Lamentu di u banditu Spada

Di nome Andria
E Spada di casata
Natu in Aiacciu
Di famiglia stimata
Fù lu tredeci di ghjennaghju
Chì ghjurnata ghjastimata

Gavinu hè babbu
Di Sardegna un mudellu
Bastianu Spada
Quessu hè u mio fratellu
Cun i travaglii in furesta
Empiamu case è bursellu

Anna Maria
Hè a mio mammarella
Brava è fattiva
Dolce cum'è un'agnella
Mi dete boni cunsiglii
Ma fatale era a stella

Fù per Rutili
A tortu ammanittatu
Tiraii addossu
Cum'è un'addisperatu
Quandu i giandarmi casconu
Rutili fù liberatu

O quandu in Chiatra
Mi ricordu una sera
Cun Antonelli
Cusì brutta manera
Tiraiamu in una buttega
Sin'à viota a carchera

Un'altra volta
A u Poghju-Mezana
Torna Antonelli
Ma chì cosa strana
Ne fecemu un tal'sterminu
Da fà pienghje a campana

Quandu in Arbori
Mi ferì in un ballu
Ghjuvan Vitu Ricci
Mi purtò à cavallu
E mi currò mesi sani
Cun sapia cumu pacallu

In u mentre vense
A vittura pustale
Cum'è casticu
Un ci pudia esse oguale
Culà truvai l'abissu
A surgente d'ogni male

U più ch'eo mi pentu
Mi ne mordu lu ditu
Hè d'avè tombu
A Ricci Ghjuvan'Vitu
Ellu m'avia salvatu
Eo, ingratu l'aghju traditu

M'avessi tombu
Maria Caviglioli
Quandu di bastone
Mi minò soli à soli
Un averia suminatu
In Corsica tanti doli

Tredeci volti
Sò statu criminale
E tutte scritte
A u grande tribunale
Ne contanu dece morti
E un feritu murtale

Un cunnoscu micca l'autore, è l'aghju scritta di capu, dunque s'elle mancanu e strufate, mettitele puru.

Vistu a vostra memoria so persuasu che vo site forse in pussessu mentale di U Lamentu Di Romanetti, babbu u mi cantava quand ell era di stu mondu . Ma mi ne scudatu e mi vene a mente solla sa strufata : quandu Calcatoghju ride, ride tutta la Cinarca . Mi fariate un gran piace se vo pudesite , se voi u cunniscite, publica nantu a stu foru stu lamentu .

Salute, ci n'hè unu nu u libru di Roccu Multedo, "Muzarettu di a Grossa", publicatu da a Stamperia Sammarcelli. Dà dui lamenti cumposti da Ghjuvan Paulu Codaccioni di Pruprià (chì scrivia nu a Muvra), unu per Muzarettu, è unu per Romanetti. Hè abbastanza longu ssu lamentu, ma ùn vecu micca a strufata amintata. Forse ùn hè micca listessu. U principiu hè cusì :

Sò Romanetti
Banditu rinumatu
Cun ragione
Aghju sempre tumbatu
E nùn si trova impusturi
In tuttu lu me passatu
In qualunque circustanza
Mi sò sempri ben purtatu.

Mettu quì u principiu di qualchì strufata :

Da l'Aiaccini quantu n'era stimatu...

Bravu cun tutti, è senza tradimentu...

Onestamenti, facia li me affari...

Era banditu, ma colmu di rispettu...

Quandu sò ghjuntu, mortu da la furesta...

Di li me atti, ne pudeti stà fieri...

Etc.

Hè bellu di vede ste puesie scritte cun talentu, ma ùn ci vole micca scurdàssi ch'e ne Romanetti ne Spada ùn eranu omi bè.

L'avaria messa tutta, ma ciò ch'ammanca hè u tempu !!

Avà sò ghjuntu in Corsica per e vacanze, ma ùn aghju micca pigliatu u libru. D'altronde quessu si trova faciule, micca cum'è certi libri di a Stamperia Sammarcelli chì sò esauriti.