Puesie di ciocciu

Dui scritti d’introitu per salutavvi
prima di fà i primi passi

ESTRI è CUNTRASTI !


A porta hè spalancata
è nentru ci hè u Foru
chì chjama à l’operata
i detti in lingua d’oru
fatti’à casa cacciata .

D’a porta spalancata
traghje un estru à cuntrasti,
ùn vale à staccià tasti
a mossa hè palisata
da Circione attizzata .

D’un sguardu spalancatu
mi trovu prestu à latu
di qualchì belli inseti
à l’estru aggalabatu
maturati pueti.

Amici tenite forte
voltanu è Ciocciate
ch’ùn si paranu e porte
che di prime puntate
da voi spalancate.

§
« O zitelli lampate puru u sale

....e zucche ci sò ! »

ciocciu

« à i miò maiò di u Foru »

AMICI PUETI

À umbria di u spechju
Maestri di tasti è fiure
surgenu e vostre scritture
riflessi d’un usu vechju
agguazzatu di friscure.

Di sta lingua chì vi tene
ne sapete adoprà l’arte
d’e so divizie materne
in a musica chì sparte
a mètrica di e tintenne.

Site a squilla capi machja
chì inforca u primu passu
d’un dettu ch’ùn batachja
è ci’accheghja* à versu bassu
quandu l’angoscia attrachja.

Site stu rasgiu di l’alba
chi sveglia i primi culori
muscante di rima malba
è chi move l’estri mori
per u megliu chì ci stalba. *

Cusi ben lettu è pasciutu
m’aricogliu quante manna
vostru scrittu benvenutu :
per stu piacè chì mi spanna,
…d’un rinchinu.. : vi salutu !.

§

Ò zitelli lampate puru u sale
…. e zucche ci sò !

ciocciu

*accheghjà :acchità = azzica
* stalbà o stalvà =chi ferma per lezzione, ... stalvatoghju

MELA ARANCIU :(mail. Puntu fr)

Oghje ùn ci’hè più ch’un scrittore,
asciuttu di sangue fretu,
si stampa cù l’ordinatore
à l’embiu d’u tempu chì scorre.
Ùn s’affacca più fattore
per e case d’u quarcetu,
omu ùn campa più fidanciu.
Indirizzu : MELA ARANCIU !

U peghju hè sempre per dopu,
l’ordinatore hà i vezzi
ùn viaghja senza topu,
a misgia s’imposta è cura,
è l’altri for di paura
hanu più u fiatu è l’ansciu
di mette a casa in pezzi :
Indirizzu :Mela Aranciu !

Finiti sti frutti in cantina,
oghje rimpiazza a sporta,
ellu caccia è trascina,
si spiazza è si trasporta
da a salla à a cucina
cù a so manechja à ganciu :
Indirizzu :Mela Aranciu !

È torna l’unica stagione,
cù soli sti dui frutti
per pappina è cunfittura
ùn si sorte pò di custì.
Ùn cì tocca bombuccone
chjarasge o pera matura,
oghje hè scarsu u tempu danciu.
Indirizzu :Mela Aranciu !

Si chjappa e puce d’u cane,
è ogni mosca di donna,
colpu à colpu face panne,
u primu sbagliu ùn perdona,
è spessu a memoria ciotta :
Indirizzu :Mela Cotta.

À pianotta stu rastellu,
ùn ci’hè tempu à frusta denti,
anu i capi trapudenti,
è a forza in u capellu,
è dopu qualchì mumenti
li si schiatta u cerbellu
senza l’ultimu spatansciu :
Indirizzu :Mela Aranciu !

Si richjama u fattore
è pudemu parlà corsu,
ripigliemu capre è sumere,
a campana tintenna l’ore
à l’embiu di u tempu scorsu,
altru megliu ùn ci hè manere.
indirizzu :

« Grossu Minutu è Macagne
Pont’in farru : Noce è Castagne !

