Puesie di Sidussincu

A a dumanda generale di Circione, mettu quì qualchì puesia, ma per u più, aghju scrittu per anniversarii, nascite, morte o picculi evenimenti. Per u più sò puesie per ride, mi pare più faciule à fassi. Cumenciu per mette torna quì quella di l'elezzione di u Prisidente.


L’elezzione di u Prisidente di a Republica francese – maghju 2012



Di tutti sti candidati
Chì n’avaremu da fà
Cercanu tutti li mezzi
Per avè a magiurità
Noi ùn li vutemu micca
E li lascemu parlà.

O s’ella c’era una amenda
Per ogni buggia cappiata
Pensu chì più d’una volta
Falaria ma cudrata !
Tutta la candidatura
Ne saria sbaiuccata.

Prima vogliu ammintà
L’arichjutu di l’Elisea
Cinqu’anni ch’ellu s’arrizza
Sempre cù una nov’edea
Pè zappà nu u bangatu
Hè di novu candidatu.

A stà à sente à Sarkossu
Hà già salvatu u mondu
Anc’à pedi nu u fossu
Un si vole vede in fondu
U ci prisenta quadratu
L’affare quand’ellu hè tondu !

C’eranu candidatelli
Diputati è ministri
Giravanu intornu à elli
Butinisti è Vilpinisti
Anu ragiuntu u primu
Senza troppu ch’ellu insisti.

Ma lascemu po’ ssa ghjente
Lampemu un sguardu à a manca
Hollande ghjè seguitatu
Da una truppa bella stanca
Quellu pè ghjunghje à u tronu
Quant’hè ch’ellu pesa l’anca !

S’o vuteraghju per ellu
Cù pecure, capre è mucche
Mi misurgu è dubiteghju
S’aghju da rinfurzà e truppe
Forse ci zapparà menu
Ma ci zapparà quantunque.

Dopu c’hè ssu Mélanchon
Arrabiatu cum’un cane
Vole spuglià i ricconi
Ma ùn sò s’è l’hà da fàne
E prumesse, dopu elettu
Parenu sempre luntane…

Nu u chjosu socialistu
Ci hà apartu una callaghja
Sortanu e pecurelle
Ogni volta ch’ellu abbaghja
Ma riturneranu prestu
Videndu u latte ch’ùn caghja.

Ci sarà quellu impiegatu
Licenziatu da l’usina
Chì n’andarà cum’è sempre
A fassi un frullu à Marina
Suguitavanu u babbu
Suguitanu a figliulina.

Pare ch’ella appii manghjatu
E forche in aziminu
Hà frustatu li so scarpi
Sempre in listessu camminu
Vole caccià u strangeru
Chì zappa lu so giardinu !

Un parlaraghju d’Artaud
E nemancu di Poutou
Chì piglianu à capu in ghjò
E Dupont-Aignan dinù
Ma mi tocca à dì qualcosa
Di quellu François Bayrou.

Cinqu’anni fà mi paria
Un omu più chè fundatu
Quist’annu, cumu si face ?
Pare più chè disinnatu
L’astra volta era u terzu
Ma oghje sarà falatu !

C’hè lu partitu di l’erba
Chì face candidatura
Ma la so ghjente hè macerba
- Fruttu verde ùn hè maturu ! -
Per viaghjà in bissicletta
Va listessu nu u muru.

U più stranu sarà forse
Ssu scemu di Sciaminatu
Fà chì pè pudè cuncorre
Pè u carminu hè passatu ?
Quand’ellu era nantu u tettu
Pensu lu sole hà pichjatu.

Si vede subitu subitu
Ch’ellu hè liatu à a funa
Face appena cum’è tutti
Prumittenduci a luna
Ma sarà ancu più pazzu
Chì ci prumette ancu Marzu !

Di parlà s’elli anu l’asgiu
A cosa hè più chè chjara
Un hè micca à u più chì face
Hè à u più chì dichjara
Ma quella di i « sondages »
Quandu fala nùn si para.

