Ci emu da perde à Sidussinchi

Unu si  stà sempre piattu
L'altru si  stà  sempre zittu
Ùn sò  ciò  ch'e li aghju fattu
S'aghju cummessu un dilittu
Ma emu da perde à  Sidusincu
È  dinù  à Caparrittu

U prima ùn  hè più dispostu 
À fà  a cunversazione
Nanzu passava à  u postu
Ricitava  e so canzone
Ma avà u  nostru  amicu
Passa  à a televisione

U sicondu ci hà  cappiatu
Per passà u so cappessu
Avà ch'ellu l'hà pigliatu
Ùn pare più u listessu
Cusì dopu à  Sidussincu
À  Caparrittu emu persu

O lu to chjam'è rispondi
Hà da turnà à l'accorta
Scusarei la mio musa
S'ella ghjè appena scorta
Ma stasera sò per Baccu
E n'aghju pienu lu saccu !

Dunque è vera ciò ch'e  dicia
Anzora in lu mio  terzettu
Ùn canti più in puesia
Dipoi u  to "Par un dettu"
L'affare ti colla in  capu
O ch'è tù scia maladettu

Ma guardate stu furdanu
Cun  mè  ùn impruviseghja
Mancu mi tocca a manu
Mancu si licinzieghja
Soca hè andatu ind'è Leca
Cun ellu hà  da  fà  a  veghja

lighjendu e vostre chjame
ùn ci vole ch'e m'ascondi
trè mesi di revisione
o zitè sò stati longhi
avà chì simu culleghi
hè ora ch'e vi rispondi

O Caparittu mi pare
Ch'è tù pigli i paesi
Chì ai dettu un affare
Di quelli chì sò difesi
Per avè u to cuncorsu
Ti ci hè vulsutu trè mesi?

L'altri forse ti cridaranu
Eiu ùn crelgu ciò ch'e leghju
Tù è u to paisanu
Unu hè male è l'altru hè peghju
Li ci volse più d'un annu
Perch'ellu diventi agregiu

quant'ellu ti piacerà
a stuzzicà u vispaghju
sò statu chjosu trè mesi
aprile ghjugnu è po maghju
avale s'è t'ùn mi credi
poca primura ne aghju

Salutata à a lestra prima di scappà torna per "omu è donna:
Bravu ! à tè ò Francè...!

Francati parlatu è scrittu
cù e so palme à cullane
scavestrata è struita
a musa s’appuppa à a vita,
ti chjamanu e campane
oramaì CapessuArrittu !

Caparrittu a écrit:

quant'ellu ti piacerà
a stuzzicà u vispaghju
sò statu chjosu trè mesi
aprile ghjugnu è po maghju
avale s'è t'ùn mi credi
poca primura ne aghju

Trè mesi di rivisione
Sò troppu pè un cappessu
È saparè chì Circione
Una simana ci hà messu
Ùn hà rivisatu tantu
Puru l'hà chjappu listessu

Ci emu persu à Caparrittu
Di noi si stà luntanu
Sidussincu si stà zittu
Di chjamallu saria in guanu
Ch'elli sgianu maladetti
L'agregiu è u cappessianu

sidussincu è caparrittu
godenu appen'di riposu
cum'hè ch'è tù maladici
dui insignanti à l'ascosu
diplumati tramindui
fà chì saristi ghjilosu