Currispundanza puetica

Ci hè una  vechja  tradizione puetica in  Corsica ch’omu  ùn  mintuveghja forse micca  abbastanza, hè quella – chjamemula cusì – di a currispundanza. À chì  hà  digià lettu  e  vechje Tramuntane, e Muvre o l'altre  riviste o giurnaletti  corsi di u seculu scorsu, li  sarà  accadutu di cascà  annant’à qualchì unu  di issi cuntrasti puetichi.

U  tale scrivia una  canzona, indirizzata  à un antru puetu,   quellu li  rispundia  qualchì ghjornu  dopu, ecc.

L’affare si passava spessu  annant’à  i  giurnali, è micca solu a stampa cursista, accadia spessu di leghjene qualchì unu in  li  giurnali  cum’è Le petit Bastiais o più tardi   Corse Matin è Le Provençal Corse .

Oghje a piazza fatta à a lingua  corsa in li  nostri cutidiani  hè  poca, parlu di  quelle puesie mandate dirittamente  da  i littori, è  stampate tale è  quale in li  giurnali.  A lingua corsa  hè sempre prisente ma so  adopru hè limitatu  à un  quadru  bellu pricisu.  Ùn  dicu micca  ch’ell’hè un male , ma mi pare  ch’ella ci perdi appena   appena  di u so spirdu  pupulare a stampa regiunale.

À titulu di puetu m’hè  accaduta ancu à mè  di scrive  qualchì puesia cusì, ma ùn l’aghju  micca  mandate in li  giurnali, eranu solu lettare « private ». U tempu di mette a manu addossu è e vi mittaraghju in stu sugettu.

Parechji anni fà emu ripigliatu  appena  st’usu di e  currispundanze puetiche annant’à  internet, aviamu mossu incù Ghjuvan Filice – in un antru  foru chì tandu s’assumigliava à  qualcosa    – e sizzione chjamate  scritti imposti induve ci attaccavamu à colpi d’ottupedi, di sunetti, d’acrostichi o di pantummi….

M’arricordu  dinù di  quella passata incù l’Erbaghju « Viaghju in Pumonte » .  Face parte di i sugetti ch’elli si  scammattedenu l’amministratori di u  novu  «Foru Corsu »   ,  eiu  cridia  ch’elli  fussinu persi ma sbulichendu in  tutti i vechji sugetti di u mo urdinatore,  fendu appena di pulizia  anannt’à u mo  discu duru, vengu di cascà annant’à  a  risposta  ch’ellu fece « Ghjuvan Pasquinu » à L’Erbaghju.  Dunque  o Erbaghju s’ellu ti resta a to chjama mittaraghju a to risposta     – aghju ancu  a  risposta  à  a risposta ch’è  t’avia fattu à a mo risposta.    :affraid:

Per principià una bella passata trà Minnellu d'Ascu è Peppu Flori.

un antru bellu esempiu di ciò ch'elli eranu ste currispundanze puetiche...

Sta volta Peppu Flori vole ch'ellu si mariti Pampasgiolu...




Risposta à Peppu Flori

Carissimu Peppu Flori
Sinceru amicu è parente
Ti ringraziu pè i fiori
Ch’è tù mi ghjetti suvente…
Eppo’ pè i to cunsigli,
Ti ne sò ricunniscente.

Sè puetu di talentu,
È a penna ti cunface,
Passi allegru u to tempu
Eppo’ suvente ti piace,
Di zirgà di tantu in tantu,
Di certi u ben chì ghjace .

Senza spirdu di duvellu
Nè di cuntradizione
Sè per mè cum’è un fratellu
I virtù d’affizzione…
Vuleria dumandatti
Oghje una spiicazione.

Dimmi cum’è tù li sai
Certi picculi sicreti ?
Per tè nun ci sarà guai,
Ancu s’è tù i ripeti,
S’agisce di una risata,
Trà di noi altri pueti.

Dumandu l’obedienza,
S’è tù poi ben’intesu,
Fammi cunnosce l’agenza
Chì hà fattu lu conturesu
È s’hè data tanta pena
Per mette tuttu à palesu.

Ne parlanu ancu l’acelli,
In ogni locu a sanu
Da Galeria à Tuarelli,
Da Bunifaziu à Ruglianu,
Da corti fin’à Bastia
È forse ancu più luntanu.

Mi parli di una zitella,
Senza nome nè casata,
Hè sicuramente quella ,
Niscentre è smaliziata,
Chì t’hà messu à u currente
Di a so vita privata.

Ma prufitti veramente,
Tù, di a forza murale,
Di una povara nucente
Troppu franca è liberale,
Ma fà casu chì cumetti
Un gran piccatu murtale

Appiane cumpassione
Di issa rara creatura
Fà contu d’esse patrone
È d’avella sempre in cura
Di notte cum’è di ghjornu
Fà rispittà la virsura…


PAMPASGIOLU.

Sempre Pampasgiolu, stavolta li risponde Fiordinadu Acquaviva (u Cumandante) .







Eccu spergu ch'è vo vi sarete campati quant'è mè à leghje què!

