Leca Petru Santu

Petru Santu Leca d'Arbori (1879-1951)



Ninni nanna (Sottu à lu ponte)

Sottu à lu ponte ci luce la luna...
È stelle in celu ùn ne manca manc'una,
Dormi.

In li castagni si lagna lu ventu,
U nostru lume sarà prestu spentu,
Dormi.

Ind'una casa - ma quale sarà ! -
Batte lu stacciu è si sente cantà,
Dormi.

U ghjattu maiò s'alliscia u mustacciu,
Pianta la voce, si cheta lu stacciu.
Dormi.

Un ghjacaru abbaghja, una sgiotta bela.
S'empie la stanza d'adoru di mela.
Dormi.

Dumane andaremu à la vigna, induva
I fichi sò dolci è matura l'uva.
Dormi.

Sò cinque mesi ch'è no semu sole,
A guerra hà pigliatu i babbi à e figliole.
Dormi.

Mi frighje lu core, ùn ne possu più,
Lascia pienghje à mè stanotte, ma tù
Dormi.

Anniversariu

Dumane sò nov'anni, o Mà, chì babbu hè mortu.
Ma cum'è ch'elle sò cusì tranquille l'ore
È ch'ellu canta u rusignolu in fondu à l'ortu,
Quand'ellu pienghje è ch'ellu soffre lu me core ?

Digià nov'anni ! Mi ricordu quella sera
Piena d'affannu, di spaventu è di dulore.
À bassa voce, tu dicii una prighera,
È cu tecu prigava, o Mà, lu nostru amore.

Babbu più calmu ripusava in lu so lettu
È lu silenziu ingutuppava lu paese.
Ma eiu sintia tamanta angoscia in lu mio pettu
Sulamente à guardà le care mani stese.

È strinsi quella sposta annantu à lu linzolu
Dicendu pianamente: O Bà, comu ti senti ?
"Mi sentu megliu u mio figliolu, vai à dorme..."
Eppò per sempre, li so ochji funu spenti

Dumane sò nov'anni, o Mà, chì babbu hè mortu.
Ma cum'è ch'elle sò cusì tranquille l'ore
È ch'ellu canta u rusignolu in fondu à l'ortu,
Quand'ellu pienghje è ch'ellu soffre lu me core ?

Ùn mi pare micca cumplettu. A versione cantata cumincia cusì : "ùn ansciava ind'è l'aria mancu un fiatu, in quella matinata di dulcezza..."



l'aghju messa sana più sottu (circione)

Notte in lu mulinu


Cum'ellu soffia u ventu in lu tracone !
L'acqua chì casca annant'à a sciappa mughje.
U me mulinu pare una prigione,
L'anima spavintata da quì fughje.

Eiu scunsulatu mi ne stò sta sera
Solu in u timpurale scatinatu.
Biata Santa Maria, a me prichera
À tè chì bona sè par ogni natu !

Tù sai chè vechju sò, è a me fronte
Porta i solchi di una vita dura.
Ma simile à a vita d'un gran monte
L'anima meia sempre ristò pura.

S’avissi da cuntà i mesi è l'anni
Chì u celu m'hà cuncessu di campà,
Cum’è sullevu à tutti i me malanni
Solu u travagliu puderia cità.

In u mulinu cum'è mè in ruvina,
Quantu n’aghju scarcatu sacchi è zani !
È quand'ella vulava a farina,
Aghjune fattu, ohimè, prugetti è piani !

Un lume stava accesu in la me vita.
Sole è forza mi dava. Oramai,
Spenta hè a luce, è a gioia hè finita,
È i me cumpagni avà sò i me guai.

U me figliolu hè mortu, è e campane
Sunatu anu à murtoriu u me dolu.
Biata Santa Maria, sò trè simane
Ch’e piengu notte è ghjornu è ch’e sò solu.

È dì chì ùn possu mancu à u campusantu
Lagnammi, ind'ellu dorme, à bassa voce.
Ùn vecu par ricoglie i me pienti
Nè tarra rumicata è micca croce.

Avemu tutti à u campu di riposu
Un cantu chì di fossa sirvarà ;
Ma annant'à a soia, di maghju luminosu,
U fior di muchju mai ùn cascarà.

Cum'ellu deve soffre u me figliolu
Supillitu culà induv'ell'hè mortu.
Fangu è neve sò forse u so linzolu.
Biata Santa Maria, dammi cunfortu !

Fà ch'ella cessi l'acqua, u fretu, è fà
Ch'e ùn senti più u ventu in li castagni
Mi si scioppa u core di pinsà
Chì a timpesta hè piena di i so lagni.

M'hà dettu u merru u nome di a furesta
Duve una palla li tagliò a vita.
Ma ùn mi ricordu più ; solu mi resta
In capu è in core un'angoscia infinita.

Partì cum'è tant'altri u dui aostu,
Dopu a messa detta di bon'ora.
L'aria pura era dolce cum'è u mostu
È u paese sanu stava fora.

Quand'ellu ghjunse quì, u me bel gigliu,
Guardò senza parlà i nostri guai.
Una lacrima vidi à u so cigliu.
È strintu in le me bracce u pigliai.

“Mamma preca par mè in Paradisu,
Curagiu, disse, o bà. Lasciami andà.
Ti tengu caru è mi ne vò dicisu.
Dammi un basgiu dinò. Addiu, o bà.”

Eppo' s'alluntanò marchjendu pianu.
U focu si lagnava à meza ziglia,
È si n'andò per sempre ind'elle vanu
E cose chì u Signore ci ripiglia.



Petru Santu Leca, Annu corsu, 1923, p. 108.

Quand'ellu ci dice à modu soiu u pueta cose sìmule, sùbitu si stringhje u core chì si sente tandu ancu di più forte l'addisperu tamantu di st'omu 'in ruina' ch'ùn hà più nimu nè nunda da azzingassi.

Una puesia pocu cunnisciuta di Petru Santu Leca (ùn si trova micca nè in l'antulugia di M.Ceccaldi nè in quella H. Yvia Croce)

Torna un'incantu !

u "tubu"

Circione a écrit:

guarda chì Erbaghju ùn hà da micca esse cuntentu

Ùn ci capisci nulla
hè arte...
travagliu u mo bokeh