Sturiette è altre pazzie

Hè riscaldata ma mi face piacè di sciaccalla quì



PRUCRASTINEGHJA MA MANCU TROPPU (Antone ind’è u psì)

« Ch'è tù cachi chjavelli ! ». Eccu e prime parolle d’Antone surtendu d’ind’è u psì. E siconde funu, « Ch’ellu ti ghjunghi u frusciu ! ». In unu annu, l’avia rimessu quattordeci volte l’appuntamentu, è avà, si dumandava perchè ch’ùn l’avia fatta torna. Era a so mamma à avè lu intargatu tantu à andà à cunsultà. À circà da duve li vinianu i so prublemi, e so angosce, ‘ssu mal’esse chì l’impastughjava.

Avia 33 anni è stava sempre cù a so mamma. Ùn travagliava micca o travagliava troppu. Tuttu hè affare di puntu di vista. Mistieri n’avia fattu centu, ma ùn ghjugnia à sceglie ne unu è tenesi. S’induvinava supitu u so gustu per a robba bona. A so ciccia, crisciuta à rombu di coppe, lonzi è figatellu li dava, vardendu lu di tagliu, qualchì sumiglia cù una donna incinta. Magnà era a sola cosa ch’ellu ùn si scurdava mai di fà, ch’ellu ùn ricusava mai di fà. U zuccaru li piacia dinù. Soprattuttu e pastizzerie, quelle imbuffate di crema è fasciate di butiru.

Dopu à una mez’ora di discursata cù quellu duttore, a sintenza era cascata.

« Prucrastinate o Antò, prucrastinate…
- Cumu a prustatta ? À a mio età, aghju avè i prublemi di prustatta ?
- Ha, ha, ha… Innò micca a prustatta o scimò. PRU CRA STI NA ZIONE. Hè una tindenza pattologica à rimette ogni cosa à fà à u lindumane.
- … ?
- Vole dì ch'è vo site incapace à risolve supitu un prublemu, ancu chjucu chjucu. Chè vo ùn sapete dì nò à nimu ma ch'è vo ùn fate mai ciò chè vo prumittite. Vene sicuramente di a vostra zitellina, ci avete campatu qualcosa chì v’hà svultulatu. Ci hè dinù u fattu chè vo stiate sempre cù a vostra mamma, palesa chì ùn ete ancu scioltu u vostru cumplessu d’Œdipe. Ete sempre ‘ssa voglia incuscente di fà l’amore cù ella.
- … ?
- Ùn hè micca grave, ci vole solu à pigliavvi in manu, à fà scelte chjare, piglià decisione ferme è mettele in ballu à a siconda. Eccu face 200 eurò. À a simana chì vene… ».

Antone stava imbasgialitu, ùn sapia più ne avanzà ne rinculà. Centu pinsate assaltavanu u so spiritu. « Ma chì hè ‘ssu trecciu di tuntie ? Un duttore, spezialistu di u ciarbellu chì mi parla di a mio prustatta, di a NAZIONE, chì dice c’o vogliu chjavammi ùn socu chì tippu…Puttana ceca ! A simana chì vene li sciapparaghju tutti i so denti à ‘ssu carnavale ! Iè, a simana chì vene u pigliaraghju per u cullettu è mi ne pagaraghju per 200 eurò. ».

Avia fattu qualchì passu eppo s’era firmatu torna. A so faccia era cambiata, strignia e manselle è u so lapru suttanu tuccava guasi u so nasu. S’era vultatu è viaghjava torna à via di u purtone di u casale, capinanzu, strufinendusi e mani. Avia cullatu e scale quattru à quattru è avia apartu a porta senza pichjà ne sunà. U psì era à pusà à u so scagnu, sicuramente in traccia di scrive qualchì varia à nant’à ellu. Avia addirizzatu à Antone un surisu interrugativu. Si vidianu tutti i so denti, forse un addiu ? Avia sarratu a porta à chjave è s’avvicinava. A dicisione era ferma, ferma è l’avia da mette in opara supitu, supitu.
Iè Antone prucrastineghja ma mancu troppu…

Moltu bene o Tittolu.
Incù stu testu, t'aghju inditificatu.

propriu bè ! m'ha fattu ride !


ma aghju una dumanda, ci hè una parolla ch'ùn aghju capita. Forse mi pudete aiutà è traduce, pensu avè capitu u sensu ma ne vogliu esse certa. Hè a parolla "intargatu " terza linea.


