Puesie di Ruclì

Una cunneria ch'aghju scrittu avà

Citation :

U cantu di a natura
Risplende quante u sole
U muscu di l’aria pura
Pare mille farandole
L’esse si face altura
S’esaltanu e parole.

Ballanu milli culori
Creandu un armunia
Un ghjuvellu di savori
Curunatu sinfunia
Una mansa di splendori
Divina cosmogunia.

U ventu hè un incantu
Casone di puesia
Chì vole stridà u vantu
D’un mondu di fantesia
È cun curraghju tamantu
Sublimà a parusia.

U mare hè un imperu
Grande hè a so putenza
Signore ghjustu sinceru
Carcu di magnificenza
U più grande messageru
Sparghjendu beneficenza.

U fiume hè un ardore
Chì trionfa di a morte
Arcanu viaghjatore
Chì franca tutte e porte
Simbolu caru d’amore
A to essenza hè forte.

A furesta maestosa
Ci rigala prutezzione
A so aura altosa
Face nasce emuzione
D’una manera untosa
Quasi quante perfezzione.

Tal’un diu hè u monte
Cù u so capu bianchitu
Pare sfidà l’orizonte
Cun putere infinitu
Fendu nasce tante fonte
Da u so fiancu fervitu.

Bellu hè u nostru mondu
I so chjassi naturali
Da a cima à u fondu
Hè tuttu un festivali
Di tesori hè fecondu
Di piaceri immurtali.

Bella cunneria, ben' riesciuta in tutti i casi

hè vera...

Grazie mille per sti cusì belli cumpiimenti !

s'è tutte e to cunnerie sò cusì, n'aspettu d'altre

Esaltazione puetica

Quellu vinti trè d’aprile
Fermerà in a memoria
Cum’un ghjornu ochjanile
Per andà à a vittoria
In Furiani, quessa sera
A squadra era arritta
A fede era sincera
Cusì a storia s’hè scritta.

In a mente isulana
Più ch’un ghjocu di ballone
Hè una mossa suprana
Una cummuna passione
Simu tutti adduniti
In stu tamantu fervore
Chì ci rende accaniti
Chì tocca u nostru core.

Dop’à tanti belli mesi
Eri, a cunsecrazione
Schjattò in tutt’i paesi
Cun tamanta emuzione
U Sporting s’hè discitatu
A festa era totale
U benestà s’hè stallatu
À livellu massimale.

Ùn simu più in u fondu
Ne manc’in sticchidardena
U successu hè prutondu
È a gioia si scatena
Daretu à sta bandera
Sim’una sola persona
Di a so squadra trafiera
Chì mai ùn l’abbandona.

È in Prima Divisione
Ci simu ghjunti infine !
Piccula revoluzione
Ma puru senza lustrine
Ùn c’hè più nisun sfarenze
Chì simu tutti fratelli
Sò piantate e lagnenze
Grazi’à i stinti ribelli.

Per una volta inseme
U populu hè alegru
Alzate e nostre speme
U nemicu hè pilegru
U stadu pare risplende
Di l’ambienza di letizia
Chì senza piantà si spende
U spiritu in delizia.

Da Furiani à Bastia
Ribombanu tante lode
Sbarazzata di l’angustia
A nostra gioia esplode
Simu noi vincitori
Ma a strada ùn hè fatta
Alzem’i nostri fervori
Nantu à sta strada matta.

Pienghje a mio mente, è u mio core
U crudellu ventu, quì sì scatena
Lampendu contr'à mè, tutt'u so furore.

A sperenza hè morta, ma socu vivu
Puru tuttu svenatu, à l'agunia
Di u fiatu sacratu, eiu sò privu.

Cusì amare hè, a nostra via
L'umanità hè un ceppu furtivu
Chì campa cusì pocu in allegria.

Sò murtulitu, senza nisun succorsu
Sì sò svanite quelle mio forze
Singhjozza u me core senza nisun sperenza
Quì sì compia u cantu, di tutt'una vita.

Sì tù


Sì quì cun mè, è tuttu hè smaritu
U malannu si pianta, stramurtitu
Cun tè, o cara, cun a to presenza
Rinasce a mio sperenza.

