Felice Travaglini

In Mediterraniu


In mediterraniu quant'ella era sola
Strada ùn ne sapia chè una
Si cuntava sempre a listessa fola
Era à pienghje sempre sfurtuna

U s'avvene quì era cum'è chjosu
Avvene per ella ùn ci n'era
Locu di silenziu locu di riposu
Messa detta è fatta prighera

È poi una mane addiu galera
S'hè vulsuta arritta in stu mare
Quantu l'hè custata a so discitera
Lacrime di sangue è di sale

Sì di a so memoria alza le bandere
Fida à a so storia passata
A dice dinù in ciò ch'ella crede
Più fraterna l'avvicinata

In mediterraniu oghje ùn hè più sola
S'aprenu e strade più belle
Cresce a sperenza d'una vita nova
D'isule in cullana è surelle

G.T. Rocchi / Felì Travaglini

Golu

Monte Cintu mi dà è friscura è purezza
Falgu salti saltendu da teppa à cutalone
Sò u fiume sò Golu di fole è di passione
Ma pocu à tè ti preme o Senna à tè fiumone

Trà sciappali è strittoni sboccu in la scala santa
Quassù l'altagna in volu quaiò a pescia lesta
Ci si colla in Niolu à pregà o fà festa
Ma pocu à tè ti preme o Senna a mo gesta

I mo ponti in un tempu Ponte Altu è Ponte Novu
Purtavanu i passi di i mo figliuloni
I toi ci sò ghjunti cun fucili è cannoni
Ma pocu à tè ti preme sò ne portu u dolu

E meie e fiumare sbarsanu u so lagnu
In una foce turchina mare mediterraniu
Ci si pesa u sole cum'è à u primu ghjornu
Ma pocu à tè ti preme o Senna u mo sonniu

U mo sonniu di corre da Monte Cintu à mare
Cantendu a canzone di chì m'hà fattu fiume
S'ellu ci hè un dumane di pace à meze scume
Parlà ne inseme o Senna parlà ne fiume à fiume

G.T. Rocchi/ Felice Travaglini

Pare eri

A carta s'hè ingiallita
Appinuccia stracciata
Ma a fiura hè pulita
U tempu l'hà salvata
Seranu quarant'anni
Un pare mancu vera
Guarda i nostri panni
Tandu chì moda era?

Pare eri...

Una duie è po trè
Sfilanu centu stonde
Iè mi ricordu bè
E nostre chjome bionde
Inseme à batte lochi
Sempre cusì vicina
Era di mille fochi
A nostra zitellina

Pare eri...

Oghje chì bellu ghjornu
Una manu ti piglia
Vi simu tutti intornu
S'ingranda a famiglia
Da u so paradisu
Quelli chì ùn sò più quì
Anch'elli in un surisu
Vi dicenu di sì

A carta s'hè ingiallita
Appinuccia stracciata
Sicura chì a vita
Cum'è noi hè cambiata
Ma tutti latu à latu
Era quessu u pattu
Ma dì mi stu ritrattu
Sai quale l'hà fattu?
Pare eri...

F Travaglini

Hè una di e mo preferite di st'ultimu dischettu!

Isulanu a écrit:

Hè una di e mo preferite di st'ultimu dischettu!

Iè,hè magnifica!!L'hà scritta per a so surella è cantata u ghjornu di u so matrimoniu!

Allora si capisce.
Hè quandu u core si scatena ch'e l'arte pueticu hè u più putente.