13 di nuvembre in Parigi

Circione a écrit:

Mi  ghjunse  u vomitu  quandu lessu certi  cummenti scritti arrisera annant'à Facebook, subitu dopu stu macellu – rinditevi  contu, più di centuvinti giuvanotti assassinati à u cuncertu di  u Bataclan, o attavulinati  in tarrazza di un caffè – cummenti senza  mancu una  cria di cumpassione, senza mancu una parolla pè  e  vittime  o  e so famiglie, ma cù  u  solu  scopu  di  fà  vede  chì  " a Francia  hè  un paese di merda"  mi  dicu  chì certi Corsi anu persu una di  e so virtù principale: u  rispettu. Ma piantu quì  chì l'ora  ùn hè à a pulemica,  solu à  u  racuglimentu.

Eri sera ùn era micca l'ora di a pulemica.
In verità, pocu impreme l'ora o u ghjornu, a pulemica ùn hà micca a so piazza davant'à stu dulore, stu massacru.
Ma ci vole à sapè tuttu ciò chì hè dettu, ste parullacce scritte da cunnacci chì rivendicheghjanu u statutu di "veru corsu".
Anc'à me mi vene u vomitu...





















Cume quessi ci n'hè tant'è più.
Per furtuna ci sò dinù l'altri cume stu "Spiritu nustrale", colmi di cumpassione.
Intantu pensemu à tutte ste famiglie in dolu, à i morti. Ch'elli possinu ripusà in pace.

À chì ùn vole vede bandere francese, à chì mette tuttu à collu à u guvernu, à chì dà e lizzione nant'à a i valori ch'elli dicenu "nostri"... Eiu, ùn vecu, torna è torna, cà u negrufume di l'anima umana. À nome d'un diu, d'una brama di pusessu o di u simplice prufittu ci tumbemu dapoi ch'è no simu scalati nant'à sta tarra. Vardassi u billicu pinsendu d'esse eternu, eccu u sbagliu santissimu di a maiò parte. U sangue chì corse nù i carrughji parigini hè distessu à quellu virsatu in ogni scornu di a pianetta. Hè u nostru sangue. Ùn ci n'hè omi à valè più cà d'altri, morti menu impurtanti. Ùn ci n'hè ragione di more è tumbà à vint'anni, eppuru hè cusì da sempre.

N'aghju dettu anch'eiu scimità, l'aghju ancu pinsate. A sperienza di l'unu ùn ghjova micca aspessu à l'altru è hè un piccatu. Oghje, quandu leghju o sentu e pazzie ch'elle ispiranu à certi sti mumenti impiumbati, mi nasce ancu à mè u vultulime in u stomacu. Quellu di vede ch'ùn amparemu nulla, ch'ùn sapemu campà l'ochji à l'insù è micca inchjustrati nù stonde passate chì ùn saranu più. Hè u nostru mondu chì brusgia, saria ora di capiscela è piantà di piattassi daretu à sfarenze ch'ùn esistanu cà in i nostri ciarbelli anibbiati.

"Simu tutti fratelli sottu à a pelle è vularia scurticà l'umanità per pruvalla." Ayn Rand. (La source vive 1943)

Quelli chì criticheghjanu a bandera francese messa nant'à i ritratti di facebook, quelli chì pensanu à u pulitica quandu famiglie sò in dolu: ricurdatevi di sti visi è di ciò ch'elli riprisentanu.
Aduprà i culori di a Francia pò dispiace, si capisce. Mà oghje ùn si tratta micca d'un attu puliticu. Ghjè solu un simbulu fattu à u nivellu mundiale per permette à ogni persona, ch'ella sia in America,  Tombouctou o in Calasima di mustrà a so sulidarità di pettu à u fanatisimu.
U scopu hè di dì u dulore è u sustegnu.
Certe volte ci vole à mette da cantu certe cunsiderazione è piantà di criticà. Lascemu a ghjente mustrà a so pena cum'ella vole. Certi anu fattu sta scelta perchè chì ùn sanu micca fà altrimente. D'altri l'anu fatta per mustrà à so sulidarità o per avè l'impressione d'appartene à qualcosa d'impurtante, di più forte, di mundiale, per ritruvà una unità. Infine parechji averanu messu sti culori per patriutisimu, perchè chì tenenu caru u so paese (a so cultura, a so lingua). Un anu micca in mente un guvernu è un statu culuniale chì hà fattu tantu male.

Sò 'ssi ritratti chì sò impurtanti.

Hè quist'umanità rutta, aniintita, chì conta à l'ora attuali. È tutti i gesti di sulidarità, di cumpassioni, di sustegnu chì si poni veda.

È si vidini in u mondu interu, ugnunu arricchendu à so modu a tistimunianza di a so emuzioni. Di u so rifusu di a barbaria.

Da una parti ci hè un' umanità cù u so disideriu di viva, oghji culpita in Francia, ma ghjustu nanzi à u Libanu dinò, è pocu fà à u Danimarca, in Tunisia, è in Siria è in Iraccu tutti i ghjorna dipoi l'anni.

Chì da l'altra parti ci hè a scimizia è l'intullarenza, u fanatismu.

U restu ùn conta micca. O ghjustu par significà chì i barbari l'avemu in casa dinò, i prasciti, l'ignuranti, l'avemu in casa quant'è l'altri.

Ma a sapiamu ghjà. Par avali, faccia à tamanti danni, i so parolli di miseria ùn contani par nudda.

Chì 'ssi morti ci imparghini à rispittà tutti i culturi, a diversità, è dinò i banderi chì sò più cumplessi chè un simbulu bestiu chì certi ni facini.

Ch'iddi ci imparghini à udià, 'ssi morti, s'iddu ci voli à udià un affari, l'ignuranza è l'uscurantismu, a tranchara di u spiritu, u mondu troppu simplificatu di quissi ch'ùn ani chè u rifusu di l'altru è l'insulta in bucca.