S'è v'avete altri ducumenti di stu genaru hè quì ch'ellu ci vole à metteli.

È a mo currispundenza cù un certu Serra l'anu scamattata dinù
purtantu era degna di figurà accant'à quella di i più grandi pueti

Un antru esempiu assai significativu di ciò ch’elli eranu ste currispundanze.

Mi piacenu assai sti dui pueti, è a manera ch’elli anu per parlà di cose simplice incù un tonu ghjustu, sguasi sulenne, ma sempre intintu di risa. In duie lettare di dui amichi chì piglianu nutizie unu di l’altru, si n'ampara assai annant'à ciò ch’ellu era u spiritu di a ghjente di sta generazione.

Duie rimarche annant’à a forma :
- Sò versi d’ondeci pedi (endecasillabi) era spessu u casu in le currispundanze cusì.
- I dui pueti scrivenu in « rime incatinate » cum’è in li terzetti, ripigliendu a siconda rima di a prima strufata in la strufata siguente, ciò chì spieca forse l’ultima strufata d’Anghjulu Danesi quand’ellu parla « d’inghenà » canzone.

Citation :

Caru Danesi,

Lascendu tanti affari à dumatina
Anghjulu cun piacè vengu à chjamatti ;
U sole s’hè ciuttatu à la marina,
L’acelli paurosi si sò piatti.

Ed eiu ch’aghju mancatu à i mio cuntratti,
Ed eiu ch’aghju mancatu à i mio duveri,
Vengu cù i penseri à dumandatti
Ciò ch’è tù pensi di l’amichi veri ?

Ci cridemu qualcosa è semu zeri ;
Ùn sapemu piglià a penna in manu
Per fà dui filari à I sinceri
Amichi chì si trovanu luntanu.

Si manca di rispettu ancu à u Supranu
È nun si face più nisun prichera
Ma sì a terra trema da un vulcanu
Si riflette ancu à Cristu qualchì sera.

È si vede a ghjente pocu fiera,
Chì preca sulamente per paura,
Spavintata da quella messagera
Chì ci cunduce à tutti in sepultura.

Cusì campa l’umana creatura
È mi mettu in buleghju à i peccatori,
L’omu chì hè negligente di natura,
È cum’è tanti falzi è traditori.

Ma s’e nun vogliu eiu curone è fiori,
Mancu mereti tù d’esse ludatu ;
A musa chti dà tanti favori,
Ti trova indiferente è ritiratu.

M’avvecu chì ùn t’aghju salutatu,
È ti vecu lighjendu penserosu ;
Chì stu Menicu stranu è scrianzatu,
U truvarè insulente è dispettosu.

Ma eccu lu me abbracciu affetuosu
Fraternu dolce, carcu di calore ;
È ti sarà rimessu à u t’ascosu
Da l’allegru è simpaticu fattore.

Una simana dopu, senza errore
Aspettu la risposta più curtese;
A ghjuru sopr’à lu sacratu onore,
Di scriveti suvente à u paese.


Menicu d’Osani.

Citation :

Carissimu amicu,

E to nutizie m’anu rallegratu
È senza più tricà subitu scrivu ;
Ma dipoi tantu tempu passatu
Ùn sapia mancu più s’è tù era vivu.

Tuttu ciò ch’è tù dici hè pusitivu
È facciu la mio colpa à manu in pettu ;
Sì l’omu indiferente ùn hè gattivu,
Ùn si pò mancu dì ch’ellu hè perfettu.

L’indiferenza hè un pessimu difettu,
Ma in certe circustanze ci hè una scusa :
Sò statu guasi un annu indu u lettu
Abbandunatu da rima è da musa.

A mio memoria torbida è cunfusa,
Ùn pudia più fà dui filari
Oghje chì ghjè guarita ùn si ricusa
À currisponde incù l’amichi cari.

Aghju passatu ghjorni belli amari,
È senza un’operazione cumplicata
Fatta da praticiani sperti è rari,
Ùn leghjaristi la mio impruvisata.

Ciò ch’è tù dici indu la to ballata
Hè veru. Avemu persu la cundotta ;
Ùn femu casu à la parolla data
È l’omi ùn sò più quelli di una volta.

Ciò ch’o pensu o Dumè ? A tagliu corta,
Ùn si trova chè falzi moralisti ;
A morale, dimmula puru, hè morta.
Simu tutti una mansa d’arrivisti.

Finiscu sti discorsi pessimisti
È què sarà la mio cunclusione :
In sin’à chì l’omi cercaranu acquisti
Ùn puderà fiurì la Nazione.

Ti mandu tutta la mio affezzione
È ti precu salute cun vigore
Ch’è tù possa inghenà belle canzone,
È t’abbracciu di tuttu lu mio core.

Anghjulu Danesi.