à ringrazià vi

Intargà.

per mè ci hè un'idea di dumandà qualcosa parechje volte... cù insistenza

noi a dimu per un zitellu per esempiu, s'ellu ùn sà ancu parlà, è ch'ellu vole ottene qualcosa, tandu v'intarga.

in francese traduceria incù solliciter

devesse una cuntrazzione d'intarrugà.

eccu o Ghjaseppa.

ma u megliu hè di dumandà à Tittolu postu ch'ellu hè ellu chì hà scrittu (s'ellu un prucrastineghja micca troppu... )

Li docu u listessu sensu (mancu ùn possu andà contru à i prufessori), "solliciter" o forse "inciter" eccu ciò ch'ella amenta per mè 'ssa parolla.

È postu ch'ella vi piace...



« UN ASSASSINU » (Antone vicinu à a ritirata)

Pàààà ! U cannone di a pistola avia stupatu una palla. Quantu li ci vularia à andà à sfragillà u capu di l’omu stracquatu in pianu ? Mancu una meza siconda. Purtantu, era sempre a listessa impressione per Antone. Li si paria chì ‘ssa stonda ùn ne finia più, ch’ella durava ore sane. Ogni volta u so spiritu si n’andava per e selve salvatiche di u ricordu. N’avia tiratu palle, sfragillatu capi. N’avia vistu facce sfatte da a pena, a paura, u tarrore ancu. U cunniscia bè ‘ssu sguardu ch’omu hà quand’ellu capisce chì l’ultima meza siconda hè vinuta. E turnava à vede tutte ‘sse facce, sane sane. E sintia e so chjame à a pietà. Avaria ancu vulsutu cede à a cumpassione ma, era sempre troppu tardi. A palla andava è nulla ùn la pudia più parà.

Antone era ciò chì si pò chjamà « un prufeziunale di a morte ». Micca unu di quelli chì v’accumpagna quandu stalva una strage nu a famiglia. Piuttostu unu chì face nasce a strage. Era, cumu si pò dì ? Un assassinu. Micca un assassinu d’occasione chì tomba mossu da l’ira o da a vindetta. Unu di mistieru, unu chì tomba nant’à cummanda. È, torna ‘ssa volta rigalava a morte à una parsona incunnisciuta per ragione chì ùn l’interessavanu mancu à pena.
Ùn c’era cà duie cose à mutivà à Antone. U soldu, chì si facia pagà bellu caru. È, ùn la vulia palisà ma era più cà vera, un tamantu bisestu di putere. Avè dirittu di vita o di morte li si paria a più maiò materialisazione di a putenza d’un omu. Si pigliava forse per qualchì diu o per qualchì guerrieru in missione divina. U so solu pinseru era chì, tuttu contu fattu, u so putere di vita ùn l’avia mai adupratu. È, ‘ssa volta dinù, era troppu tardi per falla. A palla avviava a so strada.

Ogni volta u prucessu era u stessu. Un annunziu nu u giurnale di u gennaru : « Aghju un prunu sottu à u pede, quale hè chì u mi pò caccià ? ». È rispundia : « Eiu, s’è v’avete ciò chì ci vole...». Ciò chì ci vulia, eranu i soldi sicuramente. I so prezzi cambiavanu sicondu l’oggettivu. Cambiavanu soprattuttu sicondu l’età di quellu chì ci vulia à « fà passà ». Più era vechju è menu era caru. Li si paria chì era una manera di cumprà l’anni chì firmavanu à campà, in teuria, à a vittima. S’arricurdava d’avè « fattu passà » per nulla, un vichjettu di cent’è trè anni. I so eredi, impacenti di mette e mani à a lascita, avianu forse pinsatu ch’ellu era immurtale. Li piacia veramente ss’idea d’avè dicisu ellu d’una morte chì pudia accade d’una siconda à l’altra.

