Impastughjata
M’anu circatu cinque ghjorni, l’avia intesi ghjunghje davant’à ind’è mè è sapia ch’elli venianu per mè. Da ch’elli anu apartu a porta l’avia puntati à tramindui è mi n’era scappata per a machja. Tandu si sò intese e voce, chì ben’intesu ùn eranu micca vinuti cà in dui, l’ordine era statu lampatu di parammi cum’ellu si pudia. Ma ùn sò micca scema è sapia induv’elli s’eranu impustati per pigliammi è cusì a l’aghju fumata è sò intruta ind’una corsa scema trà mezu à i castagni.
U ghjornu innanzu avianu chjappu u me mezu fratellu, scumbattiamu sempre inseme dapoi chjuchi, ci semu allivati inseme. Aviamu paru, era natu anch’ellu in l’85, quattru ghjorni innanzu à mè è in a listessa camera ! L’amicizia di e nostre mamme ci avia subitu avvicinatu è quella strage di l’87 quand’elle morsenu tutt’à due hà fattu chì ùn ci semu mai più spiccati. U nostru babbu ùn essendusi mai primuratu di a nostra sorte, ci tinianu amichi è parenti ; chì a so sola primura à ellu era di fotte. E nostre mamme a sapianu è u s’eranu spartutu senza alcuna vergogna.
Fattu si stà chì i nostri destini si sò spiccati quand’elli l’anu chjappu. Sò stata cinque ghjorni è quattru notte in a machja, micca à piattammi in paese o ind’è l’amichi chì m’avarianu trovu, ma in a machja, a vera ! Biia l’acqua di u fiume o di i ghjargali, manghjava castagne o baghi è basta. Aghju patutu u fretu è anc’assai ch’ellu ùn hè micca piuvitu ! aghju patutu a sulitudine, è tutti i ghjorni i sintia ch’elli m’eranu appressu è cum’elli sò maligni ùn venianu micca da par elli, mandavanu calchì sbirru à batte in a machja pà coglie indezii di u me passaghju o ancu per pigliammi. Ma cunnoscu e so trappule, cunnoscu e so manere di travaglià, hè per quessa chì a mi sò franca. A me scappata hè piantata quandu chì un ghjornu chì n’aghju vistu dui pronti à mettemi e pastoghje avia pigliatu à l’inghjò è sempre fendu falendu mi era incalincata. Tandu m’avianu salvu a vita ricullendumi cù una corda è ne avianu prufitattu per impastughjammi. Cù i membri ligati m’anu purtatu dicendu ch’e avia da raghjunghje u me fratellu. Intruta ch’e era daretu à quellu fourgon bleu avia pruvatu à apre a porta ma ùn ci era niente à fà … è cusì m’anu sciaccatu in una cellula scura, senza purtellu.
Quì ci sò stata dui ghjorni, senza manghjà guasgi senza beie senza pudè sorte, ubbligata à fà ciò chì a crianza m’impedisce di cità, ind’un scornu di a cellula. E cellule vicine eranu viote sin’à a prima sera, ghjè tandu ch’ella nè ghjunta una cù quale aghju pussutu discorre appena ma micca tantu chì, ella, ghjera assai assai stanca : aspittava famiglia ! ghjè per via di u so statu chì i guardiani a curavanu un pocu di più. Ma era ricircata anch’ella è ci vulia à incarceralla ancu s’ella era pregna. Avia parturitu, a corcia, u ghjornu dopu à a so ghjunta senza aiutu, in u mullizzu di e cellule ch’ùn eranu micca nittate da un prighjuneru à l’altru. Ùn sò s’ella hè campata assai dopu què è s’ella hè campata a criatura chì u ghjornu dopu sò ghjunti à circammi.
À u capu di dui ghjorni stanca da a fame, tocca di un principiu di depressione è abbagliacata da u minimu ragiu di sole chì pudia entre quand’elli aprianu quella porta, ùn mi pudia più difende è senza alcuna resistenza da a me parte anu pussutu sciaccammi e pastoghje. U trasferimentu s’hè fattu in u listessu fourgon bleu scurtatu da due vitture. Ùn sò esatamente induve no semu piantati ma sapia ch’ellu ci era ghjuntu u me fratellu chì aghju vistu u so pindinu (s’era fattu tafunà l’arechja quand’ellu era giovanu) chì era cascatu in tarra, prova sicura d’una lotta trà quelli chì u s’avianu chappu è ellu. Vistu ch’e avia què mi sò messa à briunà è quandu vulia scappà m’era buscu una mazzata in capu chì m’avia sturdulitu è fatta cascà secca cum’è un chjodu. Ghjè tandu, pruffittendu di a me debbulezza ch’elli m’anu tombu u 16 di dicembre di l’88. Unu m’avia sciaccatu una stilittata in piena cannella mentre chì un’altra cuglia u me sangue ind’un cuncone bulichendulu senza arrestu. « Ci hà fattu corre quessa a lofia » disse unu svirsendu acqua bullita ind’una bagnarola cughjosa.
Ghjuvan Marcu Leca, Bonanova Nu 21, CCU/ALBIANA.
Accueil 