Parlanu di carne Hallal
Di permessi di cunduce
In pettu à u « chômage »
Hè quant’à spillà e puce
Facenu cum’è a farfalla
Chì gira intornu à a luce.


Girate u primu giru
Belle techje di duttrine
Ma sappiatevi cunnosce
O siate più maligne
A farfalla ch’hà giratu
Spessu si brusgia à a fine !

SIdussincu.

A l'occasione d'una dumanda d'un amicu, avia lampatu una chjama à Rcfm per sapè cumu si dicia "le porte-bois" (per piscà) in corsu.

U porta-legnu sidussincu

Eiu mi stava tranquillu
In fondu di Barcalellu
In paese di Sidossi
Di Niolu cusì bellu
Ma Antone u piscadore
Ch’hà cuminciatu, fù ellu…

Incù un certu Ghjuvan Lucca
Sò chì parlanu di mè
Sentu u ribombu in paese :
« U so nome, cumu hè ? »
Rifletti chi ti rifletti
Ma ùn la ponu sapè.

M’anu chjamatu patracca
E po dopu tapparozzu
Un ci capiscenu un acca !
Eu mi campu in lu pozzu
E staraghju acqua in bocca
Zittu è mutu è lingui-mozzu !

Po Ghjuvan Lucca s’hè dettu :
« A risposta hè nant’à l’onde…
Truvaraghju à qualchissia
Chì mi pudarà risponde »
E cusì in giru à mè
Frazanu parechje stonde…

Avà a Corsica sana
Ghjunghje è mi rompe a pace
U pesciu quand’ellu passa
Anc’ellu ùn si sà più tace
Ma quessa a cunversazione
In veru pocu mi piace…

Cumu s’ella mi mancava
M’anu lampatu acqua addossu
A u più chì battizzava
Anu fattu u cuncorsu
Aiò ! arristate appena !
A chì ghjova tantu sforzu ?

A chì dice « porta-legnu »
Chì parla di u mio « stucciu »…
Quessu sì hè u mio pegnu
Anu a ragiò, ghjè bellucciu
Ma senza u mo travagliu
Un valìa un cartucciu !

Omu chì ti credi astutu
Lascia corre u to fume
In l’onda ti porghju un spechju
Sperendu di fatti lume :
O cum’è tu marchi bè
Incù la to lenza in fiume !

Sidussincu.

Parigi

Cum’ella hè strana Parigi
Cù li so venti ghjalati
Ci sò tanti nuli grisgi
Tutti inseme imbulighjati
Cum’è d’elli i paisani
Si mischjanu è sò snumati.

I chjamanu « citatini »
Ch’ùn li pare mancu male
Diventanu bocchi-fini
Quandu cala u capitale
E cambianu li so panni
A prisenza hè sò chì vale !

Stroppianu ancu lu so nome
E quellu di u so paese
Paura d’un esse capitu
Senza l’accentu francese
Pè schisà u sforzu à l’astri
Piglianu tutte e spese.

U rimore d’ogni stonda
Regna quì da gran maestru
L’anima n’hè intrunata
Si ne scappa ancu l’estru
U puetu hè senza aiutu
Custì u silenziu hè mutu.

U sole si face scarsu
Affacca è dice : « mi scusu »
Smarritu appena apparsu
Lascia tutt’omu cunfusu
Cum’è u fruttu paspatu
Ch’ùn ne resta chè u gustu.

Più nunda ùn hè naturale
Tutta cosa s’almanacca
Pè chjachjarà cù l’amichi
Ognunu hà la sò tacca
Quelli ùn si vedenu più
Senza piglià rendez-vous !

C’hè miraculu di cose
Da fà, ma s’ellu si pò
A l’Opera, à u teatru
Vi si pare d’esse un sgiò
Ma trafalate di più
Ciuttendu nu u Metrò.