Eranu avà quarant’anni ch’ellu facia quessa. È, dapoi qualchì tempu s’interrugava. Quella mane, nanzu di parte, avia passatu una bella stonda à circà i so spichjetti. Senza elli avà ùn ci vidia più chjaru. S’arrabbiava, chì u scimia in veru d’ùn arricurdassi più di certi affari. Truvenduli, nant’à u so capu, s’era dettu in sè stessu : « saria forse ora di piantà ? ». Ma, sta mane ùn pudia, avia un cuntrattu à compie. Antone, rispittava sempre i cuntratti, Antone ùn si sbagliava mai, ùn era mai in ritardi, mai in avanzu. « A morte hè sempre à l’ora » ripitia ridichjulendu.
Un caffè, una tartina è era falatu in carrughju à chjappà u carru da ghjugne à u locu insignatu da u cliente. Rimittia in ordine e so cunsigne. « Un omu d’una cinquantina d’anni, capelli grisgiu, à bastanza grande, d’andatura spurtiva. Eppo, u cunnisciarete à i so vistiti. Ogni luni si mette una vesta gialla, un pantalone neru è una camisgia turchina ». Antone pinsava chì, nulla cà per quessa si mirdava di more quessu.
Ùn circava mai à avè di più ditaglii nant’à i so cuntratti. Freferia imaginà e ragione chì ponu puntà una parsona à vulè a morte d’un antra. Sapia chì, per u più, erani affari di nulla, una donna inghjuliata, un maritu sbagliatu o un nipote ingordu. Ma li piacia à invintassi cumpulotti neri è cumplicati à un nivellu internaziunale. È li piacia ancu di più à pinsà ch’ellu c’era per qualcosa nu ‘ss’affari tremendi ch’ùn esistenu cà nu i libbri.

Aspittava, fighjava l’ora à ogni minuta, li scappava a pacenza. Torna una volta ci vidia un segnu. A pacenza era a prima qualità in u so mistieru. “Nanzu ùn hè ancu è dopu ùn hè più.” “Saria forse ora di piantà” di dicia torna.
“Dunque, vesta turchina, pantalone ne...Puttana vercia ! Vesta gialla, pantalone verde…Una merda ! ». Principiava à anarvassi quandu era surtitu l’omu da u purtone. « Mì lu ! Vesta gialla, pantalone neru è camisgia verde ». A s’avia ripituta trè o quattru volte in sè. « Vesta gialla, pantalone neru, camisgia verde ». S’era stipatu appressu. Cinquanta metri più luntanu, in una stretta scura è diserta, l’avia fattu una voce. L’omu s’era vultatu è avia supitu vistu a pistola. Dopu à una siconda di suspresa s’era messu à piinghjulà. Avia sicuramente una anima fosca fosca quessu per ùn dumandà mancu quale era è perchè chì u minacciava. S’era stracquatu in pianu è mittia e so mani in d’avanti. « L’hai da parà cù e to mani a palla ? O imbecillò ! » Avia pinstu Antone mentre ch’ellu appughjava nant’à u tichjettu di a pistola. A palla si n’andava à sfragillà un capu di più. Per Antone era torna u mumentu di vede sfilà tutte e facce sfurmate ch’ellu avia scontru longu à a so carriera. Tutte, à sin’à quessa ch’ellu s’appruntava à stampà in a so mente, cum’è un butteiaghju acconcia e cunserve nant’à un parastasgiu. « Eccu, vesta gialla, pantalone neru, camisgia turchi... Puttana gobba, vercia è zoppa ! Hè in veru ora di piantà ».

ma .............

Allora ùn aghju capitu

anima fosca fosca ?

vercia è zoppa ?

sfracillà ? = éclater ?

un ringraziu

Fosca : scura, nera...

Vercia : chì li manca un ochju

Zoppa : scianca

Sfracillà : schiattà iè, scimpià, strughje...

Eccu

L’ ULTIMA SBORGNA (Antone à a messa)


