Fole di paesi

E piume sò difficiule à caccià annant'à u catramu...   

TÌììì ! TìPìttì PìTTi PìTTì ÌÌìì
Currite, currite chi lampanu a ramasuglia à a surtita  di a chjesa !

                                            LEGNE

Quellu s’era fattu duie legne, amansate per a strada di l’AMPUGNANU

In più bellu unu chi si n’era avvistu  è chi li s’eranu ingurdiziati l’ochji, ùn pudia più tene è li fraga à carcassi a  so vitturuccia per usu di casa !
Affaccca unu chi si pianta è li dice :« vulete ch’o v’aiuti ? chi vecu che vo straziate »
à tempu li dà di mani, è lampa à lampera !
L’altru penserosu dice : «  pianu !  ch’ùn hè ch’una vitturuccia ! li basta u pesu !
Carcate ! carcate ! è ch’ùn vi vegu più,,, chi sò u Patrone di e legne !  

Tì Pìttì PìTTi PìTTì Ìììì ! currrite, currite ! Lampanu a ramasuglia !
chi si marita a LINGUA contra u FORU !*

(* in corsu si dice : « Contra quale si marita ? »

ITE MISSA EST

Dà lugliu à i primi ghjorni di settembre passavamu e nostre vacanze in paese
inde babbone è mammone materni.
A dumenica ci’era ghjente à e messe,locu d’inscontru suciale, corsu da quelle chi
campavanu fora è per u più per ste Francie !
E nostre zie pretempine andavanu à quella di ott’ore, é noi à quella d’ondeci per marcà megliu a prisenza di a famiglia .
U mo babbu ch’ùn ci’andava, cuntava sempre :

In dumenica, a Signora incappellata, atteppava a ricciata è scontra una paesana chi si ne falava sempre à crespu in capu.
« Hè finita a messa di e Vilane ? »… dice a signora

- « Iè ! avà principia quella di e Puttane ! »
……ITE, MISSA EST !

« a Puesia hè di tutti, ùn feghja cunfin’alcuna
per francà mare è spechju, à l’incertu di furtuna
s’appolla sempre u pueta, annant’un sprichju di luna . »

« Per vita è usuale
ùn si feghja a tarra,
a lingua sola vale,
si ne frega d’u locu,
in cunfine ùn si sarra, »

Un bon estru , acutu è fasciatu à a stretta vale in tutte e lingue
Vogliu sparte quessu musicale anch’ellu :

………………CORSICÀ MADE IN USA

Un Corsu in posta à Madagascar accumpagnava u Vescu in BOSTON
per l’inscontru di i cinquantenarii di serviziu religiosu !

Inscontru à l’usu Americanu senza risparu di lussu ne di ghjente
D’un accoltu di quellu ! ognunu numinatu à paru !
ma forse chi per ellu ci’hè statu un mischju trà Corsica è Madagascar :

« there is a friend from Corsicà !
Dont’ask to me where is Corsicà ? May be somewhere in Africà ! »

Sciaccamanate è risa generale !

Tandu si prisenta un Corsu di Boston ! Un Martelli di CURBARA !
U so arcibabbone avia fattu ceppa custi cum’è mazzacane, ma per ellu
ghjera u primu corsu ch’ellu scuntrava !

di colpu i trè fratelli Martelli hanu fattu una festa invitendu à tutti :
u Corsu cù tutti i veschi è i preti apressu !!

« There is a fola from BOSTON !
Dont’ask to me where is Boston ?
May be somewhere …per stu LANCONE !

Grazia à tutti e ‘Fole di paesi’ sò ghjunte à ottucentu letture

Fresche scalate di Boston voltanu à locu :
FOLA di CASA :  CHINA !
Sò Settembrinu è tutti l’anni mi tocca :
               
« Fatti fiori,fatti frutti, ùn'aspettate e mo prove
-mi steraghju cum’è mi sò, lacaraghju puru piove
chi sò corsi parechj’anni è n’aghju sessantanove !

Pasciu i sessantanove, femu puru a settantina
à qualcosa à vicinu hè tombulatata a mo china,
appendu a musa cù u zanu,u fucile è a flachina ! »

Puru appesu, u zanu ùn hè viotu ! e Fole gireranu i paesi è tandu vi diceraghju :  
GRAZIE MILLE !

Pasci in li sissantanove
Dunque ai sguasi sittanta
A to musa ùn pò più move
È di vichjaia s'ammanta
Sarà per quessa o Lulù
Chì ùn sè cullatu à a Santa?

Circione a écrit:

Pasci in li sissantanove
Dunque ai sguasi sittanta
A to musa  ùn pò più move
È di vichjaia s'ammanta
Sarà per quessa o Lulù
Chì ùn sè  cullatu à a Santa?