Certi ci sò stabiliti
Ch’anu lu so pane cottu
D’astri strazianu in carrughju
Nu i cartoni à l’aggrottu
C’hè richezza è c’hè scarsia
Ma nùn si facenu mottu.

Pigliate ssa bella casa
Cù la so corte adurnata
Quandu sorte u patrone
A billezza hè sculinata
Ma nùn si pò cuntimplà
Senza u codice d’intrata.

U populu, quì, un ghjornu
Rè ùn ne vulìa più
Hà mughjatu « Libertà ! »
E a libertà ci fù
Oghje u regnu di u Soldu
L’hà rimessu in servitù.

Una statula chì spicca
D’una battaglia landana
Ma nùn vi scurdate micca
Ssa petra hè di carne umana
Tantu a sciabula s’alza
Tantu à voi astri v’abbassa.

Certi a vi prisintaranu
Cum’è un calice di messa
Pè d’astri hè un paghjulacciu
Ch’imbulicheghja a tristezza
Visitata da museu
Certu ùn hè vista listessa.

Avà nùn mi crederete
S’o vi dicu chì mi piace
Hè cusì fattu u cristianu
Ch’à tuttu ci si cunface
Eppuru ùn la sceglierebbi
Per gode l’eterna pace.


Sidussincu, lugliu 2012

U ghjallu arghitu

Vi prisentu lu mio ghjallu
Hè bellu ma ùn parla tantu
Porta le so belle piume
Incù la so cresta nantu
Ma hè finitu lu tempu
Ch’era bunu pè u cantu.

Quant’ellu scantarizzava
Da a sera à a matina !
In vittura lu purtava
Pè circalli una ghjallina
Cridia d’esse à la Scala
Un era ch’à Santarghjina.

Cum’ellu facia sente
Sempre listesse canzone
Lu mandai in Cuntinente
Ch’ellu pigli e lizzione
Un ghjallu di ssu valore
Purria fà lu tenore !

Avà ch’ellu apre a bocca
E chì u publicu u fideghja
L’avemu messu i denti
Què a ghjente l’apprezieghja
Cusì à u primu freddu
Avale e sciacchitteghja.

In chì statu l’aghju trovu
Quand’ellu hè voltu in Sidossi
Incù a carne pullina
E trimendu sin’à l’ossi
Amu pruvatu u sciroppu
E prigatu ch’ellu ùn tossi.

U mo ghjallu niulincu
Chì ghjera cusì incristitu
Priparatu era à cantà
Avà si ritrova arghitu
Anu da dì : « Ma chì li stalba
In ssu ghjornu in Petralba ? »

Un si parla di contre-ut
Nemancu di si bémole
Ci hà prumessu un bellu cantu
Ma vecu chì Diu ùn vole
A ghjente anu da pinsà
Ch’ellu ùn n’hà contu chè fole.

Vulia armà u cantu
E purtà u sirinatu
Si ritrova ind’un cantu
Frustu, tristu è incassiatu
E pienghje lu cuntintinu
Ch’ùn sarà mai incasciatu.

Ma lu più chì mi dispiace
Lu più chì mi dà fastidiu
Mentre lu meiu si tace
Canta quellu di Marsiliu
Chì si rallegra eppo’ pensa :
« A suprana eu ti pigliu ».

A ch’hè in pompa è face fume
A ch’hè strettu di cannella
Ognunu hà u so lume
Ognunu hà a so stella
Ma si ponu truvà inseme
Pè cantassi una paghjella.


Sidussincu.
Pè a ghjurnata di Dite a vostra in Petralba u 26.01.2013

U cuntintinu : parolla petralbinca per parlà di u "pourboire" chì si dà à un zitellu chi v'hà fattu una cummisione.

Nantu à stu ritrattu di l'ultima volta chì un mè paisanu hè vultatu in paese, à novanta passati anni.




U ghjargalu

U celu chì n'hà tantu ci lampava u so lume
E indè l'ochji d'ognunu punia l'accendume
Passavamu una stonda indè stu Tempu lebbiu
Chì si ne và in fume fendu anc'ellu u so debbiu.

