infine grazia à diu, sidussincu ritorna

E to rime o Caparrittu
Si ne colla a puzza in celu
Ne perdi u to latinu
E mi scappa ancu u mo grecu
Un vale à lavatti l'ochji
Mi pare chè tù sì cecu.

o ma quant'ella ti piace
à stuzzicà u vespaghju
s'un ghjornu diventu cecu
mi fermerà st'avantaghju
ghjè chì a to faccia boffa
ma'più ùn la vidaraghju

Un stuzzicu lu vespaghju
Sì tù chì mulesti l'apa
Un pudarei ma'più
Mancu in sognu esse papa
Quelli chì t'anu alzatu
Ne mughjanu "Ch'ellu falga !"

feghja ch'ùn sò ancu cecu
è la mio vista ùn cala
sti scemi ùn riesceranu
à fammi falà a scala
ch'ùn sanu fà a sfarenza
trà u colla è u fala

Lascemu corre i tonti
Ch'anu biota a capochja
Hè ora di penitenza
Un sì più u capicochja
Nu a pila benedetta
'Tù finisca in granochja !

ùn sò nè cioncu nè cecu
chì la mio vista si currege
sappia ch'à li mio dui ochji
aghju dece nant'à dece
dunque sò sempre lu papa
prontu à regnà è à direge

Ai pussutu furmà
Un cumpulottu scimescu
E per vultulà l'affari
Vecu chì tù sì manescu
Ma pritendi esse papa
Quandu ùn sì nemmancu vescu.

fà casu ch'è t'ùn ti sbagli
cum'è lu prete à l'altare
feghja chì a ghjelusia
hè propiu un gattivu affare
sò PAPA è à tè t'annarba
ch'ùn si mancu cardinale

Eiu ùn aghju mai avutu
Nè rabbia nè mancu invidia
Di ghjunghje à la to piazza
Signore ma' ch'ella sia
Vecu ch'ai l'idee torbide
Quant'è l'acqua di a to pila.

tù ti stai à la to piazza
chì la meia ùn ti piace
ma ancu s'è t'a vurristi
di ghjunghjeci ùn sì capace
ùn ti vutaria nimu
ch'ùn vali tante chjarasge

Cù le mio poche chjarasge
Ne faraghju l'acqua vita
Tù cum'è d'astre granochje
Finisciarei in buttiglia
Eiu ùn ci possu micca entre
Ma in veru c'hè poca invidia.