Ùn c’hè più bughju, è ùn c’hè più dulore
Tù ai appaciatu u mio furrore
Sì tù, u sole di u mio caminu
Schjarisci u mio destinu
Luce di a mio ghjuventù
Sì tù.

Sì tù, amica, sì a mio surella
Per mè risplendi quante una stella
Cun tè, a vita ridiventa bella
Mai più ùn vacella.

O perchè sperà firmà vivu
S’e di tè socu privu ?

Chì tù sì tù, u fiatu di e mio ghjurnate
Sì tù u fiore di e mio pinsate
Quasi l’unica ragiò di campà
Sì tù, sì tù, ti tengu cara.





Si canta nant'à u versu di sta canzona quì :

ùn hè micca quella ch'ai cantatu l'altra sera in Corti o mi sbagliu?

Innò. Quessa, hè nova.

È tengu di precisà ch'ùn hè manc'appena una puesia/canzona d'amore.

poi mette ancu l'altra

Sì quì cun mè, è tuttu hè smaritu
U malannu si pianta, stramurtitu

sti dui filari mi piacenu assai!

Mi face piacè s'ella ti piace.
Quandu aghju un mumentu, mettu l'altru dinù.

Basgiu d’amore


Quandu omu scontra l’amore sinceru
Per adduniscecci in un accordu veru
C’hè qualcosa à fàne, chì monda ci sgoia
Bramu un veru basgiu d’amore
Per pudè fà batte lu mio core
Chì m’arrecherà una tamanta gioia
E to labbre seranu dulcezza
In quessa stonda di tennerezza
È l’amore serà senza fine
Ne seremu à u so culmine.

Si quella ch’aghju tant’aspettata
Fin’à tandu, t’avia bramata
È l’amore serà infinitu
Sempre cun ardore
Per u nostru core
Quessu mai ùn serà smaritu.

<iframe width="560" height="315" src="https://www.youtube.com/embed/3vsxZ7Xzfbs" frameborder="0" allowfullscreen></iframe>

Nant’à u reame fiscula u ventu
L’aria frescu vole cuntà cun talentu
Una bella storia ch’o bramu di capì
Una testimunianza ch’ùn sì pò rapì
Una bella fola empiita d’incantu
Colma di magia, d’estru fiaricantu
Di tempi antichi, o quelli à vena
Ùn a sò, ma u so missaghju sumena.

Quellu dolce ventu face custì ballà
L’erba è e piante, fendulle sfarfallà
Cun serenità è cun dilicatezza
Cun a grazia pura sempre cun dulcezza
Quì u populucciu face a so festa
In a felicità, a gioia celesta
O quant’hè bonu di sunnià in a pace
In un mondu duve u male si tace.

U ventu arreca custì tanti nuli
Franchendu i monti, altosi pesuli
Inculuriscendu u celu turchinu
D’una tinta strania d’ariu crimisinu
Pittura empiita di malincunia
Da venti cantendu cun parsimunia
E dolce putenze di l’alba natura
Chì mi face sunnià à l’ora più scura.

Ci sò l’arburoni chì mi murmuranu
Un puema dolce d’un tempu arcanu
Per cuntàmmi chì sò l’antichi signori
Vulendummi svelà i so degni cori
È testimuniàmmi di a so altezza
Di a so putenza, è a so fierezza
Di a so suffrenza, di a so ferita
Insegnàmmi propiu tutta a so vita.

Daret’à i nuli, u sole diafanu
Lucendu principe in celu morganu
Si face più dolce, diventa pietosu
Un amicu ch’ùn hè più periculosu
U fiume correndu mi ci vole cantà
A canzona sacra ch’ùn si pò fà piantà
Ma ch’ùn possu capì, alta divinità
Ùn sò ma mi piace sta musicalità.

Canta dinù sta canzone u ghjargale
Di a natura l’innu universale
Mi ritrovu in alta esaltazione
Attempu stranieru è in cummunione
È avà sò chì l’armunia naturale
Hè più pudente ch’e u mondu materiale
Supranendullu incù a so magia
Anneghendu cusì a so alterigia.

