Sujet: Versini Dumenicu Antone Sarafinu Mar 28 Fév - 21:35
Sta puesia hè stratta da E voce di a muntagna di Dominique Antoine Séraphin Versini di Cristinacce. Ùn ci vole micca à cunfondelu incù Dumenicu Antone Versini dettu « Maistrale ». Bench’ellu ùn appii micca a rinomina di Maistrale, D.A.S.Versini chì hà scrittu parechje puesie publicate in l’antulugia di Matteu Ceccaldi, hè cunnisciutu abbastanza, in particulare per via di a so puesia l’Arietta messa in musica da Ghjuvan Paulu Poletti è cantata da Canta u Populu Corsu. Hè dinù l’autore di L’elegia di u mulinellu cantata da Antone Ciosi.
Quand'ella canta in mè quell'aria languente Navica in dolci mari la me fantasia, Di l'albe chì ùn sò più risplende la magia, Tutta la giuvintù si leva è m'hè prisente.
Correnu dananzu à l'ochji maravigliati Catene di monti turchini à l'infinitu, Pinete, valdi cupi è machjetu fiuritu, Calanche è scogli da lu mare flagillati.
Scopru à li fianchi d'una sarra appitticate, Accolte à brada cum’è capre in lu piazzile, Di tondu à la ghjisgiola cù lu campanile Casarelle di petra nuda musgingate.
Hè l'ora calma induve ellu cansa lu ghjornu. A campanella chì chjocca l'avemaria I campagnoli sparsi invita à lu ritornu. A banda di le sgiotte affulena la via.
U sole s'hè ciuttatu una ghitara sona. Un'ardita brunetta affacca à lu purtellu È lampa un carofulu rossu à lu zitellu Innamuratu chì li canta la canzona.
Dernière édition par Circione le Ven 14 Sep - 20:53, édité 1 fois