PASTURELLA MUNTAGNOLA
Arrimpicatu à la mio mente, si trova un locu celeste
Tuttu avvintu è colmu di vele immaculate chì facenu
L'amore cù lu ventu
Sò undighjenti cum'è a capillera sciolta
D'issa pasturella quand'ellu soffia u Muntese
Pasturella muntagnola
Di Cirnu sì a figliola pasturella muntagnola
Nata una quindecina d'anni fà, falata di sicuru da l'alte
Cime, mischiata à e schiume d'una piena,
Dopu à un tempurale tremendu
Cincinata ver di Corti, sia da a Restonica, sia da Golu stessu
Di Cirnu sì a figliola pasturella muntagnola
Ci avii adduniti pè facci scopre un pratu verdicente
È fiuritu à stelle
Dimmi induv'è ti ne sì fughjita avà
Averai fattu cum'è e nostre muvre
Sarai scappata in li to lochi, sempre più insù
Tù sapessi quantu ti bramu, tù sapessi quantu t'aspettu
Pasturella muntagnola
Mi pare ch'è t'affacchi un'altra volta
Guarda ! Ùn scappà ! Tè, a mio manu ! Eccu !
Cusì s'è tù voli, anderemu torna inseme
Per issu locu celeste induv'è tù sì nata
È po hai cusì bellu nome Speranza.
Accueil 
? 