M’innamoru di stu mondu d’illusione
D’armunie nascoste di sensazione
Di milli culori muschi è rimori
Mi piace stu mondu fattu di splendori
Natu di meditazione, ideale
Quandu u sonniu ci vince u reale
Nasce in mè un benestà maestosu
Supranendu u maldestinu furiosu.

Vurriu campà sta visione umana
Più vivu ch’e vivu a mio vita sana
Sempre campà in stu sonniu d’amenità
Piuttostu ch’e vive in a realità
Tandu mi rimettu arrittu subitu
U mio viaghju, tandu, perseguitu
U core tristu ma sperendu rivene
À ste stonde di sonniu cusì serene.

O Luna dolce in u celu turchinu
Chì si spechja nant’à u pratu marinu
Sta sera sì tondula quante un ochju
U to sguardu biancu face ch’o mi scrochju.

Hè quandu si piena chì sì a più bella
Chì mi pari una diva damicella
Una dea chì risplende in u celu
Chì mi vurria parlà, fàmmi un svelu.

Sò chì vurrii parlà à u mio core
Palisàmmi i sicretti di l’amore
A mio mente mi conta sta fantesia.

Puru a to voce, ùn a possu sente
Ch’ùn socu micca à bastanza sapiente
Solu ti possu scrive sta puesia.

Vogliu dedicà ste rime
À tutti i Corsi corsi
A mio upinione sprime
Anant’à i so discorsi
Quelli chì sempre pensenu
Esse più corsi ch’e l’astri
Chì più puri si credenu
Mentre ch’ùn sò ch’e pullastri.

Parlanu di razza pura
Quante in l’anni quaranta
È pò di sterpa sicura
Ella sola sacra santa
Si surveglianu tra d’elli
Per vede quale pò esse
Quellu di i so drappelli
U più corsu senza sfesse.

Anu qualche cuniscenze
Ch’e ammaestranu bene
Ma senza intelligenze
Per à capìlle parvene
Ma colmi di bafachjera
Quasi quante pappagalli
Ripetenu à a tichjera
I stessi detti tan calli.

Sapenu tutti i stridi
Chì in ogni circustenza
Devenu lampà altidi
Cun forza è viulenza
Ma ùn cunoscenu spessu
U so veru sensu fondu
Li sembra un gran successu
I so stridi per u mondu.

Tenenu qualchi mudelli
Ma senza capisce nienti
Credenu esse ribelli
Ma ribelli deficienti
Elli sò belli luntani
Di tutt’e so riferenze
Assai sò capalfani
Ben spruvisti di sapienze.

Spessu elli sò sbacconi
Incù a so andatura
Mustranu chì sò buffoni
Curanu a so vestura
Sò elli i versi Corsi
Corsi di caricatura
In bocca anu i morsi
È a mente chjocchidura.

U so odiu hè sinceru
Contr’à tutti l’altre ghjente
Ch’ùn hè micca corsu veru
Chì cum’elli ùn si sente
Astianu cio ch’ùn hè corsu
Ma chì li ghjova quantunque
Ancu puru di ricorsu
D’una manera qualunque.

Fieri di a so nascita
Chì puru scelta ùn anu
Ma a so sola vincita
Hè d’esse di quessu granu
Fieri d’esse elli stessi
Cio ch’ùn hè una qualità
Pochi meriti ch’e quessi
Ma chì trista futilità.

Sò elli di razza pura
Dapoi generazione
Ùn anu altra primura
Ch’e per quessa cundizione
Neganu ogni valore
À tutti l’altri umani
Senza spiritu ne core
O quante quessi sò vani !

Ùn cunoscenu da veru
Nunda à l’Anima Corsa
O solu un palmu scheru
Tuttu viotu di risorsa
Ghjust’assai elementi
Per pudè dà l’illusione
Ch’elli sò corsi stupenti
Propii omi d’eccezzione.

Ùn aghju nisun rimorsi
Per dì solu quess’affare
À tutti sti Corsi corsi
Incù u mio calamare
Sparghje a cursitutina
Hè quì un bellu prughjettu
S’ella ùn si cuncatina
Incù l’odiu predilettu.

A Mente Corsa ùn tene
Per l’osa nisuna piazza
Solu odia e catene
Nisun lode di a razza
Tale hè a mio parola
Ma pensu ch’ùn mi capite
Chì di a raghjone, sola
Spruvisti mi ne parite.