A musa s’hè ghjuvanotta
l’hè collatu è falatu
di movesi per a Santa,
ma sapia chi malavviatu
u so pueta solu canta
u colpu di a fiera cotta !

Ma vistu chi simu nantu à ‘Fole’ ti cunteraghju ch’in 73 dopu a prima università
d’estate , dopu un campu di giovani à a Croce per a nascita di a ‘Rustaghja’
aghju fattu u Santaghju per esse battisatu in FIERA cù Francescu di Minnanna per cumpare è passatu trè ghjorni in a baracca di u to Ziù è di Marcellu Acquaviva chi m’avianu pigliati sott’ale .
è m’aghju sempre in capu a video di u chjam’è rispondi di u Furcatu
-74 bis : cù a prima di Teatru Paesanu è di a Rimigna è dopu a fiera dui ghjorni
d’etnulugia in Lozzi cù François Flori e a so mostra di u Tessu
-75 aghju tenutu à mezu Fiera, a baracca di a Chjostra di a Corsicata è
a Fédération Ovine, ch’avemu finiti arghiti persi, da e Morate arrabbiate !

Qualcosa di Filusurmia m'aghju coltu quassù... ch’aghju più da collà à scumbatte cù i zitellacci !

AVANTI !

Prima quandu si pichjava à l’usciu, d’en casa si rispundia :
« AVANTI ! Fà d’avanti ! o fate avanti »

Un amicu di u paese,di bon estru paesanu, facia e cacciate tantu in corsu ch’in francese

un tempu ch’ell’era fiaccu è ch’ell’ùn escia più di casa, m’er’andatu à salutalu :

à tempu pichjatu à l’usciu ellu d’en sala mi cappia :

« ENTRITE ! U PRIMU CHI TIRA HÈ MORTU ! »

DISGRAZIA !

Eri mentre ch'o straziava per incalfà a ghjabbana u mo figliolu mi cappia :
"ùn hè micca per i vechji !"......è eù di risponde accesu accesu :


" Ùn ci'hè nunda per i vechji.. mancu e vechje !


.....forse quantunque ....Isula foru

Ùn ci’hè tanti lochi per quessi i tasti ma aghju già pigliatu stà libertà per prete Grecale
è s’elle ùn sò 'fole di paesi' sò storie di a vita di quelli chi hanu fattu i paesi

Mandu à TEÒ DEFENDINI  panatteru è militante
     l’AGHJOLA (1926 -18 di LUGLIU 2015 »

Accunciatu è dettu di capu cù u cornu di a voce cumuna :

« - Micca ch’aghju più dirittu ch’un altru di dilla…ma nunda che per stu corsu … !

Ò TEÒ tù chi hai fattu è quantu scumbattutu, chi ti sì accunciatu di u tempu, cù i so vezzi muderni senza mai cambià a to manera d’esse : apertu è danciu..
chi per testimunianza, trà tutti , ci’hè da fàne un libru.
Ò Omu di stà Terra ! eù ch’ùn ne aghju à mente che un pugnu, di stà Lingua
chi t’hà fattu campà è che tù hai campatu…ghjè ghjustu ch’ella ti saluti !
l’Americani hànu à ‘Little Big Man’ chi u francese traduce à l’arritrosa   in :
‘Grand Petit Homme’ ma prima ci’hè statu MINUTU GROSSU per difende u bon sensu di u Populu :
cusi sì statu : LIBARU ! SIMPLICE è …TAMANTU !        
-Anima di u Fiumorbu ! Teniluci caru ! »

TEÒ DEFENDINI par Edmond SIMEONI: http://xfru.it/7Vj75Q

ùn aghju micca l'arte di stampalu quì ....se qualchissia a pò fà ?

Spergu d’ùn vene tantu à parlà di sta ghjente di a memoria per scrivene a testimunienza
In tantu aghjustu duie parulle per prete Grecale è Teò

-Seminaristu per ste Francie in tempu di guerra Prete Filippi era statu inguantatu da a Gestapò chi l’avia
stracciatu à so suttana
Di stu ghjornu s’erà ghjuratu d’ùn cacciassila mai più !

