Viranu corsu?

Eccu, i  nostri giovani sì sò mossi, sò  falati in  carrughju incù a vulintà di fà  capisce à  tutti ch'elli "eranu di  stu Paese è  ch'elli ci vulianu campà". Bravi! mi ralegru di vede  chì  ùn avemu ancu persu  tuttu è ch'ellu resta sempre una manata di giovani capaci d'impignassi, di rivultassi è chì ci credenu. Annant'à parechji punti, in particulare quellu di l'arristatu Miot, s'accorda tuttu ognunu o sguasi  à  dì ch'elli  facenu bè, perchè  si  parla  di  l'avvene  di  a Corsica è chì l'avvene, ghustappuntu, sò elli.  À u lindumane di a manifestazione urganizata da a Giuventù Indipendentista, a imprissione hè dunque piuttostu pusitiva. Malgradu a barruffa incù i CRS è  duie o trè palette brusgiate si pò parlà di una manifestazione cum'è  tutte l'altre, vale  à  dì  incù una  parte maiò di  participanti chì sò cullati  in Corti per una  marchja pacifica di prutestazione. A particularità  essendu  quantunque l'età  di  i manifestanti, una  magiurità  di giovani,  incù qualchì unu forse chì cullava dinù  – soprattuttu? – per  sfucassi. Ma  quessa hè  sempre stata,  u  fattu  ùn   hè micca novu, è  simu  stati giovani ancu noi...       Ci  vole  dinù à addimette chì  sta mossa liceana è  studientina pare limitata  à  u  solu mondu naziunalistu è  chì  fora di i partiti naziunalisti, i giovani ùn l'hà sustinuti tanta ghjente. Hè vera dinù chì ancu sì, cume  a vi  dicia  nanzu, a maiò parte di i Corsi sò  à favore  di l'arristatu  Miot o ancu di a a  cuufficialità.  Certe  rivindicazione cum'è a cursizazione di l'impiechi  – capita  forse  da  certi nè più nè menu cum'è "I.F.F" – n'avaranu  fattu  rinculà parechji, senza parlà di  u fattu  chì  in Giuventù Indipendentista ci hè  dinù "Indipendentista"     è  chì  s'elli  sò numarosi i Corsi à difende  l'arristatu Miot, ùn vedenu micca u  raportu incù l'indipendenza di  a Corsica... À u  cuntrariu, postu  chì à  u  fondu, u  ghjornu  chì  l'avaremu  a nostra indipindenza chì n'avaremu  da  futte  di Miot?   

Infine, ùn  contu micca d'entre in  isse pulemiche, è  ùn  vogliu  ritene cà  l'aspettu  pusitivu  di stu muvimentu: a  presa di  cuscenza  di certi giovani.

Ben'intesa, e  critiche ci  saranu sempre: L'affare di  e palette è  di i p(e)neus brusgiati, i CRS feriti, u  fattu  chì i media ùn  anu  da  ritene  da a manifestazione di Corti solu  l'azzuffi incagullati contr'à CRS. Sintarete  dinù  i rimprovari cum'è :  " Ùn tocca micca  à  elli di  falà in  carrughju per l'arristatu Miot, chì l'affare  cuncerna à tutti, micca solu i  giovani o – peghju – i giovani  naziunalisti..."  . À a limita  a pensu  anch'eiu, ma tandu  ci  saria  vulsutu chì l'eletti è dinù u populu – tuttu u populu, micca solu i  giovani è micca solu i naziunalisti – si muvissinu anch'elli  è  ch'elli  falessinu tutti inseme à  difende l'idea di una Corsica chì prumette un antru avvene à  i so  giovani  cà  quellu d'esse  "sbanditi" per stà indu u  filu literariu Ghjuvanteramu Rocchi di u famosu "simu di stu paese". Ma a sapemu  chì i scuntenti ci  saranu sempre. Avà s'aspetta ch'ellu ci sia una seguita, si spera chì u sustegnu pupulare ùn si limitarà micca à a giuventù corsa naziunalista, è chì a ghjente guardarà l'interessu cumunu senza tene contu di i partiti è di i gruppi pulitichi. A sò ch'elli priparanu altre azzione, allora incuragimuli è aiutemuli, hè u nostru duvere. S'è vo ùn pudete o ùn vulete micca andà à manifistà, omancu quelli chèi site annant'à FB, spartite e so pagine annant'à i vostri muri. Ùn vi costa nulla, è per elli hè impurtante perchè a sanu chì à u vintunesimu seculu e rete suciale anu assai impurtanza.



Ghjustappuntu parlendu di facebook, un picculu rimprovaru po  u li  faraghju anch'eiu   :

Hè  vera  ch'elli sò  di  a generazione internet  è  chì  e rivuluzione  e  facenu dinù  à  colpi  di  statuti  è  e  misuranu à  u numaru  di    :  "1000  in mancu duie ore. A revoluzione hè in marchja."

Hè  vera  dinù  ch'elli anu  capitu  a impurtanza di a cumunicazione, a prova  si n'hè  chì u  so  logò GI* hè  assai riisciutu   . Cunnoscenu  dinù  u pesu di e parolle è anu  soprattuttu u sensu di  a  formula, quessa  ùn a li pò caccià  nimu. Anu  ancu  capitu chì  à  u terzu millesimu, a  cuufficialità  ùn basta micca,  ci vole  à  cumunicà in  trè  lingue.  

Hè  vera  infine chì  à  i media  li piacenu e scurtatoghje è  i paragoni lestri.  Quand'è vo  vidite  ch'elli  paraguneghjanu Stromae  à  Jacques Brel ete capitu  tuttu...    È i nostri  giovani, chì  vulete, stati abbituati  cusì, allivati  à colpi  di  buzz è  di viste  annant'à  youtube. Ma quantunque... "Veranu corsu" ! Per  carità!  Cacciate  a TVA  o  zitelli!  A  capiscu  chì a  cumunicazione  hè  impurtante, ma ci vole  dinù  à guardassi  di certi paragoni!  Chì  sò duie pubelle brusgiate accantu  à  i 100 000 morti di Siria o  i  50 000 in Libia?  senza mancu parlà di l'altri Paesi.    

Ma ùn  hè  custì u  più impurtante, st'affare  di Veranu  corsu ùn hè  cà  un picculu prublemu di forma,  di packaging s'è  vo  vulete. Pè  u restu  pudete puru esse cuntenti o  giuvanotti  perchè ete mustratu qualcosa di  bè marcuri.   Iè,  a pensu anch'eiu  ch'e  simu  à  u principiu  di qualcosa, in  tutti  i casi ci  vogliu crede cun  voi. Ma per  esse sinceru è senza  vulè  caccià  nulla à  a leghjittimità  di  sta lotta, malgradu  tutti i   ch'è  vo pudarete  cuntabilizà annant'à  i vostri muri  Facebook, ùn si pò ancu parlà  di  veru successu pupulare.

Sarà una strada longa è  pitricosa, tantu à u livellu  fiscale,  culturale cà suciale è, per  fà  anch'eiu una metafora,  u viranu u bramemu tutti ma da l'avà  simu sempre di capicursura.

Ma soprattuttu:

Ùn  cappiate nulla o giuvanotti!
Ne lâchez rien les  jeunes!
Don't let  go off  nothing young people!

Lotta  giuventù, l'avvene  sè  tù!
Lutte jeunesse, l'avenir  c'est  toi!
Fight youth, you  are  the  future.

 

*