Roccu Mambrini dettu “ U Rusignolu ” avia fattu una chjama ch’elli vinissinu numarosi i pueti à participà à u chjama è rispondi urganizatu in Calinzana pè a festa di u vin u ghjornu di a san Martinu. Cum’è vo a pudete vede quì, a so chjama finia incù sti dui versi : “ Accurdate e vostre corde chì e meie sò pronte à morde ”:




“ A San Martinu in Calinzana ” hè a risposta à sta prima chjama:

Citation :

A San Martinu in Calinzana


Scummettu chì Rucchicellu
S’hè affaccatu u primu
È lestru cum’è l’acellu
Hà lasciatu u so nidu
Ùn pudia fà di menu
Essendu u più vicinu

L’acellu stuzzicaghjolu
À tutti fece l’invitu
Ùn temu u rusignolu
Ancu per esse accanitu
Perchè un morsu acillinu
Ùn hà mai firitu à nimu

L’avariate ancu intese
E mio rime in Calinzana
Cù e lode più curtese
È a musa per cumpagna
Ma l’ondeci di stu mese
Ùn era micca in Balagna

Era falatu in Aiacciu
À vede i mio parenti
È benchì quellu acillacciu
Appii arrutati i denti
Li mandu un sinceru abbracciu
È i mio versi più quenti

Prufittu di l’uccasione
Per salutà à Carlinu
È mandu duie canzone
À Ghjacintu u so cuginu
Saranu stati in Tallone
U ghjornu di San Martinu

Ghjuvan Deziu u mio ziu
Sarà statu in Porta Vechja
Nu a valle di Marzulinu
Duve u sole si spechja
È ùn l’avarete vistu
Cù a so manu à l’arechja

Martinu ci sarà statu
Chì quellu in casa ùn si resta
À chì l’avarà chjamatu
Avarà tinutu testa
Ùn avaranu mancatu
U ghjornu di a so festa

Matteu u traculinu
Per quessa ùn ci hè pinseri
Ghjunt’hè da Capuralinu
Duv’ellu hà i so quartieri
S’ell’hè quistione di vinu
Si dispiazza vulinteri

I pueti di Calinzana
Fattu avaranu una prova
Incù a so rima strana
Grisgione è Villanova
Sortenu di a so tana
À chì i cerca i trova

Saranu ghjunti Ferrari
Calzarelli è Savignoni
Agostini cù Navari
È Francescu Simeoni
Ambrosgiu à fà i s’affari
Sarà statu in Ostriconi

Inquant' à l’altri pueti
Chì qualchì volta aghju intesu
Tengu i nomi sicreti
E so casate ùn palesu
Ma puru ùn mi scordu d’elli
Sianu vechji o zitelli

Finiscu u mio tirzinu
Pegnu di a mio amicizia
È mandu stu biglittinu
Cù inviloppu è franchizia
Prichendu chì San Martinu
Accordi à tutti divizia

Olivier Ancey.

Roccu fece subitu risposta, cù una puesia, dicendu ch’e ricusava u cunfrontu è chì quand’ellu m’attaccava in puesia, mi cacciava à fughje… Mi rimpruvarava ancu d’andà à cantà paghjelle invece di dalli capu. Fece dinù una strufata in disprezzu à u so amicu Ghjuvan Luigi Villanova :





Lisandru Bassani fù incaricatu di mandà sta puesia à tutti i pueti è fece anch’ellu duie strufate pigliendu a pratesa di u Rusignolu:



Hè stata tandu ch’aghju scrittu a siconda lettara:

Citation :

Risposta à u Rusignolu


S’è l’Acquaviva corre nu e mio rime
S’aghju qualchì razzinu paisanu
Allora anch’eiu quì mi vogliu sprime
È subitu piglià a penna in manu
Per risponde à l’acellu scrianzatu
Chì in Zilia “Rusignolu” hè cugnumatu

Prima di tuttu o Roccu a ti ramentu
Sè statu tù u primu à stuzzicà
À tutt’ognunu ai messu spaventu
Quand’è tù ci vulia mursicà
Dicendu d’accurdà e nostre corde
Perchè e toie eranu pronte à morde

Risposu subitu à quellu dispacciu
Perchè rispondu sempre à chì mi chjama
Spiichendu ch’era falatu in Aiacciu
À vede u mio babbu è a mio mamma
È chì s’ella fussi stata in simana
Saria ghjuntu anch’eiu in Calinzana

Dopu per ùn esse micca vinutu
À i pueti aghju chersu scusa
Tandu forse u tortu ch’aghju avutu
Hè di dì chì ùn timia a to musa
Soca ti pare quessa una ragione
Di mette tantu odiu in le to canzone

Dici ch’eiu ricusu i cunfronti
Quessa po mancu ch’ella sia detta
Ùn dici veru è ci vole ch’è tù conti
Chì prestu faraghju a mio vindetta
È s’è no ci truvemu pè ste fiere
O Roccu poi fà e to prichere

Aghju sempre rispostu o Rusignolu
À i pueti chì m’anu chjamatu
Ch’ella fussi à a Santa di Niolu
In fiera di Francardu o di u Pratu
È quandu collu in Rusiu o in Loretu
Sò paghjillaghju è sò dinù puetu

T’aghju sempre rispostu è datu capu
In Santa Ristiduta di Calinzana
È bench’e ùn sia tantu aggalabatu
Spessu t’aghju pigliatu a suprana
Eppuru o Rusignò in lochi soi
’Ci chì e vacche vincenu i boi


