Ristori Ghjuvan Petru

U fiume

(Le dormeur du val)

U fiume si stinza è dorme
Mez’à sponde di verdura
L’ombre piglianu e forme
Strane di l’arburatura

Nu un retinu di filetta
Un omu s’hè arrimbatu ,
Secondu a so ghjacchetta
Di sicuru hè un suldatu,
Per cuscinu una musetta
È l’arme riposte à latu.

U ventulellu chì passa
Sopra à l’onda è a tasciana
Li sussura à voce bassa
Una nanna paisana.

A ghjandaghja dispettosa
Caccia un chjurlu è po s’asconde,
Ma l’omu sempre riposa
Nunda sente ùn pò risponde,
A so manu fangagliosa
Stringhje trè bioccule bionde.


Cù i so ragi di focu
U sole di mez’aostu
Prova d’asciuvalli un pocu
I panni culore di mostu.

È u castagnu fiuritu
Si pende per falli onore
Ma l’omu dorme sticchitu
Digià sbianca di culore,
Di l’arburu preferitu
Ùn pò più sente l’odore.

Stracquatu nantu à u spinu,
Giratu versu l’eternu,
U so sgardu zitellinu
Hà digià vistu l’infernu...

L’omu chì s’era arrimbatu
Era un zitellone schiettu
Chì di diventà suldatu
Ùn avia micca sceltu
Ne finì abbandunatu
Cun quattru tufoni in pettu.


U fiume si stinza è corre...

Ne mettu quì duie chì mi piacenu assai di u so ultimu libru "Posu è pensu".

A vacca pensiunata


Sentu dì ch’in Inghilterra
E vacche sò tutte sceme,
Sia burla, sia vera
Di manghjà carne si teme,
Di a pessima manera
Ci abbuleghjanu inseme.

Eiu sò vacca cursina
È di ceppu paisanu,
Nata in una rasgina
À la fine di veranu,
À luna duminichina
È di u quartu suttanu.

M’anu allevatu à bradu
Piuttostu à cicchiciambera,
È m’anu ancu premiatu
Ma campu à straziera,
Chì m’hè difesu u pratu
È di pasce a maghjera.

S’ella hè scema a vacca
U vaccaghju hè astutu,
Si mette u premiu in stacca
È campa bellu piumutu,
Sempre fieru a li spacca
Grassu, tondu è ben vestutu.

Altra cagione di lita
Chì bellu pocu mi garba,
Per falla di più cumpiita
Li danu un premiu per l’arba,
Invece m’hè pruibita
Siasi passa o maciarba.

Annu scorsu hà trescinatu
Piottuli è rete à veru,
Un pricoghju hà sarratu
À rombu di fil di ferru,
Una stonda aghju pensatu :
Ùn lascia più nunda à gueru.

Per arrizzà isse sarrende
S’hà toccu un pataccone,
Ma, in fatti, mi difende
D’entre à pasce u reghjone,
Chì à d’altri, u si vende
È mi tene per stradone.

Sempre fora à u celente,
Famita, passu l’inguernu,
Aghju u pelu lucente
Per via d’un cotru infernu.
Quand’ella passa a ghjente
Sò ancu sposta à u schernu.

Mentre chì quellu sughjettu
Cù u mo premiu figura,
Eiu raschiu u fussettu
È patu fame è cutrura,
Cù u tramannu in pettu
Di sterpà qualchì vittura.

Ogni tantu qualchì toru
Ind’a socita s’affacca,
Cum’è tutte m’innamoru
Hè a mo gioia di vacca,
Per quill’altru hè tant’oru
Chì vitelli ùn si ne stacca.

Mi piengu sempre in vanu
È mi passu a stagione,
À pensà chì issu furdanu
Si manghja a mo pensione,
S’affaccherà di veranu
Per cambiammi di stradone.

Quandu u cerbellu scaglia
Sunnieghju in cunsequenza,
Ch’o dormu nantu à a paglia
Chì di fenu aghju una lenza,
È pè premiu a medaglia
Quella di a resistenza.

Cullina

Verdicante cullina,
O tù a mo muntagna,
I mo primi verani i viculasti tù.
In a selva regina
I maghji di cuccagna
Azzinagavanu sogni di prima ghjuventù.

Sott’à i verdi rami,
L’acelli à l’appollu,
Cù dolci chjuchjulimi, ùn s’ascondenu più.
Senza i to ricami
Ch’eranu lu s’affollu
Mancu u sottuboscu ùn hè ciò ch’ellu fù.

Quanti innamurati,
Allacciati, nacosti,
– Si sà chì à vint’anni l’amore hè virtù –
Chì si ne sò andati,
In cerca d’altri aosti
È umbricce secrete, per e selve d’insù.

Ci hè ghjuntu u sigone
È ci hè corsu l’arratu,
L’omu t’hà trasulcatu pè a so schjavitù.
Brisgiulu d’Aitone,
T’hà vulsutu fà pratu,
Ma, concia da e fere, ùn spampiglieghji più.

Verdicante cullina
Ti vedia muntagna,
Cù l’uchjata nucente di a mo ghjuventù.
Era la mo cunfina
È terra di cuccagna,
Oghje ch’ùn sì chè terra, muntagna ùn sì più.

Ghjuvan Petru RISTORI.

Una di e mo preferite...

I fiori

Mi sò sempre dumandatu
Duv’elli vanu i fiori
Dopu avecci prufumatu
Scappanu à corri corri.

E sò cum’è un zitellu
Chì cerca ma ùn capisce
Cum’ellu vola l’acella
Cumu a machja fiurisce.

Chì diventanu ‘ssi fiori
Chì duranu quant’è un sognu
Accumpagnendu l’amori
U tempu d’un matrimoniu.

Dunde piglianu ‘ssi fiori
Quand’à l’ultimi d’ottobre
Di magnifichi culori
U campusantu si copre.

Fior’di scopa è campanelle
Per ‘ssi tagli ci n’hè tanti
Strappati da e zitelle
A grand mazzuli muscanti.

Ci hè u fiore muntagnolu
Chì fiurisce ind’i sciappali
Mez’à Corti è u Niolu
Ma pè coglielu a ti sciali.

Fiore di a mo passione,
Rosula à labbre di focu
S’omu ùn face attenzione
Ci hè da prungnesi un pocu.

S’omu sculiscia a manu
Pè tuccà sott’à a seta,
Ci vole à falla pianu pianu
Chì ci hè a spina secreta.

Quand’à qualchissia garba
U so muscu preziosu
U macina, po’ u salba
Nentr’à un caraffone chjosu.

Fior’di ricordu luntanu
Chì dorme ind’un quaternu,
Ci parla di u veranu
Sott’à a neve d’inguernu.

Fiore di gioia è di pene
Chì sempre mi maraviglia,
Diu sà cum’ellu vene,
Diu sà dund’ellu piglia.

U filu di stu ragionu
Fubbe una storia d’amore,
Quand’à casu si crucionu
Un pueta è un fiore.


Ghjuvan Petru Ristori.