"San Petru è a vichjarella"
In tempu d'una volta, quandi u Signore è i so apostuli viaghjavanu, li t'annotta una sera prima di ch'elli poscanu rientre in paese. Duva piglià, duva ùn piglia ?... In lu circondu c'era una casetta chì paria disvitata. Ma u caminu fumariava: hum !...
Pichjanu. S'affacca una vichjarella :
- Oh mi, mi, mi... oh salvune ! Intrite, intrite, o tinti, ùn istate fora à ist'ora. Ah in casa meia ùn ci hè tanta robba, ma manghjarete issu pocu è tantu. Eppo omancu sarete à l'ascosu, eh !
È cù una manata di farina rasciulata in fondu à un cascione, a vechja si dà à falli signe piattate di granasgioli. È i guardava manghjà chi paria ch'elli falissinu in corpu à ella i granasgioli !
- Minà, face dopu, lettu quì ùn ci ne hè cà unu... ma tantu eiu sò avvezza à dorme pedi à focu... Voi sete trè : pruvate à accunciavvi in lettu.
- Inno, o zia vechja, disse u Signore, andatevine puru à sciloffi in santa pace chi noi di stà à a ziglia, altru ùn dumandemu !
È s'appinnuleghjanu tutti à trè, pedi à focu (C'era u Signore, Petru è l'altru ùn la so qual'ell' era..,)
A mane, si licincieghjanu da a vechja.
San Petru, subitu subitu, disse à u Signore :
- Ete vistu, o Maestru, issa vichjarella cusì allampata ch'ella hè... Ancu un pocu è ci dà u so lettu ! Comu femu pè ricumpinsalla?
- O Pè, rispose u Signore. viaghja a to strada chì quessi sò i mei l'affari !
Ma Petru (a sapete cum'ellu era) :
- Oh oh oh ! allora nulla à issa vechja ? Eh ! nulla pò nò !
È boga... è torna à Vignale!
À rombu à rombu, à u Signore li scappa a pacenzia :
- Ah! dalli cio ch'ella ti pare è falla finita ! È San Petru chì di a puvertà ne avia e mughe, piglia è dumanda a ricchezza pè a vichjarella :
« Or chì tuttu li rendi à centu »
Da quellu ghjornu, principiò a furtuna di a vichjarella. S'ella punia una grana. quella ne rindia CENTU, un pome di sumente ed eccu CENTU pomi belli tondi è tunduliuti, ùn c'era pede di calzu chì ùn dassi CENTU caspe cù CENTU caspolli di CENTU granelle l'unu !
Ind un « patre è filliu » a vechja torna ricca merza.
Or capiteghjanu un antra volta, u Signore è i so dui apostuli (Petru è quill'altru) per quelli circondi. I piglia u tardi.
D'unde tene ?
- Eh, face u Signore, ci hè po a to vichjarella ! Avà s'ella ùn hè ricca, mai più ... Fora ùn ci lasciarà.
- Anh, mi ! face Petru... Oooh avemu pane è cultellu sta sera!
Vanu è pichjanu à le porte d'un casamentu novu novu : era u palazzu di a vechja ! Quella apre. – È torna andacciani ! Chì diammine traculinate à st'ora ?
- Circhemu alloghju... vi pagaremu in travagliu, rispose u Signore cù a so voce dolce.
A vechja i guarda in sott'ochju, calculeghja, riflette:
- Ah mi ! cascate à tappu, ci hè u granone da fà... cusì mi pagarete l'alloghju, mansa di piduchjosi !
S'era fatta, mi, a vichjarella !
- State à sente, disse pianu pianu u Signore, u granone u faremu, ma sta sera semu stanchi morti. Lasciateci dorme chì accor' à dumane u granone u truvarete fattu ... Hè detta.
- Durnane, dumane... Allora dumane à l'alba, chè ?
- Alò !... accunsinti u Signore.
A vechja, senza esse ghjacara di porghjeli un pezzu di pane piglia è i porta in camare. Avà po stanze è stanzini ùn ne mancava nò, in quella casa.
- Dumaitina pè u granone ! Attenti !
A mane dopu, a vechja s'arrizza à ott'ore (avà era signora è ancu è carcu un bancu !). U granone u vede ammanzatu, ma à pignotti sani !
« O latri ! »
Si frumbula in camare :
- Allora ? È issu granone ?
- Scusate, dice u Signore, eramu abbambanati da a fatica... minà quessu dorme sempre.
Petru surnacava, bocchi apartu !
A vechja tandu caccia un matarellu bellu nudicutu, s'avvicina è... buffa è dalli ! a li prova à e matarillate! Li vinia bè chì Petru u tintu durmia in tagliu di lettu.
- Quand'e voltu, ch'ellu sia fattu u granone !
Petru si vultava è si ghjirava, maccu da i colpi. Mezu sbaggiurnitu face pè appinnulassi dinò.
- Mi, o Pè, face u Signore, venitine qui à mezu : duvi tù sè, a corri brutta !
- Ete a raghjone, o Maestru, Vai chì a vichjarella hè calcosa !
Mutanu locu. San Petru, à mezu lettu stà un pocu è incoppia dinò.
Ghjunghje a vechja :
- Avà hè quill'altru à mezu chì dorme! Chì tù scià cecu !
È bavà ! bavà ! bastunate à Petru.
- U Diu! U Diu!
- L'emu da fà u granone o ùn l'emu da fà ?
- L'emu da fà, disse calmu calmu u Signore. (Bucie quellu ùn ne dice : l'avianu da fà, ma quandu ?)
- S'ellu ùn fattu u granone quand'è voltu, vi troncu e custigliole.
- Mì, o Pè, fece u Signore da ch'ella fù isciuta a vechja, trapassatine in la muraglia chì s'ella volta micca, ti tomba!
Petru, maccu da a fatica è da e bastunate s'incatagna in lu muru è... s'adurmenta dinò !
A vechja affacca :
- Avà hè l'altru chì dorme! Ma allora vi ne vulete ride! Aspetta ghjà !
È a li toma à pruvà à Petru, ma oh ! Falavanu e batarchjate à calzu d'arechje ! (ma vaga cum'ella vaga, u paganacciu era sempre Petru…)
- Basta! Basta ! scappemucine o Maestru ; aiò ...
- Prima l'emu da fà u so granone chì hè stata detta, fece u Signore.
Facenu u granone è si ne vanu cotti cotti...
- Allora, o Pè, chì ti ne pare di a nostra vichjarella ? dumanda u Signore.
- Ah ùn mi ne parlate, o Maestru ! L'aghju po vista ciò ch'ella hè a ricchezza !
- Voltati ghjà, o Pè !
Petru volta u capu : U casamentu si brusgiava !
"E fole di mamma" (1981)
Accueil 
assai 
) basta à piglià a prima sillaba , tantu serebbe sci(scie) a pu(poussin) cc(k)rà (rat)
vole dì qualcosa in Vignale 
?