Ùn ti filiciteghju o Rucchicellu
Per sò ch’è t’ai dettu à Ghjuvan Luigi
Inquanti à mè ai persu u ciarbellu
O forse ùn sai più sò ch’è tù dici
Ùn avaria cridutu chì in lu to senu
Tù pudessi piattà tantu vilenu

Cù e rime più dolce cà u mele
Cun tè aghju sempre cantatu in lode
Ma in lu to bizzicu ùn ci ai cà fele
Ci hà da vulè ch’e u ti fia chjode
E parolle ùn trapananu a pelle
Ma t’anu da trimà e schincarelle

U ghjornu ch’aghju scrittu a mio scusa
Per mè aghju culpitu u t’orgogliu
Ma perchè tù d’un affare di nulla
Oghje ne voli fà un cuncistoriu
O Rusignò ùn fà più tantu fume
Osinnò ci ai da lascià e to piume

Sarà ancu megliu ch’è tù ùn mi risponda
È ch’è tù ùn frazi più talentu ed arte
Perchè hè una funa troppu longa
È ùn vogliu ch’ella diventi un sarpe
È perchè tù ti franchi piume è ale
À sta lita mettu un puntu finale.




Infine vogliu scrive ancu à Lisandru
Quellu grande puetu di a Falce
Senti bè u cunsigliu ch’e ti mandu
O Lisà godi puru a to pace
Ùn t’inframette più indu i mio affari
Cusì forse saremu amichi cari

Di trattà cusì a ghjente d’ambraschi
Ùn t’avaria cridutu capace
O Lisà u ghjornu ch’è tù mi caschi
Capisciarè chì quessa ùn si face
È ti vogliu amparà u calateiu
Cusì ti tinarè appena megliu


Olivier Ancey, Curbara u 15/12/2000.

petra alta a écrit:

È a mo currispundenza cù un certu Serra l'anu scamattata dinù
purtantu era degna di figurà accant'à quella di i più grandi pueti

voli mette in piazza publica tutti i nostri mots doux ( ) ? e perchè micca fàlli publicà nu a bibliotecca rosa ?
grrr lascia corre chi s'o vincimu u premiu di u libru corsu dopu ci hà da vulè à sparte cun l'amministratori di u vecchju foru ..

Ghjallochju a écrit:

voli mette in piazza publica tutti i nostri mots doux ( ) ? e perchè micca fàlli publicà nu a bibliotecca rosa ?
grrr lascia corre chi s'o vincimu u premiu di u libru corsu dopu ci hà da vulè à sparte cun l'amministratori di u vecchju foru ..

ùn ti vergogni mancu d'impiastrà u bellu sugettu di Circione?

O Circiò sparti puru stu sugettu, fallu leghje! hè un veru piacè

(o Ghallochju )

petra alta a écrit:

O Circiò sparti puru stu sugettu, fallu leghje! hè un veru piacè

(o Ghallochju )

era solu per fà un illustrazione "in diretta" di e susdette currispudenze mintuate da Circione .. u latu pedagogicu di e nostre cuntrastate un averanu scappatu à nimu , ne ? :affraid:

scusate s'e m'inframettu ma sò in traccia di mette puesie in stu sugettu ch'e vengu di creà...


Sempre inde u listessu genaru (bench'ellu ùn ci sia tantu cuntrastu, eccu una puesia ch'avia scrittu dopu a Santu Antone ind'è Jeannot Ciosi, ci eranu tutti i pueti, C.Orsucci s'era chjappu incù u Rusignolu è in più bella hà dettu chì à ellu rusignoli li ne ci vulia sei.

A prima strufata m'hè vinuta subitu, ma andate voi à inframettevi trà Roccu è Carlinu... eppo' ùn mi chjamu micca Ghjallochju o Petra Alta... Si face chì ùn aghju micca rispostu subitu, è dopu ùn vinia più bè eppo uùn era tantu in forma u ghjornu.

Ma vultendu in casa, in vittura aghju cuntinuvatu a canzona à u mo amicu Carlinu ... È a sera mi sò messu à l'ordì è hà datu què:

U contu

Pratendi chì Rusignoli
À tè ti ne ci vole sei,
Ai rispostu à i soi,
Degna risponde à i mei
Eppo guarda s’è tù poi
Duv’è tù metti i pedi.

Hè vera ch’è tù l’insacchi
S’ellu hè solu Rusignolu,
Ùn ci vole ch’ellu t’attacchi
Ùn ci sarà micca modu,
S’ell’ùn hè ch’ellu s’affacchi
Incù numarosu stolu.

Di supranatti Carlinu,
Da l’avà nimu a fece
È s’ellu prova Austinu,
Perch’ellu ti possi rege,
Dimmi à qualcosa vicinu,
Quantu ne ci vularà, dece?

A to rima hè a tarcana,
Ne simu tutti cunvinti,
Per piglialli a suprana,
Quantu ci vularà Ghjacinti?
Una squadra sana sana
Di dicennove o di vinti?

Ghjugnarà ancu Filippi
Cù a so arte tamanta,
Ci vularà ch’ellu si stippi
Ma ùn l’hà ancu guadanta,
Inquanti à mè ti ne impippi
S’elli sò trenta o quaranta...

