Eccu quì un pizzatellu di u rumanzu ch'o sò in traccia di scrive. Da mette vi in appitittu spergu...
Fideghju l’abissu, vecu a stesa turchina, mi voltu, fideghju a sarra, vecu a presa verde. Chì fà ? Lampammi in mare, attippà versu a bocca ? Sò solu. Innò, ci sò e pecure, m’avaria da bastà a so prisenza, tuttu contu fattu ùn sò cà un cane. Ma mi manca troppu u calore di l’omu, u focu internu di u patrone. Allora atteppu, corgu à l’insù, scegliu a vita, a spiranza, voltu u spinu à u turchinu è mirgu a bucculina quassù, quella chì m’hà da apre d’altri orizonti. Corgu, à l’omu mortu. Ci ghjungu, spatanscendu è sudendu, mi fermu una stonda, duve hè a sfarenza trà lampassi in l’altissimu vangone è francà ‘ssa bocca ? Duve mi purtaranu ‘ssi passi novi, ‘ssi passi pruibiti ? Viaghju pianu avà, acciuncatu da i mio rispiri, ci hè a corsa scema à fammi suffià in ‘ssa manera ma ci hè dinù u sintimentu stranu ch’o m’aghju da perde, a paura di a cosa incunnisciuta. M’avvicingu à passi lenti, u fiatu volta, m’avvicingu torna una cria, chjodu l’ochji è aspettu. Lasciu corre u mio pinsà caninu, ùn aghju e parolle per interrugà mi ma facciu sfilà e fiure ch’o imagineghju di truvà lampendu un sguardu à ‘sse cunfine nove. Vecu un altru elpale, un antru pozzu smisuratu è turchinu, di quelli ch’ùn si ponu francà, trimuleghju, aspettu in vanu u fiscu di u patrone chjamendu mi à riturnà. Ùn avia e parolle ma credu oghje, ch’o m’interrugava listessu, è s’ellu ùn ci era nulla di landi à u mio mondu ? Quattru passi torna, à a ceca. Una rispirazione tamanta è cappiu u mio sguardu, u lentu sfrinatu à scopre a verità. Ùn hè megliu ? À chì ghjova à lascià fà u sognu quandu a realità hè custì, pronta à esse accarizzata da l’ochji ? È infine apru l’ochji è vardu. Vecu, in l’alba chì nasce, un antru mondu, pudaria scrive ancu un antru universu tantu ch’ellu mi pare immensu ‘ssu paisaghju, tantu e so cunfine mi parenu luntanu, troppu luntanu per pudè le discrive bè. Cullette, pianure, torna cullette, un fiume è e so sponde chì u portanu à sin’à duve ùn possu fidighjà. Un fiume, era ellu ch’o sintia rughjà dopu chì u celu appia finitu di piengne, eranu e so piene à fà tamantu frombu. Falgu versu u mio distinu, à via di ‘ssu fiume chì m’accumpagnarà ora mai, chì sarà u mio guida in ‘ss’antru paradisu.
Ùn socu più quantu aghju viaghjatu, à quandu suvitava u filu di l’onda, à quandu pigliava appena d’altura per scopre d’altre loche. Ùn ne finia più ‘ssu mondu, à ogni bocca varcata scupria una antra vallechja eppo una antra bocca. Innò, ùn la socu più quantu n’aghju fattu passi nanzu di ghjugne duve a mio sorte s’avia da sbucinà, duve avia à avvintà u locu di a mio siconda nascita. Videte chì scemu, scemu ùn sò, aghju u mio filu, s’è aghju parlatu di prima nascita, hè chì ci ne statu una siconda ma ùn v’inchiitate, nascite ùn ci ne sarà cà duie.
Dopu à miraculi di colla è fala, di stonde à rent’à fiume è tant’altri passi persi à tichjà mi di lochi nuvelli, sò ghjuntu. Dicu sò ghjuntu senza altra pricisione chì cum’è ùn sapia mancu à pena duve andava, aghju sceltu ‘ssu pughjale ch’o vinia di scopre tandu, da esse u mio scopu. Era un suppu dillusu, scarpate à millaie per sbuccà in ‘ssu locu ch’ùn m’uffria nulla di particulare, vogliu dì nulla in più di ciò ch’avia digià, quallà in u mio mondu. Ciò ch’o bramava eiu era ‘ssu calore ch’ellu mi dava u Patrone, un sguardu d’affettu o puru un calciu, qualcosa chì a mio parte umana mi mughjava di circà. Avia bisognu di riposu, mi pisavanu l’anche, mi brusgiavanu l’ochji, dapoi ch’o caminava senza magnà nè dorme, u sole s’era pisatu parechje volte, u bughju s’era fattu parechje volte. A sola cosa ch’o m’era messu in corpu longu ‘ssu viaghju era l’acqua fresca di u fiume, fresca, chjara, bona, bunissima ma ùn valia quellu cusciottu di pecura chì u Patrone facia arrustisce à u focu è ch’ellu mi lampava dopu à avè mursicatu ancu ellu. Ma più cà a fame, m’accampava u sonnu è mi pigliò torna è sonnii ùn ne feci.
U sole vense torna à scaldà mi a fronte, stai nant’à u spinu à varda u celu, suvitava cù l’ochji un nulu solu solu è a so corsa andarina. Mi vense dinù l’idea di vultà ind’è mè, in ‘ssu locu biatu di i mio primi passi. M’arrizzai è pusai nant’à un monte chì ùn s’assumigliava à nulla ch’o cunniscia, in core mi ciriutulava a nustalgia di a mio petr’acellu, cusì maestosa. Una stonda, vultai u spinu à u distinu, à u mondu novu è vardai in daretu, mossu da u rimorsu d’avè abbandunatu tuttu ciò chì m’era caru, barattendu lu cù l’illusione, a chimera d’una vita nova. Feci qualchì passu à l’insù, cum’è pigliendu un pocu d’abbriu è dà mi fiatu per turnà à fà ‘ssu viaghjone à l’aringuarsciu. Circai u curagiu di scappà – ne ci vole qualchì volta per scappà – di lascià mi ‘ss’avvene incunnisciutu è vultà à i mio lochi, à a mio santissima pace. À l’asgiu u calore umanu, à spassu u bisognu d’esse fidighjatu cù u sguardu di l’affettu, à caternu u mondu novu ! Corsi u più in furia ch’o pudia, fughjendu ‘sse cunfine, corsi versu u sole, versu u pozzu turchinu da duve ellu scuppiava ogni mane accichendu mi è dendu mi tuttu u calore chì mi ci vulia. Corsi è cascai, minai di capu in pianu, a mio fronte basgiò qualchì petra è ne vensi incuscente. È fà è fà, sunniai torna. Sentii e petre scumudate da una scarpata pisia, sintii un ansciu à nant’à a mio faccia, una ombra passà sopra à mè, dui bracci ingutuppà mi è mi parsi di vulà.
Accueil 
)