In fondu di e scale ch'ellu ùn pò più cullà
Nobule s'arricorda di a ghjente d'insù
E parla cù noi astri ch'ellu hè ghjuntu à truvà
Di quelli chì ci sò, di quelli ch'ùn sò più.

A voce inghjargalata cum'ella hè sempre stata
Ribomba nantu e petre chì a cunnoscenu à fondu
E face in le so loche l'ultima spassighjata
Chì Sidossi per ellu hè statu u veru mondu.

Ci porta a so risa è u dettu di tandu
Pruvatu centu volte, a sà ch'ellu ci tocca
Chì tante voce antiche volenu u cummandu
E si battenu inseme pè francà a so bocca.

Un ghjargalu di vita chì corre sempre grossu
Annacqua torna appena quellu chì u sà torce
Per u meiu u giardinu, eo facciu cum'e possu
Tandu l'aghju innacquatu incù l'ultime goccie.

Sidussincu. 5.06.2013

Per Maria Leandri

C’ete chersu una prighera
È prighere ùn ne cunnoscu
Ma truveraghju a manera
Di fà lume innù u foscu
Circaraghju nu u mio core
Cuminione incù u vostru.

Surteranu e parolle
O forse nentru staranu
Chì sà so chì Diu vole
Per ogni core cristianu
Quandu sò chjamate l’ore
L’omi tutti si ne vanu.

U duttore incù mistieru
Porghje aiutu è assistenza
Ma u prufondu misteru
Un ghjunghje à a cunniscenza
L’omu casca in addisperu
Videndu ch’ùn hà putenza.

U ghjornu quandu si parte
Pare chì nulla si resta
Ma a parsona chì sparte
O puru quella ch’impresta
Lascia à l’altri a so parte
Eppo’ si ne và più lesta.

Cù so chì c’ete lasciatu
Un pisarete più tantu
In lu Celu lu più altu
Truvarete u vostru cantu
U spiritu sarà spartu
In un locu cusì tamantu.

Starà sempre una lea
Qualcosa cum’un ribombu
S’è vo’site più liggera
Noi pisemu quant’è piombu
Cù a vostra voce in l’idea
A tempu dulcezza è tonu.

Parlavate di u Tempu
Dicendu ch’ellu s’adopra
Noi simu sempre nentru
Voi sete digià sopra
Ma a fede incùn putenza
Corre u spaziu eppo’ l’inoltra.

Sidussincu. Farraghju 2013.

Bravu!!!       
mettane puru torna qualchì una! – cumm'è quella ch'è tù m'ai dettu di u topu.


  

ghjè un veru piacè di leghje ste puesie! cum'è a dice Circione spergu chì ci ne sarà prestu d'altre   

Belle e to puesie o Sidussincu !  

Mettine d'altre sì tù l'ai.  

Eccu l'ultima. Torna una puesia ridicula nant'à ciò chì c'hè accadutu di pocu... Tuttu hè pusitivu quì.


U topu


Una sera di nuvembre
In casa c’hè ghjuntu un topu
L’hà truvata à gustu soiu
Si s’hè dettu : « Avà ci stocu ! »
E per pudellu scaccià
Hè durata un bellu pocu.

O quantu st’animalottu
Ci hà fattu cresce l’affanni !
Ma ci vole à ricunnosce
Ch’ùn hà fattu tanti danni
Hà runzicatu u cartone
Zenza tuccà i lasagni.

Una sera, palisatu
Piglia scappa eppo’ s’asconde
Inghjilocu amu pichjatu
In manu sunghji bastone
Ellu, piattu, stava à sente
Stu tazzu di Pilutone.

C’hè da avè i pinseri
C’hè da perde u so calmu
L’hà faciule u piscatore
Quandu u pesciu morde à l’amu
Ma andarete à circà
Un topu d’un mezu palmu !