Farà ciabba ancu Santucci
Malgradu strufate altiere?
Frazarà i so cartucci
U nostru amicu ingignere?
Per sottumette à Orsucci
Bastaranu e so schere?

Pruvarà ancu Ristori
Da stratecu militare
È benchì di i scrittori
Sia a petra angulare
Dilla puru zenza errori,
Passemu à e cintinare?

U discipulu si sà
Hè Paulu Calzarelli
Puetu di qualità
Degnu di i so mudelli
Soca ti ne ci vularà
Quantu anu piume l’acelli?

Parigi cù gran primura,
Pruvarà s’ella li pare,
Ma ùn hè micca sicura
Ch’ellu disciogli l’affare...
Quantu di a so statura?
Quant’ellu ci hè pesci in mare?

Quantu ci vularà Ferrari?
Eppo quantu Savignoni?
Quantu ci vularà Navari?
Eppo quantu Simeoni?
Rispondi in tarmini chjari,
Francaremu i milioni?

Zenza parlà di Virgitti
È mancu di Villanova,
Tutti i conti sò scritti
È a somma l’aghju trova
Ma ponu andà capiritti,
Di crianza facciu prova...

Facciu prova di crianza,
Cunnoscu u calateu,
N’aghju citatu abbastanza,
L’ultimu saraghju eiu,
A sò chì pocu m’avanza
D’insignà à u liceu.

Credi puru chì mi dole
D’ùn vince quella partita,
Ùn bastanu l’alte scole,
L’aghju bella cà capita,
Chì cum’è mè ti ne ci vole
Una quantità infinita!

Tù sè più forte cà mè
Ma paura ùn mi n’arrechi,
S’è tù ùn capisci perchè
Ci vularà ch’e a ti spiechi,
’Ci chì i verci sò rè
S’elli sò ind’è i cechi…

Poi puru disprizzà
À mè è à Rusignolu
Ma falla per carità,
Ùn disprizzà più Niolu!
Chì ti faria piantà
Ancu un mezu Pampasgiolu...

Aghju passatu u scrittu
Temu di passà l’urale
S’è t’ai u core afflittu
Ùn la ti piglià à male
Avà mi vogliu stà zittu
Eccu u puntu finale.

Ghjallochju a écrit:

era solu per fà un illustrazione "in diretta" di e susdette currispudenze mintuate da Circione .. u latu pedagogicu di e nostre cuntrastate un averanu scappatu à nimu , ne ? :affraid:

stu latu pedagogicu m'hè scappatu
da quì a pocu Circione t'hà da spiegà l'impurtanza di e doppie cunsunante in a scrittura di u corsu

petra alta a écrit:

stu latu pedagogicu m'hè scappatu
da quì a pocu Circione t'hà da spiegà l'impurtanza di e doppie cunsunante in a scrittura di u corsu

inno Circione vole solu ch'o ti scrivi in versi :twisted:
e t'aghj'à dà eo e rime doppie

o Ghjalluchjò mi possu sbaglià ma mi pare d'avenne vistu cuntrasti cusì trà Pincu è u Strampalatu

s'e i ritrovu i mettu.

Mi campu leghjendu !

Una canzona di Dumenicu Andreotti "Minicale" d'Evisa.





Li risponde un giovanu impruvisadore di 20 anni, Ghjuvan Ghjaseppu Acquaviva dettu "Peppu u Cacciadore".






Una billissima risposta di ziu Minicale (i pruverbii sò in bonus ):

Circione a écrit:

M’arricordu dinù di quella passata incù l’Erbaghju « Viaghju in Pumonte » . Face parte di i sugetti ch’elli si scammattedenu l’amministratori di u novu «Foru Corsu » , eiu cridia ch’elli fussinu persi ma sbulichendu in tutti i vechji sugetti di u mo urdinatore, fendu appena di pulizia anannt’à u mo discu duru, vengu di cascà annant’à a risposta ch’ellu fece « Ghjuvan Pasquinu » à L’Erbaghju. Dunque o Erbaghju s’ellu ti resta a to chjama mittaraghju a to risposta – aghju ancu a risposta à a risposta ch’è t’avia fattu à a mo risposta. :affraid:

Tandu ci vole à spiegà à tutti ch'ellu dopu à stu => filmettu (a puisia detta in u prima minutu) ch'aviu dumandatu trè, cinque, dece volte à u tintu (<= ) di Matteu* ch'ellu mettessi a puisia sana sana annant'à u foru. Ma dopu, dumane è daretu, u fattu hè chì a puisia ùn s'hè mai letta. Dunque per ziricà u vispaghju aviu dicisu d'attaccà u zione di Matteu (* anzianu cugnone di Circione) per fallu move un pocu è d'accurtà inde u listessu tempu u so viaghju in Pumonte.