Sunettu à a Luna
mi piace a to puesia, cusì semplice è dolce!

di sfughjita a écrit:

Umbeh o Ruclinò ai fattu i passi di giganti per dì cusì bè in puesia è rime toie ciò chì u più ti move è ti cummove oghje chì hè oghje cù tutta a bassura è li scumbuglii di lu spaziu umanu... !

O Di Sfughjita ai a raggiò!
o Ruclì a to scrittura pare scambiata, più matura, più "diretta", "sicura" (ùn sò micca si riescu à fà capì )
Aspittemu i to prossimi scritti

(una dumanda ch'ùn hà nunda à chì vede :oops: : ùn puderebbi micca mette e to storie di ODS nant'à Isula, quelle publicate à l'epica di l'anzianu foru? sarebbe un piacè di leghje le torna :oops: )

Grazie mille per stu bellu cumpiimentu chì mi cumove assai per una puesia, puru assai ordinaria, à contu meiu.

Lamentu dedicatu à stu pesciu cappellu ritruvatu mortu, parechji anni fà, nant’à a rena di u Capicorsu.


In l’oceanu turchinu
Si tù frà i più pudenti
O signore andarinu
Cun i to estri ardenti
Tutti sò impauriti
Cun a to sola presenza
O rè carcu di meriti
Principe senza temenza.

Tù di a to zitellina
Ne ai qualchi ramenti
D’un epica cristallina
Senza guaii ne turmenti
T’aspettava tutt’un mondu
Di viaghji l’andatura
O signore vagabondu
Chì chjamava l’avvintura.

Prestu maiò divintatu
In l’oceanu immensu
Longu ai caminatu
In u turchinu intensu
Andà sempre più luntanu
Eranu què e to brame
À scopre u mondu sanu
U to unicu reame.

Tù sì un veru signore
Vestutu di nobilezza
Chì sà cosa hè l’onore
Cun leghjitima fierezza
Ma ùn sì micca fumutu
Cunosci u to valore
Di pompa ùn sì gulutu
Ùn cerchi nisun favore.

Dicenu ch’e sì feroce
Si temutu cun ghjustezza
Ùn ti loda nisun voce
Esecratu cun certezza
Puru l’unica ricchezza
Ch’e brami in a puvertà
Hè d’esse, cun sicurezza
Hè di campà in libertà.

In l’immensu oceanu
Vagabondu sulitariu
Ci campi cum’un suvranu
Cun un ceppu millenariu
Aspru ancu certe volte
Campi in a serenità
À scappà d’ogni cuncolte
Di quell’umana scimità.

O ma chì gattiva sorte
In quell’acque t’hà purtatu
Per scuntràcci a to morte
Frà stu mare rifreddatu ?
Perchè quì esse venutu
Fra tanti pescii sfarenti
In stu locu scunisciutu
Arrechendutti turmenti ?

Quì a vita t’hà lasciatu
In un lugliu di calore
Mortu quì t’anu truvatu
Senza soffiu ne ardore
Nantu à a rena grisgia
Chì tandu t’hà ospitatu
Per fàtti una camisgia
Per u to ultimu fiatu.

O signore andaccianu
Oghje ti ne sì andatu
Di quessu mondu anzianu
Versu quellu sublimatu
Troppu t’anu malamatu
Era piattu u to core
Nimu ùn era firmatu
À sapè u to valore.

T’anu odiatu à tortu
Senza cunoscetti bene
Ma eiu, eru accortu
Sapia tutt’e to pene
O spavintosu signore
Leale, carcu di fiertà
Cun a ricchezza maghjore
Chì si chjama a libertà.

Marchjendu per i carrughji
Di a mio terra amata
Sentu silenziosi mughji
D’una mente aggrundata
Per sti chjassi naturali,
Nant’à e strade d’asfaltu
Tanti lochi immurtali
In noi à u più altu

Aghju vistu maraviglie
Centu palmi di splendore
Di felicità vermiglie
Chì appacia u mio core
Musca a panarmunia
Stu ghjuvellu di sperenza
Tale una sinfunia
Un soffiu di quintessenza.