§
ciocciu

A tè LINGUA d’a Memoria
testimone di a Storia

Scorre a tò dipanella,
intreccia u so viaghju,
per tesse qualchi paghjella
annantu u primu tilaghju,
Tù ò sesta d’a favella
sì core è u calamaghju.

Sì cume l’antica NORIA, 
chi si viota è s’accolma
sempre para d’acqua fresca,
cacci rime per a gloria
di fà sventulà a chjoma,
in ballendu a Moresca.

D’a tò liberta fiurita
li n’ampari pocu a l’omu,
d’u primu stritu di vita
fin’u spadansciu di morte,
per dall’un sapè colmu
chjave di tutte e porte.

Tantu mamma che surella,
puntelli Storia è famiglia,
Sì a nanna è a panella
chi fascia usu è sumiglia,
u tò spechju ghjè funtanella
d’ogni vita chi spampilla .

Sì u granu è a tribbiera,
castagna è macinera,
stazzona di tutti l’arte
sì a tempera di l’esse,
a pruvenda chi sì sparte
frà nostre brame prumesse.

Tantu musica che pittura
sì nostra speranza pura,
a stella d’u spatriatu,
d’una fiura faci festa,
sì d’u riascquistu natu,
nostra prima è sola sesta.

§

AIÒ !

Omu vechju in vechju core
li pesanu tempu è ore,
cù u zimbu à u spallone
face u passu à bastone,
senza pienghje l'ochju hè crosciu
chì si vede frustu è corciu :
« SOLU ! »

Vechja lingua ùn pò stà sola,
materna parulla ùn more,
accatizza u vechju core
è li conta a so fola :
« Lingua eru quandu sì natu
é sò sempre u to fiatu
AIO ! »

§

ciocciu

Tiratu di : Attenti à a rima

« Mi garba di a lingua a nucenza bambina
a mi pigliu in collu cumu una ciuccia cara
per cogliemi a grazia di u so ansciu caldu,
a vogliu vede corre, è sente à spessu ride
ruzà senza penseri, è tirà i scambietti
sunà è cantà, è senza alcuna rima
pigliassi a paghjella per adunì a forza. »

&

ciocciu

Fola …Fuletta !

a BUSCICA di SAPONE

A mo buscica di sapone
Fatta à fiatu è à buccone
tutta di velu virginale,
stende u sò volu iniziale,
è scappa cum’un nulu sordu
purtendusi a musa à bordu.

Sempre per aria cincinnone,
scontra per celu a sò cummare
di muchju sputata sciumaccia,
sumigliante nata ochjone,
chi d’un basgiu crosciu l’abraccia,
è bellu longu l’apiccica
propiu à l’usu di buscica.

À vede ste chjocche pilate,
pare propiu un canochjale
chi vistiga e nulunate
à bocca aperta,ochju prufondu,
feghja u mondu gira tondu
cum’è a frasca in u spicciale.

Sià rospu sià ranochja
truita in l’onda à à scuperta,
a lumaca codicochja,
tutta a razza di bocca aperta,
tutt’ognunu chi stà à veghja
è chi di stintu buscicheghja,
à piupudè manda d’un basgiu
a so buscica per messagiu.

A mò musa maravigliata
lindamente à fatoghjata,
una à una coglie buscighe
per riccamà versu e rime:
prestu prestu nasce un brocciu
di guazza tremulente è crosciu.

Accade ciò ch’hà d’accade !
Vene un trattu disgraziàtu
nantu un tangu l’hà lampate,
è nasce u scempiu prufanu !
A miò musa rifala in pianu,
parenu fole mà discitatu
vecu un brocciu frescu cascatu :

“Manghjatevilu prestu è state zitti !......”

À u più prestu mi trica assaì
d’ imbuscicà tempu è sapone.
Voggliu provà, ùn si sà maì
di fà a barba à San TUMASGIU
chi da per tuttu feghja è tocca
per fà valè a sò ragione.
Di fà scherzu mi vene in bocca,
di sputà prestu u mò basgiu
mandà per aria a sò buscica
per quellu incantatu reghjone
buscami’un brocciu è un fiadone ! ....

§ Lulù