Scritti imposti

Era un vinti quatru di dicembre cum’e l’altri in a pieva di Mirvella. O guasgi, chì questa volta, era ora di a vindetta. U Culunellu di Vinciguerra è eiu stessu, dopu à avè lettu a Gazetta è i so articuli tremendi per dinuncià l’infamia riprisentata da Babbu Natale, stu simbolu orribile di a gioia zitellina è di u benestà, nemicu murtale di Mirvella. Deviamu fà vindetta, deviamu fà colpu sicuru, ma prestu, chì eramu aspettati à a Taverna da qualche burdane à sangue caldu…

Era propiu simplice u nostru pianu d’azzione : aviamu amparatu, da un infurmatore sicuru ch’e Babbu Natale, ben ch’e à bastanza intelligente per ùn vene à Mirvella, passava quantunque per a pieva d’Isula, quella pieva a più vicina di noi, per currompe a ghjuventù isulana à colpi di rigali. Noi altri mirvellaccii ùn pudiamu micca lascià accade una cose simile ! Deviamu lottà contr’à stu schifosu simbolu !

Eramu partuti di bon’ora da u Borgu Supranu per mettecci in posta. Dopu à parechje ore di viaghju à cavallu nantu à e strade di sta pieve duve a mudernità ùn era ancu ghjunta, ghjunghjiimu infine à a fruntera di e duie pieve, a catena muntagnosa di i Monti di l’Ombra.

Quallà, dopu à avè francatu a dugana senza nisun straziu, per via d’un lascià-passà firmatu da a manu di u Cavaglieru ellu stessu, è dopu francate l’ultimi passaghji sicretti in a muntagna, eramu infine fora di e fruntere tarrituriale di Mirvella, in a pieva d’Isula !

U locu paria assumigliàssi assai à cio chì esistia ind’è noi, e stesse case, e stesse fureste, e stesse strade, ma in fatti, tuttu era sfarente quì. A ghjente, i so usi, a so manera di campà, di pensà, ancu l’aria. Mi paria da veru d’esse in un altru paese chì tenia dinù i so dilletti, ma un paese sfarente quantunque.
Tempi fà, un connu avia dettu ch’e a Corsica era a più vicina di l’isule luntane di a Francia, è oghje, eiu vi possu assicurà ch’e Isula hè a più vicina di e pieve luntane di Mirvella ! Vi pare straniu, ma chì vi pò fà ?
Vicinu à noi, era un paesolu fruntalieru, da u quale ùn cuniscia u nome esattu. Un paesolu duve campavanu omi è donne di gran valore, colmi di qualità, ch’ùn avianu paura di nunda, fora – podasse – di Mirvella ! Un paesolu simpaticu, duve stavanu omi curaghjosi quasi Mirvellaccii per certi, ma sopra tuttu, un paesolu duve campavanu dinù zitelli, è dunque, per disgrazia, vittime putenziale di u nostru Nemicu Publicu Numaru Unu, Babbu Natale ! L’orribile corruttore di i zitelli ! Quelli chì i facia crede ch’e a vita era o devia esse gioiosa è carca di rigali, rendendulli irrispunsevuli per a seguita di a so vita. L’infamu !

Ma ùn eramu venuti culà per chjachjarà, ma per battessi. È prestu ci mettimu in posta per l’assaltu. Aviamu sceltu a casa a più vicina di noi, duve campava una famiglia, è ci spartimu u travagliu. Eiu, u più sgualtru di i dui, era cullatu nant’à u tettu per surveglià a venuta di u vechju barbutu perversu, un fucile in manu, mentre chì u Culunellu s’era messu davanti à a porta di a casa, per impediscellu di scappà per quì.
Eramu pronti à fàlli a pelle !


Duie ore dopu, duie ore d’aspettanza in u fretu di a nuttata è senza prununcià una parola tra di noi, infine, vedimu un strascinu vulente avvicinàssi. Era tiratu da quattru regine… scusate… quattru renne… è arrittu daretu à elle, si tenia un vechju barbutu, fieru, colmu d’albasgia, chì paria vulè abbraccià e so renne : Babbu Natale !

Ellu, ùn ci avia mancu vistu, ma noi, u pudiamu fighjulà da vicinu, fighjulà a so tencia sconcia da a perversità ch’ellu tenia in a so carre. U so sguardu falsu, u so bruttu surrisu ne pudianu testimunià.
In fatti, ùn era tantu vechju u meccu. D’altronde, ùn era mancu barbutu, chì ancu a so barba era di paccutiglià, appiccicata à a so faccia da una funicella.

À u cuntrariu di tuttu cio ch’elli pudianu pinsà centinaie di zitelli di u mondu chì credianu in ellu, Babbu Natale ùn era micca stu vechju barbutu rassicurante assumigliendussi quasi à un caccaru benevulente, ma un ghjovannu impiastratu zoticu da u quale u scopu ùn era micca tantu di rigalà zitelli di u mondu interu in a gioia cummuna, ma solu di surveglià è tene un ochju particulare nant’à i so genitori currotti, grazie à un sistema degnu di quelli messi in piazza in 1984 di George Orwell ! Si passava cusì in i paesi ricchi mentre chì i ciuccii di i paesi povari, ben ch’elli ùn sianu micca più gattivi ch’e l’altri, ùn avianu mai nunda. Noi, in Mirvella, eramu i soli à sapè a verità !

Era ora di fà piantà sta sinistra cumedia !

Piattatu daretu à u caminu, aspettava ch’ellu s’avvicinessi di più per chjappàllu. Tuttu si passava d’incantu ; ùn m’avia mancu vistu, cusì sicuru di u so dirittu è di a so maestria, ùn si sfidava mancu più di i tetti.
Pò, quand’ellu fù sopr’à u caminu per lampàcci i rigali, mi lampaiu nant’à ellu per sturdulisce, à colpi di cazzotti. Ci battimu nant’à u tettu, in una scena d’antolugia degna di Matrix è ben ch’e u falsu vechju si diffendessi bè, fui eiu u più forte, è, in qualche minute, l’aviu summersu sott’à i mio colpi !
Triunfante, u lampaiu di u tettu, sempre incuscente, duv’ellu fù ricuparatu da u Culunellu chì u legò. Tandu, cun a fiertà di a missione compia, rientrimu in Mirvella incù u nostru prighjuneru.

Babbu Natale fù mandatu à u Cavaglieri per esse torturatu nanzu d’esse impalatu, in l’allegrezza generale, mentre chì a ricumpenza di u guerrieru ci aspettava tramindui in a Taverna di u Borgu incù e più belle puttane di u locu. Ma u più chì ci impremia, fora di sta ricumpenza, era a suddisfazzione di u duvere compiu.

Grazie à noi, ùn ci serà micca Natale quist’annu !
Grazie à noi, ùn ci serà mai più !!