Tremindui eranu à a manu cù tutti, avianu sempre a manera fonda d’accoglie a ghjente

-Teò cuntava e cose fendu parlà i mani à ditone staccatu è ghjera un veru teatru quantu e rendia vive
Aghju sempre a video à mente di certe stonde :
Una volta mi spiegava chi nimu l’avianu amparatu a storia di a Corsica
è mentuendu a scola è l’interdettu di parlà corsu, dicia chi ancu in a corta di scola
ùn si ghjucavanu, pavurati di fassi piglià !
Teò era chjucu è gia anzianu è s’era ingrochjatu ghjinochji in pettu, per dì :
« Stavamu timuritu muti, in un scornu in aspettendu a fine di u tempu libaru per rientre in scola !... ! »
Certe fiure valenu più ch’una contata per sente ciò ch’ell’era !
Eù chi sò sempre attenttu à e manere è à l’andatura , vi ne cunteraghju d’altre

-Di stintu è di razzinu i so figlioli facenu parlà i mani à ditone staccatu !
n’aghju più che di più piacè !

O Lùlù ùn ai micca in a to musetta qualchi fola di paese, per piacè ?

Sperenza a écrit:

O Lùlù ùn ai micca in a to musetta qualchi fola di paese, per piacè ?

Ùn sò micca un cavallu per esse di musu in a musetta per manghjà e biade !
A ‘musetta’ l’hanu quelli chi scrivenu e rime à u chilometru !
Averia dettu : ùn hai micca qualchi fola innu u zanu o di sottuscala

Parechje e mi ci’aghju sempre :
L’usi novi è u prugressu ùn si sò micca pigliati cusi prestu !
I ghjuvanotti s’eranu messi presti à l’autostop… ma certi ?
in paese unu ch’ùn avia vittura si facia portà da unu o l’altru è un bellu ghjornu
scala in un cafè di a piaghja è casca nantu à un paesanu chi stunatu li dice
« chi faci tù custi ? cumu sì ghjuntu ? »
« SÒ FALATU CÙ I STOPPI ! »

-Una chi tenia osteria lavava panni e tuvaglioli à a manu è una cliente l’avia cunsigliatu di pigliassi una ‘lavatrice electrica’
è cusi fù fatta ! è per a donna muderna ospetata paria tuttu per u megliu
Eccuci chi un bellu ghjornu a si vede torna à sapone in mani ?
« chi si passa cù a lavatrice ? »
è quella di risponde :
« INNÒ ! I PANNI BRUTTI… ùn e ci METTU ! PÒ !

Dicenu chi dicenu …chi saria statu per u CASACONI !

Bravu o Lùlù !

Avà vuleria prufittà di ‘ssu spaziu per cuntà a meia.

In paese, un bellu ghjornu di veranu di l’annu ùn sò più qualessu, forse in ‘ssi tempi d’una volta, quandu u maestru pudià stinzà l’arechja d’un sgaiuffu senza vedesi appiccicà una lagnanza…in paese dunque, in corte di recreaziò, un scriampulu s’era messu à sciappà i nidi fatti da e rondine. Addiu ove è cuvate !!

U maestru, avvistusi d’u gattivu ghjocu d’u zitellu, s’avvicinò è u pigliò per l’arechja dicenduli : « dimmi appena o sumerò ! Quandu a to mamma era incinta, t’averebbe fattu piacè chì qualchissia l’avessi minatu calci in corpu ??? »

Bella lezziò di vita è à tempu di rispettu !

Dicenu chì seria statu per u Casacconi.

[size=18]
U Catalettu di San Biasgiu

Cullendu in Castagniccia via Fulelli si piglia a strada di a Porta è sottu à u Poghju Marinacciu ci hè a scansa chi ghjunghje à a Capella di San Biasgiu :
A capella hè sempre aperta per accoglie u pelegrinu ma quantunque assicurata a sera !
Locu d’armunia di l’omu cù a natura ghjè colmu di pace è d’ingeniu tantu foru che dentru di petre, legnu è farru .
Sapia ciò ch’ell’era un catalettu ma ùn avia mà vistu ! è stunatu di vedelu cusi strettu ? di sicuru per stracquà u mortu di fiancu !
Scusa di cullà à manghjà i ‘migliacci’ sottu à Campupianu inde l’amicu Dumè
chi i face ogni dumenica dà Maghju à Sittembre ci’aghju purtatu à spessu parenti
è amici passendu per San Biasgiu !
Ultimamentu  simu scappati cù unipochi di a bio(uni)versità è frà tutti un ghjovanu
Maruccanu insegnante di lingua araba
Ghjuntu davantu u catalettu s’hè calatu per misurà a largura d’un palmu è quattru dite …paru paru !
S’hè giratu per spiegàcci chi l’Arabi dicenu che : « sia riccu o povaru quellu chi si ne và ! ùn si porta nunda di più che un palmu è quattru dite ! »
Ancu appena mi morgu baullu ….è senza un Palmu è Quattru !!
[/size]

a risposta di u mo fratellu :
« In Tuttu o di San Biasgiu chì prima ghjè a Misura ! »