Acquaviva Ghjuvan Pasquinu "Montepianu"

Visita à una malata


Pigliu la penna
Eppo à scrive mi mettu
In puesia
Dipignu stu sugettu
Di ùn esse più furtunatu
Di rime quantu rigrettu
Pè spiicà quella pustura
Di la bella ch'era in lettu

Collu le scale
È pichju à l'usciu chjosu
S'affaccò tandu
U sguardu luminosu
Dicendu "Cosa circate,
Amicu cusì pietosu ? "
"Cercu à vede la malata "
Subitamente risposu.

Mi disse allora
"Espressu quì venite,
Cù pena è dolu
À lu male currite ?
Soca voi la malata,
Di moltu la cunniscite ?
Aspittate ch'e la parli
Per dilli qual'è vo site "

Entrì in la stanza
È fece sta riclama :
" Ci s'hè lu Tale
Chì di vedeti brama
S'è tù lu voli riceve
S’hè prontu pè la to chjama "
Tandu da per mè sintiu :
" Diteli ch'ellu entri o mamma ! "

S'aprì d'un colpu
Di a stanza a sarratura
Entru è salutu
Cù tutta la primura
Eppo stesu la mio manu
À l'angelica figura
M'apparì guasi lu pientu
Videndu la so statura

Una tristezza
Mi mustrò quellu visu
Eiu pinsava
Culà tuttu indicisu
Ciò ch'ella era divintata
A santa di u paradisu
Ghjittava qualchì suspiru
Micca più u so surrisu

Cusì m'intesu
Allaccià lu mio core
Videndu soffre
Quellu limpidu fiore
U m'avaria chjappu eiu
Piuttostu lu so dulore
Ma quessa ùn pudia falla
Dicretu hè di u Signore

Di tantu in tantu
Lintava un tristu lagnu
Chì suminava
in mè vilenu pagnu
Tuttu pienu di pietai
Chì ùn truvaria cumpagnu
È dipoi stu disturbu
Ùn riposu più nè magnu

Era innundata
Di larme la so stanza
Quandu li dissu
D'ùn perde la spiranza
È ch’e li strinsu la manu
Priparendu la partanza
È sempre prichendu à Diu
Ch’ellu li purghjissi ascianza

A mi lasciaiu
Viva pè u mumentu
Eppoi partiu
Cù lu core scuntentu
Quelli suspiri languosi
Ghjittonu per mè spaventu
Durante lu mio caminu
Aghju vuciaratu è pientu



Ghjuvan Pasquinu Acquaviva , 1927.

Quandu annant’à Monte Cintu
Ci tagliaranu lu fenu
Ghjugnarà à traspurtallu
Un vagunettu di trenu
Tandu si chì cambiarà
U core ch’e portu in senu

Quandu in Golu è in Tavignani
Ùn ci hè più acqua da beie
I largi di Valduniellu
Lamparanu l’alimee
Tandu sì a mio culomba
Cambiaranu e mio idee

Quandi u capu à Gaviglia
Sarà suminatu à Linu
Ch’elli saranu carbusgi
I cardi di u Marzulinu
Tandu l’abandunaraghju
U mio parfume più finu

Quandu l’acelli per aria
Vularanu zenza piume
‘lla si possa turnà in vinu
Tutta l’acqua di u fiume
Tandu l’abbandunaraghju
U mio splundurente lume

Quandu e scope di u Falasorma
Ci daranu un fruttu degnu
Chì e ghjalline faranu
L’ove in chjoppulu di legnu
Tandu l’abbandunaraghju
U mio priziosu pegnu

Quandu lu paese sanu
Unitu di Calinzana
S’ascundarà s’ellu piove
Tuttu sottu à a campana
Tandu l’abbandunaraghju
A mio innurata cullana

Quandu di u scogliu nativu
Surtarà u latte puru
Di u zuccaru in tacchetti
Ne faranu case è muru
Ma d’abbandunatti o bella
Da l’avà ùn sò sicuru.

Ghjuvan Pasquinu Acquaviva 1927


eccu, què sò e prime...
forse e so più belle.

avia 17 anni.

Voceru à Maistrale

S’ellu ùn era l’autornu
Cù e pecure in figliera
Credi puru chì issu ghjornu
Anch’eiu in Aiacciu era
Avaria cunsulatu
Da u megliu ch’e pudia
Tuttu u to imparintatu
Di Marignana è u Sia

In piaghja cum’è in Niolu
U sonu di e to campane
Ci attrista è ci mette in dolu
Per parechje sittimane
Si spezza lu nostru core
D’avetti per sempre persu
L’usu di cantà si more
In corsu nun ci hè più versu

Cum’è una pianta malata
A lingua di u paese
L’aviamu abbandunata
Pè u parlatu francese
Ghjunsi da u cuntinente
È ne pigliasti primura
Cambiò tandu lu prisente
In favore à a natura

Trent’anni di la to vita
Li desti senza avarizia
À issa pianta riverdita
Tù li feci fà ghjustiza
Rimittendula in valore
In Corsica è da per tuttu
Li feci purtà u fiore
Li feci purtà u fruttu

Giravi di pede in pede
Senza mai esse fiaccu
È ci purtavi a fede
Tù cù u to Almanaccu
Per noi astri pasturelli
Chì bella devuzione
U ghjornu appressu à l’agnelli
Di cantà e to canzone

Certe di e to canzone
Mai più nun mureranu
D’altre generazione
Dopu à noi e canteranu
È fin chì lu Cuccu canta
Per ste valle sulitariu
Tutti l’anni per a Santa
Vulemu ditti un rusariu

Una statula in granitu
In più noi vulemu fatti
Ch’e possimu à l’infinitu
Ramintacci li to tratti
I to tratti di puetu
Pienu di sincerità
Chì sempre sirenu è chietu
Cantò per la libertà.