Chì pesa l'anca perde a p(l)anca...

Erbaghju a écrit:

Hè sicura chì cù u travagliu chì tù faci tù, ci poi stà ancu tutta a santa ghjurnata davant'à l'urdinatore!!

Ti  rispundaraghju sempre  
Cum'è  aghju  sempre rispostu
In  Aiacciu vogliu rientre
À  stà  quì ùn  sò più  dispostu
Eppo'  aghju indu l'idea
Di dumandà u  to postu   

I mio versi l'ai intesi
Dunque  allora  ùn pisà l'anca!
Si sà  chì s'è  tù  a pesi
perdi  subitu  a panca...
È u to postu in merria
'Ci  chì  hè  una  bella planca  

L'affare chì tù mi dici
Avà m'arreca i pinseri
Chì a sai pane è parnici
Ùn ne parlu vulinteri
Ma avà chì tù traparli
L'hà da sapè ancu u Merri

Galerianu ùn sò di razza
Ma u pane hè stantatu
Ma accant'à a to piazza
Eiu stò cum'è un dannatu
Chì sè pagatu un mese
Par un ghjornu travagliatu

avia troppu travagliu   
Subitu ùn aghju rispostu
Ma a sò chì ùn mi sbagliu
S'e dumandu u to postu
A prova hè chì à cappiallu
Vecu ch'è tù ùn sè dispostu...

U to talentu u cunnoscu
Sè un bonu funziunariu
D'avè calchì omu in più
Prestu sarà nicissariu
Falla puru in Aiacciu
Farè u me sicritariu

Hè un mistieru di donna
Quellu di a sicritaria
O Erbà per la madonna
A to musa m'hè cuntraria
Mettami à u currieru
Cusì possu piglià l'aria

Soca parlendu cusì
Credi d'esse u più malignu
Ma pigliarè ciò ch'hè datu
Ancu essendu balaninu
Sì t'ùn faci u sicritariu
Farè solu u spazzinu

À  mè  mi  và u  spazzinu
S'e sò in l'ecchippa di  ghjornu
Tandu  à l'usu  aiaccinu
Mi chjamaranu  "caiornu"
O  Erbà  m'ai cunvintu
Dumane  facciu ritornu  

Sai fà i to affari
Cù spirtezza è ghjudiziu
Mancu ùn sè ancu spazzinu
Chì digià ne ai u viziu
Cappia puru a to spazza
T'aghju à tene in u sirviziu

Vogliu esse u to impiicatu
Mettami à u currieru
Eiu ùn possu stà sarratu
Chì mi ghjugne l'addisperu
Ùn ti ne pintarè mai
È ne sarè ancu fieru

Una vita à u currieru
O Circiò tintu di tè
S'e' t'inviti in Aiacciu
È par fatti assai bè
Incù noscu e to ghjurnate
E passarè in caffè

A sò chì a a merria
Ùn simu micca à l'usina
Osinnò ùn dumandaria
Sta mutazione aiaccina
U caffè u pigliaremu
Ma micca à a mascina

Di u caffè di a mascina
Ùn sò tantu amatore
Chì di più sempre mi piace
Quellu di u parcolatore
Chì ogni ghjornu in tarrazza
Ci stò da ottu ore à cinque ore

Avia e copie  à currege
Ùn  ti  pudia  risponde
Chì n'avia  centu è  dece
Ed eiu ùn  travagliu  à stonde
È da l'avà e ghjurnate
Ùn sò abbastanza longhe

Ùn hè micca una risata
Di currege tante copie
Tù sè sempre in pruminata
In merria sott'à isse loghje
Da à mascina à caffè
À quella di e fotocopie

Tù mi pari o Circiò
Un omu assai asgiatu
Guarda bè chì luni à mane
T'aghju tantu aspittatu
Cusì ùn sè ancu à ghjunghje
Chì ghjà t'aghju licenziatu

Prufitta puru o Erbaghju
Pigliati pè u patrone
Eiu intantu aspittaraghju
E prossime elezzione
S'ellu passa Marcangeli
Ci anu da esse e mutazione   

Ti dicu à voce rivolta
Ch'ùn sò statu "pistunatu"
Allora di l'alizzione
Ùn sò tantu primuratu
Ch'ella sia l'unu o l'altru
U postu hè assicuratu

Ma qual'hè chì  ti  hà  parlatu
O Erbaghju di "pistone"
Aghju solu mintuvatu
E prossime elezzione
Ma per  esse più  tranquillu
Fà  puru  e pricurazione!