Mamma diventava scema
Spulava più chè u ventu
Per tuppà ogni tafone
Babbu n’hà fattu, cimentu !
Ma soca intria pè l’usciu
Aspittendu u so mumentu.

Tutt’ognunu in paese
Ci dava u so cunsigliu :
« Eiu po’, fendu cusì
A tuttu colpu i pigliu ! »
Ma Ficcarellu, più fine,
Passava à ogni ciarnigliu.

Trappule ci n’era tante
Tra grosse è chjuculette
Un diavule di mascina
Cù cinque o sei tappette
Inghjuna cù u so lardu
Scucinatu à fette à fette.

A l’amu pruvatu crudu
A l’amu pruvatu cottu
A ci aviamu criduta
Chì u nostru amicu era scioccu
Invece un tuccava nunda
Stu pezzu di malignottu.

Quant’à mè avà i topi
Anu amparatu à a scola
A sfidassi di u lardu
A schisà a ghjattarola
E à stà indù i tafoni
Ch’ùn ci entre mancu a cugnola.

Hà tastatu u buccone
Ma ùn l’avarà fattu male
Cù trè sosule sfarente
Per un risultatu uguale…
Pò dassi chè i tupichji
Anu anc’elli u so spiziale ?

Ne parlavamu u ghjornu
A cena è à cullazione
Ne suniavamu a notte
Circhendu una suluzione
Intantu a si passava
L’amicacciu Runzicone.

Una mane di bon’ora
Ci s’eramu messi in trè
Babbu cù a spazzula in manu
Ne pichjava à più pudè
U colpu cascava accantu
Era troppu chjuculè !

S’era ficcatu in cartone
Pudiamu falla finita
Babbu l’hà cacciatu fora
E l’hà lacatu a vita
Ma cunniscia l’intrate
Moltu più chè a surtita.

Tuppavamu i tafoni
Vultava à l’assimbretta
Mamma si matriculava
E si sarà ancu detta :
« Ma perchè ùn emu chjappu
Quellu ghjattu di Lissetta ? »

Hè capita chì i topi
Sò mezu chè intilligenti
Ma vizii n’emu ancu noi
Chì simu i più putenti
A forza di runzicà
Venenu frusti i denti.

Fà ch’ellu s’avvicinava
U ghjornu di a so morte
Accantu à i canistrelli
L'aspittava a incolla forte
Di ssu mese di cuccagna
S’eranu chjose e porte.

Tandu n’eramu tranquilli
A casa nittata à fondu
Prighendu chì di i topi
Ne fussi spachju u mondu
Ma eccu chì u lindumane
N’aviamu chjappu un sicondu !

Avà correnu u tettu
A chì fala è à chì colla
Ne parlanu trà di elli
Di a maladetta incolla
Chì li dui camarati
L’hà appiccicati in tola.

Un ne simu più à dui
Ci ne sarà à duzine
Quand’ella vene a notte
Ci vole à sente u runzichime !
Per avà chjodu u fogliu
Ma ùn simu ancu à a fine…


Sidussincu, nuvembre 2013.

Peccatu ch’ella sia finita ,m’era lasciata chjappà da a to storia.  

U topu dinù s'hè fattu chjappà... ma per noi hè durata ancu troppu. Aghju contu a cosa cum'ella s'hè passata !

magnifica! mi sò campata!   

Aghju lettu à a radio a prima puesia chì cuntava cumu aviamu chjappu stu topu, ma a mamma m'hà intesu è m'hà mandatu pè Posta ssu vuciaratu :

Vuciaratu di zia Tuparella per u figliolu Runzicone

Quandu intesu la nutizia
Lu mio core si n’hè struttu
« Lu to caru Runzicone
L’anu chjappu eppo’ distruttu »
Cacciava appena lu fiore
Ma l’ùn s’aspetti lu fruttu.

Eri tù lu più malignu
Pè ghjunghje à liccà u piattu
Pè ficcatti da per tuttu
Ti facia plattu plattu
Allora ùn capiscu micca
Ssu ghjornu cum’ai fattu.