S'hè piantatu in lu cunventu
Di u paese di Curbara
Mai ùn hà vistu Palmentu
Nè menu L'isula rara
Vi contu avà 'ssu ramentu
Cù a rima a più chjara

Hè puru una virità
Ch'ellu hè partutu da Piana
Ma mi tocca à palisà
Cù una voce paisana
Chì subitu ghjuntu in Portu
Hà trincatu in Marignana

È Zi' Pasquinu hà dettu
Nantu à u chjassu muntagnolu
"Par lu sangue maladettu,
eiu sò di u Niolu,
è di i Pumuntichi aspettu
d'ùn cantà mai più solu!!"

Si ne hè statu calchì ghjornu
Certi dicenu un mese
Hà fattu un bellu sughjornu
Inde u nostru paese
Cantichjendu à u cuntornu
E so terzine Calvese

Hè ghjuntu in Marignana
Cù a so bella trazzione
Hà dettu "Senza macagna
A vi ghjocu in canzone!"
Ma per rientre in Balagna
L'emu imprestatu à Muvrone

Hà francatu l'Aitone
È dinù u Valdu Niellu
Lascendu u nostru rughjone
À u passu sumirellu
Ghjuntu in locu di a Madonna
Avia cumpostu un terzellu.

U sumere hè un animale
Chì batte sempre in l'arestu
U so passu naturale
Mai ùn hè andatu prestu
Pasquinu piantò in l'Acquale
Per compie prestu u so testu

A puesia di sicura
Era una bella tirzina
Cù parolle di primura
Per a strada balanina
È a musa di a natura
Chì si sà hè unta è fina

Questu affare hè ghigna nera
Un affannu è un scumpientu
A Balagna cusì fiera
Oghje stancia u so pientu
A spassighjata ùn era vera
Si piantò in lu cunventu....di Calacuccia!!!

ed eccu a risposta:

Viaghju in Pumonte.

In mille è novecentu vintisette
Ùn era ancu suldatu ma pastore
Virani tandu n’avia diciossette
(’Ci chì ùn aspetta l’anni u valore…)
Mentre ciuttava u sole à l’orizonte,
Dissu: "Dumane mi ne vò in Pumonte…"

Di notte, da u Marzulinu partu
Ghjugnendu in Caprunale vecu Lonca…
Francu Cuccavera è a bocca di u Saltu,
Si sparghjenu di punta à a spilonca
I largi maistosi d’Aitone,
Hè un vede chì u silenziu v’impone…

A sera stessa in Evisa ghjugnia
"Salute, per fà cena hè troppu tardi ?"
Dissu subitu intrendu à l’Usteria
Tinuta tandu da un certu Ceccaldi
Quandu mi fece cennu Minicale,
U più grande puetu di u lucale…

"Fate u piacè o caru Ghjuvan Pasquinu
Voi chì avete cusì bella piuma
Chjinatevi cun mè à tavulinu,
In ottupedi fatemine una,
Socu cantà ma ùn sò micca scrive…"
In mè stessu pinsaiu : "Ci hè da ride…"

Minicale finitu u ripastu,
Mi dede allora un vechju scartafacciu,
Addossu eiu li scrissu un Cuntrastu
Trà un Curzacciu è un Partinillacciu.
O Minicà! tù chì in pace riposi,
U «to» cuntrastu avà u canta Ciosi.

U lindumane ghjunsu in Cristinacce
Eranu tutti fora annant’à a piazza
M’accolsenu spalanchendu e bracce
Dicendu " Què hè puetu di razza",
"Sò Dumenicu Antone Sarafinu !"
Mi disse unu… "Eiu sò Ghjuvan Pasquinu…"

"A sapete, eiu sò magistratu
È mi ne vò dumane in Tunisia,
’Ci ch’è vo site propiu attalintatu
A mi fariste una puesia ?
Tandu zenza mancu ripiglià fiatu
Di u mulinellu li feciu L’elegia…

M’avia ricivutu bè è megliu,
Si face chì dopu una stundetta,
Vistu ch’e cunniscia u calateu,
Ne feciu un’antra chjamata Arietta…
"Possu fà crede ch’e l’aghju scritte eiu?"
Disse Versini, eiu risposu : "Hè detta !"

Quandu ghjunsu in paese di Marignana,
M’aspittavanu tutti à bracce tese,
U prete fece sunà a campana,
Ci s’era sguasi tuttu u paese.
L’accuglianza fù sulenne è distinta,
U merre avia a so sciarpa cinta.

Mi prisintonu un certu Maistrale,
Unu di i pueti di u cantone…
Disse : "Voi chì site di l’Acquale
E mi vulete fà duie canzone ? "
Li cantaiu u Lamentu di u banditu
Mi disse : "Un’antra !" da ch’e l’ebbu finitu...

Per fà piacè à stu vechju macuccu
Li ne cantaiu duie : Aiacciu bellu
È dinù a canzona di u cuccu
A sapete ciò ch’ellu fece quellu :
Qualchì annu dopu dicia dapertuttu
Chì ste canzone l’avia fatte ellu…

"Puesie torna vi ne daraghju
Un’antra volta sì ind’è voi capetu
Ma mi tocca à ripiglià u viaghju !"
Dissu arruchjendu pè u castagnetu
"Avvedeci! mi ne vocu in Niolu
Quassù ci aghju u mio bellu paisolu."

