Riintrata di i pueti!

Ti pudia esse affaccatu
Stu sugettu hè dinù toiu
Ma sarè statu accupatu
À tastà appena d'oliu
À trenta aurò u litru
Dimmi cumu l'ai trovu?
 

Sai chì questu quì l'oliu
Fala à di per ellu in gola
Hè statu fattu cun arte
Da un amicu di scola
Supraneghja u balaninu
L'oliu di a Volpajola.

L'aghju  tastatu po' anch'eiu
È l'aghju  truvatu amaru
Mi piace di più lu meiu
Chì hè trè  volte menu caru
Stà à  sente  stu cunsigliu:
Ùn spulà u to danaru

È vistu ciò ch'è  tù pachi
L'oliu  di a  Vulpaghjola
Hè megliu  ch'è tù u lachi
Stà  indu a buttigliola
Quì alivi  ci n'hè  tanti
Da Aregnu à l'Algaghjola

A quatità  balanina
Ùn trova a so pariglia
Centu per centu  sabina
Dece aurò  à buttiglia*
S'ellu ùn  ti piace in Aregnu
Poi andà  à cumprallu in Zilia



* a buttiglia  d'un  litru micca  quella  di 250 ml di a Vulpaghjola à 10 €...

Cumu vogli ragiunà
ch'un mi parli chì di prezzu ?
Un aghju mai tastatu
Oliu bonu cum'è quessu
I zini chì t'ai in stacca
Li daria un bellu apprezzu.

Prova incù i to tirzini
À rittificà u tiru
È saparè chì i zini
I magnu cù pane è tiru
È ùn li mi mettu in borsa
Chì ùn sò micca un facchiru

Un rittificheghju nulla
Chì tirgu sempre dirittu
E forse a dici in burla
Un sì facchiru ? O zittu !
Metti "oru di Balagna"
O per fatti un ovu frittu...

L'oliu ch'e compru o amicu
Ùn hè di cuuperativa
Credi puru ciò ch'e dicu
Hè veru oliu d'aliva
Eppo' fà chì a to musa
Sia appena custruttiva

Cù l'oliu di a Vulpaghjola
Ai fattu u bellu acquistu
U to cumpagnu di scola
Quant'hè chì ùn l'avia più vistu?
Vistu u prezzu ch'ellu t'hà fattu
T'hà pigliatu pè un turistu  

ùn vularia lampà
l'oliu addossu à lu focu
in fiera l'oliu à cumprà
s'ella era caru ùn la socu
eiu m'aghju betu un pastizzu
è quellu custava pocu

Costa pocu u pastizzu
Què po un hè mancu sicuru
Si paga cù pene in capu
E vitture nu u muru
L'oliu costa à u principiu
Ma raporta a ti ghjurgu.

avà sì ch'aghju capitu
ch'è t'era à cataru à collu
l'oliu hè peghju cà u pastizzu
è ùn ti raporta un sollu
è s'è tù n'abusi troppu
dà ancu u "colesterollu"

A dicia u mo babbone
Chì ghjera un spiziale fidu
Sappia chì u collesterollu
C'hè u bunu è u gattivu
U to pessimu pastizzu
Vulinteri mi ne privu.

u pastizzu hè un affare
chì ci mette à tutti in gioia
e turnate ùn sò care
ma à tè ciò chì t'annoia
hè di caccià u bigliettu
per pudè mette a toia

O spartimu lu travagliu
Circione cù i so zini
Po' tù cum'ella ti piace
Cacciarei i to quattrini
Eiu mi cuntenteraghju
Di cappià i mo terzini.

cum'è u corciu Minutu
tù voli pagà in canzone
ma ùn senti ch'è tù canti
cum'un veru stagnarone
mancu una sola turnata
ùn ti ne serve u patrone

O Sidussincu i zini
I magnu annant'à u scogliu
Incù vini chjarasgini
È cù i mio pedi à mogliu
Ma ùn la poi capisce
Perchè ùn magni cà oliu


Hà a ragiò Caparrittu
È Sidussincu hà u tortu
Bei piuttostu pastizzu
S'è tù cerchi u ricunfortu
È ùn ti scurdà chì l'oliu
Spessu face andà di corpu

l'oliu face andà di corpu
sò d'accordu l'adimettu
Sidussincu chì n'abusa
ùn hà rispostu à stu dettu
fà ch'hà passatu a simana
annant'à lu cabbinettu

Chì vulete ch'eo vi dica
Eu sò pocu cumpetente
A chì và troppu di corpu
A chì di bocca è di mente
Per dilla ind'una parolla
Ete a rima currente.

Sidussincu  finu   è  untu
Scrive  rime dutturale
Mittimu  e  cose à  u puntu
Perchè custì parla male
Suffrariamu cun Caparrittu
Di cacarella verbale??? 

O Circiò o lu mio amicu
Ma ci vole à spiegatti tuttu
Faciu casu à ciò ch'e dicu
Ghjunghji è u travagliu hè struttu
Cio ch'eo ti spiegu pulitu
Ci vole chè a ripeti bruttu...

Eiu  ùn  facciu machjavelle
Quandu parlu parlu  chjaru
Tù compri l'oliu  è u  mele
Dopu ùn ai più danaru
Noi  a Santa  di Niolu
A passemu à  u  cuntuaru

Eramu ghjunti à l'insù
Avà ci truvemu sottu
Ùn venenu mancu più
Sippuru senza fà mottu
Sidussincu è Caparrittu
I nostri patti anu rottu


L'Erbaghju hà poca primura
Quellu ghjugne à a mutesca
Ùn pensa cà à l'apartura
Di a caccia o di a pesca
Visticheghja u cignale
È a truita l'adesca

Postu ch'elli sò partuti
Chjamà vogliu à Isulanu
L'altri pueti sò muti
Affaccanu è si ne vanu
Ùn poi esse cà tù
À dacci un colpu di manu

À datti un colpu di manu
Sai sempre ne sò prontu
Eppuru ai tricatu
À piglià à mè in contu
Serà chì per 'ssa Balagna
Omu teme u cunfrontu?

Paura ùn mi n'arrechi
Ma a risposta mi piace
Si sà chì ind'è i cechi
U berciu hè u più capace
Ma nun cercu u cunfrontu
Chì sò un omu di pace