Carlotti Dumenicu (Prete) "Martinu Appinzapalu"

Sì qualchì sia mi pò aiutà, cercu e parulle d'una puesia, ch'avia studiatu à u liceu, scritta mi pare da un certu Carlotti ( ùn sò più s'ellu era Appinzapalu ), chjamata " I vestuti di piloni ".

L'aghju sta puesia : hè di Prete Dumenicu Carlotti dettu "Martinu Appinzapalu", di U Petrosu.
Hè parsa in 1926 inde u so libru "Pampane corse".
Hè stata dinù cantata da Antone Ciosi.
So fora di Corsica per stu pezzu ma quendu rientru a ti trovu e a ti copiu qui.

Aspittendu ch'ellu volti Carlu vi mettu a canzona:

http://www.musicme.com/#/Antoine-Ciosi/albums/Canti-Pupulari-Di-Corsica-(Chants-Populaires-Corses)-3661585255833.html

vi cunsigliu di stà à sente A tibbiera è a canzona di i Pruverbii cantate incù Rinatu Astolfi di u Pedanu.

Viranu di Peppu Flori è cantata da MAryse Nicolai hè billissima dinù.


un bellu discu.

L'avia 'ssu discu, ci era dinù u lamentu di gallochju è u lamentu di u culuniale.

L'aghju imprestatu, è dapoi ùn l'aghju più trovu, mancu in u cummerciu.

A canzone di i vistuti di pilone hè più longa cà cusì

(ci hè annant'à l'antulugia di Ghjacintu Yvia Croce)

I vistuti di piloni – Martinu Appinzapalu
Ponte-Novu, 3 aostu 1925



Cumu cascanu i lioni
Chi lu piombu coglie in fronte
Casconu a pè di lu ponte
Li vistuti di piloni

Quelli di la Pedinera
Un istichittì di nettu
Intornu a bianca bandera
Si strignenu pettu a pettu

Da l’altura fala toni
U celu lampa subissi
I martiri fieri e fissi
Sparanu senza brioni

I feriti da per elli
Par dall’un supremu aiutu
Davant’a li so fratelli
Formanu un muru carnutu

Traditi, abbinti di fochi
Lottanu cun l’addisperu
Fin chi l’ultimu cispreru
Un casca lu velu ind’ochji

O terra di le custere
Cumu festi a brutte labbre
A beie cume le fere
Lu sangue di piaghe sacre ?

E tu Golu temerariu
Chi curaggiu a purtà indossu
L’orrore di stu calvariu
Sin’a lu Tirrenu rossu ?

O li mio falchi e fasgiani
Tutti impennati di Gloria
Eroi di Furiani
E di Borgu la Vittoria

O li mio maschi di trinca
Speghji di le centu pieve
Alte largie d’alte neve
Pulloni di la Casinca

O li mio bravi pastori
Di Niolu e d’Aitone
Li mio culuriti fiori
Di Balagna e di Cuscione

U piombu v’allibrò tutti
Ind’u listessu chjaccone
Tazzati cume li frutti
Ch’ellu pesta lu fragnone !

Muntagne di Merusaglia
Di Bigornu e di Bisinchi
Tistimoni di a battaglia
Ch’a Cirnu truncò li schinchi

Elpe di tristu ripaghju
Scogli e pilaghi di Golu
Chi po dì lu vostru dolu
In quell’affanosu maghju ?

Chi po dì lu pientu neru
Chi abbughjò tutt’u rughjone
Quandu Paoli in disperu
Travarcò lu Rescamone ?

Duve lu sangue hè falatu
Duve Cirnu perse a voce
O Corsu riteni u fiatu
E poni almenu sta croce !

Ch’ella stia sopra all’orice
In perpetuu ricordu
Marchendu a fresca venice
Chjamendu u cecu e lu sordu !

Per elli lun ci fù fosse
Golu dentru i so tafoni
Le carne incagnò cun l’osse
Fendune pezzi e bucconi

Passa e veni o paisanu
Sopra la sponda fatale
Ma in capu porta la manu
E segnati a stu signale

In punta di lu granitu
Fin chi la Corsica dura
Ch’ellu stia cum’un ditu
Ch’indica via sicura

Cumu cascanu i lioni
Chi lu piombu coglie in fronte
Casconu a pè di lu ponte
Li vistuti di piloni

Eranu li nostri babbi
E li nostri arcibabboni …

In « Pampane corse » - Bastia 1926

hè magnifica sta puesia.

A ringraziatti o Ca'

Hè sempre cun gran'piacè ch'eo rendu onore a Prete Carlotti dettu Martinu Appinzapalu, u mio celebru paisanu di U Petrosu. A ringrazià a te d'avemi datu l'occasione di mintualu qui !

Cum'ella hè dolce


Picurone fece a guerra di u settana, quand'ellu intese u ribombu di i cannoni, si messe à l'ascosu inde a trincera, trimendu cum'è una vincula. Statu una stonda, alza appena u capu fora: bum! un colpu! qualcosa li mena in fronte:
"Oimè! gridò Picurone, caschendu à corpu insù… Sò leccu! dicerete cusì è cusì à a mio famiglia! "
Fece e so ricumendazione à i cumpagni, è chjuse l'ochji dicendu pianamente:
" Cum'ella hè dolce a morte di u piombu!… "
Era statu un bufone chì l'avia chjappu in fronte!!!






Questa quì à mè mi pare magnifica.

Hè putente a puesia quì sopra !

Avà vogliu anch'eiu sparte cun voi un'antru racontu di u ben dì Martinu Appinzapalu,intitulatu :

Parolla d'Omu

Zìu Francescu, u pastore, curava e pecure à i Stagni di Vadina.
Una mane t'affacca un furesteru c'un carru tiratu à duie mule.
- Ci n'avete suvu ? Mi n'abbisognerìa una carrata...
U Pastore li mustrò i stazzili neri di cacherognuli picurini è di suvu vechju altu trè palmi.
- Quantu ne vulete ? dumandede u furesteru.
- Abbadate ciò chì vi ci vole. Fate u vostru prezzu da per voi.
L'omu fece u so contu è disse :
- Vi ne dò vinti franchi ! Vi bàstanu ?...
Vinti franchi, in quelli tempi, chì ùn si vidia denaru, eranu una somma.
- Ed eiu, rispose Zìu Francescu, vi ne vogliu fà rigalu ! carcate u vostru carru. Hè megliu un amicu cà vinti franchi !

nè ?

Michela a écrit:

è in più stu racontu u pudete dinù stà à sente quì :

http://corsica.net.free.fr/html/francais/textes/u_caravone_d_oru.htm

"Case corse" hè stata cantata da Antone Ciosi...
1974 - Ritornu a u paese...

"Fate u piacè, truvate u mezu, basta à vulè, di fà leghje à i vostri sculari qualcosa di nustrale ! Ch'elli ùn sianu micca tutti cechi è manitronchi, trastagliuli, sordi è linguimozzi !"

Dumenicu Carlotti adirizzendusi à i stitutori in lu 1923.