LOCHI È MONDU
Sarre di i mio lochi tracarche di billezza
Duve arburi è boschi nacquenu cù u mondu
Duve l'omu ùn hè più chè solu cù a so ombra
Duve stò per passà è duve mi ci affondu
Curone di sciappali è di zenne appinzate
Fatte à cripà e niule chì si danu à l'arrembu
Fatte à ingermà u sguardu chì passeghja à l'attrachju
È chì cerca l'uchjate di u so passatu zembu
Stese di u scogli è l'acque trà marosuli è notte
Chì vi purtate l'omu al di là di u so esse
Chì date à l'addisperu u pannu di e rivolte
È à tutte isse stonde una lega di tesse
Paisaggi sculpiti in la petra ritrosa
Chì nutrite l'intofule è i sonnii senza ansci
Site a sesta di un locu ch'o mi portu in e carne
È ch'o vecu di lacrime quandì a storia spatanscia.
Accueil 