Buuuuù, chì sborgna ! N’aghju pigliatu d’altre...Ma questa quì vale dece. O u mio capu... Mi si pare ch’elli ci facenu u tunnellu di Vizzavona nentru. Sta volta basta era l’ultima, hè detta. Ci vole à dì chì dece anni di matrimoniu si fistighjeghjanu, ùn sò micca nulla. A c’emu fatta in casa. Eiu, a mio moglia è Francescu u mio amicu di sempre. A mio moglia, Faustina, Tittina cum’è a chjamu eiu. Bella, dolce, intelligente. Sempre pumpunata chì m’ete capitu… Ùn hè cà per quellu affare ch’ùn hè cusì passiunata. Ma, chì vulete fà ? A perfezzione po, ùn hè di stu mondu. È Francescu, u mio amicacciu. Trent’anni ch’è ci cunniscimu. Intelligente ancu ellu, cultivatu, spurtivu è bellu zitellu. Ùn capiscu micca ch’ellu sia sempre solu. Ùn u vecu mai cù una donna. L’ultima volta ch’o l’aghju vistu fraquintà era per u mio matrimoniu. È ancu, quella sera a zitella si n’era andata azeza, azeza. D’appressu à mè era appena tagliata à a longa chì, nanzu di parte m’avia murmutulatu ùn sò chì futichja nant’à a fideltà strignendumi e mani forte. M’avia fattu ancu male sta scimaticone.
Buuuuù chì sborgna ! L’ultima ! Mai più ùn tuccaraghju un vichjeru d’alcollu. Soprattuttu più sta bienda strana ch’ellu m’hà fattu beie Francescu arisera. Bona era ma avà ch’hè avà sò incapace à dì s’è dormu sempre o s’è sunnieghju. E sintite ste voce ? À mè mi pare di sente cantà. Chì dicenu ? « Libera me, Domine, di morte eterna ». Ci vole ch’o m’arrizzi. Uuuuuù, aghju minatu di capu. Cant’à mè dormu sempre. È torna sta messa « Requiem … » Buuuuù chì sborgna !
Francescu sì chì tene più cà mè, aghju u ricordu annibbiatu di vedelu surride vardendu mi parte dopu à u terzu vichjeru di a so bienda. Francescu, cum’ellu hè bravu. Hè sempre quì quandu aghju bisognu. Ci vole à dì chì u tempu l’hà. Hè simplice, ùn face nulla. Ùn hà micca bisognu di travaglià chì u babbone l’hà lasciatu una furtuna. Quantunque, si deve annuià appinuccia. U so passa tempu preferitu hè di trascinà a mio moglia. A porta à diritta è à manca, è à quella li piace à girà e sette chjappelle. Ùn hà mai avutu u so permessu, a corcia. Allora Francescu a porta cù a so vittura rossa. Cum’ella hè bella sta vittura, ma cum’ella hè rossa.
Buuuù chì sborgna ! Avà mi sentu pisatu, è l’affare vuguleghja, mi si pare d’esse n’un battellu. Aghju da rende sicura, sicura. Ci vole ch’o m’arrizzi. Durmaraghju o micca ? Aghju da pisà una anca. Pianu, pianu. Uuuuuù, aghju minatu di dinochju. Ùn face micca male chì mi pare di minà n’un affare solfice ma quantunque, pocu sunniacciu. Hè quant'è ch’o fussi chjosu in una scatula. Oimè, avà pigliu a falata, stu colpu rendu. È torna canti, avà mi si pare chì l’affare sia in francese « Sur le seuil de sa maison, notre père t’attend ». È cantanu è cantanu… Buuuuuù chì sborgna !
Avà sentu un rimore stranu è regulare, pfuuù, pfuuuù, pfuuuù… È e voce si spegnenu pocu à pocu… Buuuuù chì sborgna …. L’ultima hè detta….

Tittolu a écrit:

Bella, dolce, intelligente...

mi chì parli torna di mè :suspect:
ti lasciu fà per aghjustà ste dolce parolle à a mo presentazione...

petra alta a écrit:

Tittolu a écrit:

Bella, dolce, intelligente...

mi chì parli torna di mè :suspect:
ti lasciu fà per aghjustà ste dolce parolle à a mo presentazione...

Sicura o Tittina...

Hummmmm mi pare chì l'affari viaghjanu ben tra di noi...t'invitu à meziornu, pripargu tuttu ùn t'inchietà, artichjocchi è maionesa (cf. Ruclì)

petra alta a écrit:

Hummmmm mi pare chì l'affari viaghjanu ben tra di noi...t'invitu à meziornu, pripargu tuttu ùn t'inchietà, artichjocchi è maionesa (cf. Ruclì)

Certi inviti... lascemu corre, u tuttu hè ch'ell'ùn ci sia bolognese :affraid:

Tittolu a écrit:

Certi inviti... lascemu corre, u tuttu hè ch'ell'ùn ci sia bolognese :affraid:

T'abbracciu...forte...è ti rammentu chì in furiani ci hè un bellu Quick...