A t’avia detta nanzu
Ch’ùn ci vulia à esse ingordi
Cumu ghjè ch’à i cunsigli
I tupichji stanu sordi ?
Lacanu e povere mamme
Incù i gattivi ricordi.

Maladì vogliu a incolla
Maladì i canistrelli
N’anu fattu le so prove
Contr’à noi i puvarelli
Ma l’onori sò per noi
E la vergogna hè per elli.

O lu mio runzicatuttu
O lu mio nasu appinzatu
Lu to capu cusì fieru
Lu vidia incurunatu
Oghje d’ùn vedelu più
Si ne fala lu mio fiatu.

Di la vil’razza di l’omi
- Ci facenu pochi apprezzi -
Si ne falghinu le case
Da ùn pudè truvà i pezzi
E di castigà li topi
L’emu da caccià i vezzi !


O ch’elli sterpinu tutti
E ùn truvalli più in locu !
Prighemu lu più supranu
Ci vole sempre à crede un pocu
Per vede s’ellu hè cristianu
O s’ellu ghjè un Gran’ Topu.

O s’avissi avutu l’ale
Cum’è u cinciminellu
Saria ghjunta à salvatti
Passendu pè u purtellu
T’avaria spiccicatu
E francu da u macellu.

S’avissi avutu l’arnesi
Di li topi citadini
O puru ancu l’artifizii
Di i topi clandestini
Oghje ùn ne stava manc’unu
Di ssa mansa d’assassini.

I topi di la cumuna
Cù quelli di lu cantone
Pè fammi parte di dolu
Affacanu in prucessione
Ci n’hè pè tutti li chjassi
E ancu pè lu stradone.

Di l’amichi è di i parenti
Vecu quì e triste faccie
Correnu da Calacuccia
Da Corscia è Bonamanacce
Ma li più chì sò falati
Sò quelli d’Alibertacce.

Stanu tutti addulurati
Pienghjenu la to disfatta
Mutulendu contr’à l’omu
Cagione di ssa malfatta
Chì ghjè peghju chè u cane
Chè a volpe o chè a ghjatta.


Vecu quì à ziu Manghjacone
E Francescu Runzichichju
Sunata a campanella
Sò ghjunti à u primu pichju
A disgrazia chì ci tocca
L’hà tagliatu l’appitittu.

Hè ghjuntu ziu Manghjaletti
E zia Runzicastrapunte
Tante parente pè pienghje
Accant’à mè ne sò ghjunte
Quant’è ch’in li nostri cori
Ci appiinu ficcatu punte.

Ti vogliu fà fà la to messa
Ch’ella sia detta oghje
Ch’ellu ci ghjunga lu vescu
Munsignor Runzicahostie
E per lu Salvi Regime
Cantarà zia Manghjacoghje.

Per girare il mondo intiero
Non c’hè il tuo paragone
Incol’ capo così fiero
Distinto frà le persone
Veloce come la levra
E forte più del leone.

O tù lu mio scarsu d’osse
O lu mio riccu di carne
Lu mio casgiu savuritu
Ancu puru senza pane
O lu pegnu di li topi
Un l’emu più da truvàne.

Lu mio longu di mimoria
Forte di mastucatoghja
Passavatu da per tuttu
Oghje più nimu t’alloghja
Ma pigliaremu a vindetta
Di quelli di a tappetta.

A ssa mansa di furdani
L’emu da caccià u fume
Runzicaremu li fili
Li tagliaremu u lume
Cum’è in tempi di babbone
Runzicaimu e fune.

Per avène persu unu
C’hè trenta sei fratelli
Centu cugini carnali
Ti vindicaranu anch’elli
A casa di l’assassini
L’emu da rode à pizzatelli !

U Topu lu più supranu
O lu nostru Signurellu
Pricarà pè Runzicone
E dinù pè Ficcarellu
Sò pronta à fà la vindetta
E nùn mi trema un capellu !