e ti fideghju
È ghjè vera ch'in stu mondu
Ùn si ne pò fà di peghju

S'è t'ai u stumacheghju
Eiu aghju u brusgiacore
Di quesse e parullaccie
Ne sì u vile autore
Invece chì la mio faccia
A m'hà fatta u Signore.

Sò cristianu è u signore
U cantu è po u precu
Ma a mio fede sminuisce
Ogni volta ch'e ti vecu
Soca quand'ellu a t'hà fatta
Ghjera in lu bughju cecu

Ancu per esse à bughju
Face opare di vaglia
Mette ellu u chjarore
E u so ciarbellu un scaglia
Ma quand'è tù canti tù
Hè tandu ch'ellu si sbaglia.

Fideghja ch'in puesia
Tù farei sempre ciabba
Rifletti à ciò ch´è tù dici
È riteni la to rabbia
Chì u signore m'hà sceltu
Quist'annu per esse Papa

( Francescu Primu ) lol

Pè mette appena di lume
T'ogliu palisà u veru
Quandu a t'avaraghju detta
Sarà grande l'addisperu
Or guarda lu to carminu
Scusa ma lu fume hè neru !

Fà chì ti sbagli di cappa
Ch'un ai fede cristiana
Cunfondi u Vaticanu
Cù a centrale di Lucciana
In Roma u fume hè biancu
Dipoi una settimana

Ma s'è tù ti credi in Roma
Tandu capiscu u to dettu
Amicu per lu to capu
U cappellu hè troppu strettu
Ti salutu pè stasera
Vecu 'tù si digià in lettu...

Ma s'è t'ùn la sai micca
Ci vole ch´e a t'amparghi
I cappelli stanu stretti
Quandu i cerbelli sò larghi
À bona notte o amicu
Mi chjingu ch´avà hè tardi

Ti salutu o caru amicu
Stà à sente a mio voce
Nu a meia a pignatta
A risposta a facciu coce
S'è tù ti chjinasti papa
Ti si discitatu croce.

avaristi ancu piacè
di vedemi in crucifissu
ma ch'è tù sì un falzacciu
eiu mi ne sò arvistu
chì prima basgi a croce
è dopu pizzichi à Cristu

Eu ùn l'aghju pizzicatu
Ma tù po' l'ai feritu
Un si pò tuppà l'arechje
Quandu sente lu to stritu
U fattu di cantà messe
Ellu lu t'hà pruibitu.

Diu ùn m’hà difesu nulla
Ci vole ch’è a ti dichi
A messa a cantu in coru
Aspessu cù li m’amichi
A ti canteraghju forse
S’è un ghjornu ti mariti

Caparrittu a to manera
Avà a cunnoscu appena
Oghji volta tù mi chjami
A l'ora di a santa cena
Ch'è tù scià scumunicatu
Per lo to grande peccatu !

mi scusu d'avè cumessu
oghje un peccatu murtale
t'aghju impeditu di manghjà
oimè ciò chì m'accade !!
andaraghju à cunfessammi
dumaitina à l'altare

Ai manghjatu lu pintintu
Mi rallegra è mi cunsola
Li to peccati murtali
Cù lu mio viziu di gola
U prete l'assolverà
In una parolla sola.