O ventu di finardore
Acqua cantendu libertà
Monti splendendu l’amore
Mondu chì si chjama fiertà
Tuttu si ritrova unu
In a pace di a mente
È puru firma ognunu
D’ellu, di tuttu, cuscente

Ci aghju vulsutu vede
Magnificà a bellezza
Per infine pudè crede
À stu mondu di dulcezza
Quellu mondu ch’ùn si dice
Realità tan’sacrata
Maravigliosu fenice
Verità augurata.

Chì si vede, si risente
È chì puru ùn si pò dì
Sicrettu opalescente
Mondu ch’ùn si pò trasgredì
Nisun chjama ne palesu
Ùn hè mondu veridicu
Ascosu, quasi diffesu
Hè u mondu pueticu.

Tandu mi sò dumandatu
Cosa hè a puesia
In sonniu mi sò svegliatu
Bagnatu di parusia
A dumanda hè firmata
In un illuminazione
È cusì s’hè esaltata
A mio imaginazione.

A musica di i detti ?
A dulcezza di i soni ?
Un sonniu fattu sunetti ?
Un mondu riccu di doni ?
Tante lettere ballendu ?
Un spiritu chì s’infiara ?
Un anima stantarendu
Curunata d’una tiara ?

Pensu chì à contu meu
Hè cusì a puesia
Un spiritu aereu
Rilucente d’ambrusia
Hè què, tuttu què, mi pare
Ma què ùn hè micca solu
Fattu d’armunie rare
Per alluntanà u dolu.

Pensu chì dinù si vede
Un muscu indicibile
Chì à l’incantu accede
Chjave di l’impussibile
À a magia ghjunghjemu
In questu mondu umanu
Oscuratu da u tremu
Appannatu da l’affanu.

Per quessa, a puesia
Ùn deve avè paura
D’esaltà a fantasia
Di risplende d’un aura
O d’ùn avè sensu chjaru
D’invintà parole nove
U puemu hè più caru
Fora di chjassi è prove.

A puesia libera
Ùn hà ch’e un solu sensu
Ch’e in l’emuzione vera
È u sintimu intensu
Chì in u so pettu sbuccia
D’un intimu sublimatu
Cume da una fatuccia
Splendore magnificatu.

È l’essare si sublima
In mente di u scrittore
È s’esalta quella rima
In l’ochji di u lettore
Pocu imprema u sensu
È pò dinù e parole
S’ellu c’hè piacè immensu
È l’estru ch’ellu ci vole.

petra alta a écrit:

di sfughjita a écrit:

Umbeh o Ruclinò ai fattu i passi di giganti per dì cusì bè in puesia è rime toie ciò chì u più ti move è ti cummove oghje chì hè oghje cù tutta a bassura è li scumbuglii di lu spaziu umanu... !

O Di Sfughjita ai a raggiò!
o Ruclì a to scrittura pare scambiata, più matura, più "diretta", "sicura" (ùn sò micca si riescu à fà capì )
Aspittemu i to prossimi scritti

(una dumanda ch'ùn hà nunda à chì vede :oops: : ùn puderebbi micca mette e to storie di ODS nant'à Isula, quelle publicate à l'epica di l'anzianu foru? sarebbe un piacè di leghje le torna :oops: )

Vi ringraziu traminduie per e vostre parole cusì dolce à l'intenzione di i mio corcii scritti.
Cuncernendu l'avvinture d'ODS, a possu fà, ma ci vole à sapè ch'aghju riprincipiatu a so scrittura di manera più, più matura ghjust'à puntu, è ch'ùn aghju compiu per avà.
In tutti i casi, ci riflettu.

Ruclinonu Solechjari a écrit:

Vi ringraziu traminduie per e vostre parole cusì dolce à l'intenzione di i mio corcii scritti.
Cuncernendu l'avvinture d'ODS, a possu fà, ma ci vole à sapè ch'aghju riprincipiatu a so scrittura di manera più, più matura ghjust'à puntu, è ch'ùn aghju compiu per avà.
In tutti i casi, ci riflettu.

fà cum'è tù poi, piglia u to tempu, ma sarebbe propiu cù piacè!