In più bella intesu un tristu lagnu
Cum’è u rughju di qualchì cignale
È mi sbuccò daretu à un castagnu
Un vichjarellu incù un barbazzale
M’attaccò in disprezzu ma zenza rime
Cumu risponde à stu grugniculime ?

Era un rimitu cugnumatu l’Erbaghju
Li dissu allora "Ùn vale a pena à rughje
In puesia vi rispundaraghju"
Dopu "u cignale" si cacciò à fughje…
Ciò ch’e cantaiu tandu ùn la palesu
Ma ’ci chì dopu ùn s’hè mai più intesu…

Eccu compie cusì u mio viaghju,
Forse cridite ch’e sia un montasega
Ma ùn vole dì… Prestu vi diciaraghju
Quelle ch’e dedu à Petru Santu Leca…
Intantu vi salutu da u Marzulinu,
À prestu s’è Diu vole, Ghjuvan Pasquinu.

Ognunu ghjudicarà
Di sta penna l'arditezza
Tuttu u so sapè fà
È a so dilicatezza
Ma eiu vogliu ritene
Di l'Erbaghju a finezza…

Sappia chì sta impinnatella
Ti purtarà prighjudiziu
Per parlà di cacarella
Scrivisti senza ghjudiziu
Ma ti siguitarà sempre
U to scrittu scrimintiziu

Stu vintisei di Maghju
U to estru t’hà traditu
Diciaranu : « Mì L’Erbaghju ! »
T’insignaranu di ditu
Di sente e scaccanate
Ùn ai ancu finitu

Di tè si n’anu da ride
Avaranu pocu stima
S’è tù voli torna scrive
Cum’è t’ai scrittu prima
Perchè per esse puetu
Ùn basta micca a rima

Avà femmula finita
È mi tocca à sarrà l'usciu
Sì a to penna hè ardita
Ne vogliu sente u strusciu
Ma per parlà d’altri affari…
Micca di caca è di frusciu.

Vi contu a passata :
Un amicu , Dumenicu Barrazza, m'avia prumessu una cassetta, ma avia tricatu appena nanzu di mandallami…

Era l’arrigistramentu di un cuncertu di u so gruppu I Voci di a Gravona ch’avia vistu à u Kallisté in 1984 – s’e ùn mi sbagliu. Quandu dicu ch’ellu hà tricatu hè un eufemisimu chì a cassetta, a mi mandede una vintina d’anni dopu. Eiu li avia prumessu un arrigistramentu magnificu ch’e avia di "Peppetru u barbutu" chì cantava u lamentu di Fasgianu…

Un bellu ghjornu eccu chì u fattore m’arreca un pacchettu… Addossu ci era scrittu « A l’attention du pseudo mycologue » bisogna à dì ch’e m’era vantatu incun Dumenicu d’andà à i funghi…¹È Dumè ellu hè u veru campagnolu, allora si ne appena risu di mè…

È mi scrive :

Tù ùn la poi più nigà
U me amicu Uliveriu
Ti faraghju rimarcà
Dumè hè statu sinceru
In ritornu aspettu avà
Peppetru u mulatteru


Dunque li mandu anch’eiu una cassetta incù vechje canzone corse ch’avia incù sta piccula puesia:




Risposta à Dumè

O quantu l’aghju aspittatu
L’arrivu di u fattore
Chì sta mane m’hà purtatu
Un rigalu di valore
Sè un amicu fidatu
A to parolla hè d’onore

Vint’anni ch’in lu mio core
U so ricordu risona
Ghjornu è notte à tutte l’ore
Eppo mai m’abbandona
Chì ùn ponu micca more
E Voce di a Gravona

Ti mandu anch’eiu un scagninu
Fattu à l’usu casanu
À tè l’amatore finu
Di u cantu paisanu
Sintarè cum’ell’hè lindu
U lamentu di Fasgianu

Stu mazzulu di canzone
Stallu à sente incù primura
Cù tutta a passione
È cù a fede più pura
Sò e nostre tradizione
Ci vole à piglianne cura

Quella di a miculugia
Vulinteri ti pardongu
È ancu mi piaceria
À cogliemi qualchì fungu
Pè purtattine una cria
Nu I Peri s’e ci ghjungu

Di coglie senza sapè
Hè piriculu di morte
Arricumandati à mè
S’è tù ti ne voli sorte
Ti purtaraghju o Dumè
Duie bellissime sporte

Una piena à pivarelle
Ghjallistorzi è firlini
Sprignoli è ghjallinelle
Prataroli è liccini
È s’e ne trovu buletri
Incù dui capinegri

Quill’altra sarà impiuta
Di a qualità più fina
Una spezia cunnisciuta
Chjamata vescia vulpina
Cù duie ove di cicuta
Eppo’ qualchì panterina...



Risposta

Permettimi o Olivier
Di chjamatti prufessore
Parà di funzi ghjè bè
Ma senza cummette errore
Ci vularia ancu à sapè
Cunnosciane u culore

Pè « a sporta chì ùn pardona »
Senti bè, a tastaraghju !
Puru s’ella ùn hè bona
Paura eiu ùn ne aghju
Chì l’omi di a Gravona
Anu un stomacu d’acciaghju

Falzu cum’è a cicuta
Dice u pruverbiu casanu
Hè una pianta cunnisciuta
Quandu omu hè paisanu
Ma soca ùn l’ai avuta
Una sola volta in manu

L’ovi rari è cusì belli
Nascenu in li castagneti
Pè empieni li spurtelli
T’insignaraghju i sicreti
Fà casu in li prunalbelli
Di ùn truvatti in calzunetti

À batte solu a machja
M’inchieti for di misura
E Quandu u corbu rachja
Sè pigliatu di paura
Ni cunfondi a curnachja
Cu i tacculi di l’altura

Avvezzu ùn mi pari tantu
Mi n’avvecu à l’andatura
L’avarè frustata quantu
A strada di a natura ?
Campa chì ci hè sempre un santu
Per pricattila sicura

Eccuti l’ultimi lacci
Tesi à l’usu paisanu
Mi piace à l’amicacci
Ziricalli da luntanu
Sì Diu vole à truvacci
À a fiera di Bucugnanu…

Trà a me ortograffia
È quella di i struitoni
Ùn circà mai ch’ella sia
Di truvacci paraconi
Solu ferma a puesia
In stintu di tradizioni




Machja Aiaccina

Hè un pezzu ch’e l’aghju ricivuta
A lettara ch’è tù m’avia mandatu,
Quantu tempu a mio musa hè stata muta,
Per fà risposta o quantu aghju tricatu,
È puru a sò ùn ci hè maiò fatica
Dumè quand’unu aspetta è l’altru trica.

Prima di tuttu ti filiciteghju
Chì e to rime sò schiette è ben fatte,
Ch’è tù sia puetu ùn dubbiteghju
Oramai cun elli poi batte,
T’aspittaranu in Pigna u vintottu,
S’è tù ùn ci vai solu ti ci portu !

S’è tù ùn la sai ancu a t’ampargu,
Sè un veru puetu naturale,
À dì la franca avà eiu m’intargu
S’è tù sè di I Peri o di L’Acquale !
Ci hè da cunfonde sin’à a to razza,
S’è tù sè Acquaviva o Barazza !

À un puetu di a to statura,
À cantà in disprezzu ùn li sende.
Dici ch’eiu ùn cunnoscu a natura
Ma a to puesia nun m’affende :
Babbu è mamma essendu muntagnoli
Chì voli ch’elli sianu i figlioli ?

Solu ùn ci andaraghju più pè ste machje,
Perchè i to cunsigli sò sinceri,
Ùn temu corbi nè mancu curnachje,
Ma ùn vogliu ch’è tù porti pinseri,
U to stomacu dici innacciaghjatu:
Ùn vularia ch’ellu fussi ulceratu!

È postu ch’è tù t’inchieti per mè,
Qualchì cunsigliu ti daraghju anch’eiu:
Ùn ci andà mancu tù caru Dumè
Solu in la machja è tuttu andarà megliu.
Avà hè ora di girà stu fogliu,
Daretu spiicazione dà ti vogliu…

L’Aiaccini ma chì sà s’ella hè vera ?
Anu vistu un arcefalu di ghjattu…
Paria tuttu una pantera nera²,
S’è tù a scontri stà ti puru ciattu !
Chì s’ella ùn s’hà ancu magnatu à nimu…
Ùn vularia ch’è tù fussi u primu !

Guarda o Dumè, chì tanti prunalbelli,
Sè tù chì ai da finisce in calzunetti !
Quant’è i lupi si magnanu agnelli,
Quant’è e volpe scannanu capretti,
Sappia chì a pantera l’omi si magna,
S’ella i trova soli in la campagna !

Or dunque nu u circondu d’Aiacciu
Fà casu à a pantera machjaghjola !
Ùn crelgu micca annant’à u mustacciu
Ch’ella temi un colpu di piscaghjola…
È inquanti à mè sarà ancu famita,
Dunque o Dumè, tù, ùn li circà lita !

S’è t’ai u fucile : lascia corre !
Chì mancu avarè tempu à coglie mira !
A sai ancu tù chì u cacciadore
Quand’ellu trimuleghja accantu tira.
Iè o Dumè ùn ci vole ch’è tù credi,
Ai da trimulà da capu à pedi !

Avà vogliu dà fine à sta risposta,
Stampu stu fogliu è incù mè u pigliu.
Ùn vale a pena ch’e u mandi per posta,
À u fattore ùn vogliu dà fastidiu,
U ti daraghju eiu da propia manu
S’e ti trovu in fiera di Bucugnanu.


____________________________________________________________________

(1) invece pè i funghi mancu Ghjuvan Filice pò luttà, a prova :



(2) http://tempsreel.nouvelobs.com/societe/20020902.OBS9494/une-panthere-noiredans-la-nature-corse.html

Mi campu ! Grazie tante !

Oh i mei !!!! :shock:

Ruclinonu Solechjari a écrit:

Oh i mei !!!! :shock:

oimè per u fornu incastratu di Circione o per u so frigò americanu ?