Chjam'è rispondi di u 26 di sittembre

Bona sera vi salutu
In issu locu eccezziunali,
Apposta quì sò vinutu
Cù l'estru tradiziunali,
Da sparta in puisia
À la manera d'avali

Chì tù fussi u benvinutu
In stu locu di spartera
Hè ora di fassi sente
Pocu impreme a manera
Hè cusì chì un ritrovu
U ci faremu sta sera

A ci faremu stà sera
Di manera virtuali,
Cù u screnu è a tastera
Ma firmendu tali è quali
Incù à rima sincera
È u stintu naturali

Aghju pensu "mì à Mina
a so voce face mughji"
S'ellu hè forma sta sera
Emu da sente i so rughji
Ma dopu à avè fattu a prima
Ùn ci vole ch'ellu fughji

Ùn socu prontu à fughja
Capu à capu firmaremu,
T'aghju curaghju è versu
È sò spruvistu di tremu,
A dicu com'è à pensu
Di cantà mai ùn temu

U to curagiu u cunnoscu
Ma quandu ùn t'aghju più vistu
Aghju dettu u so versu
Chì hè cusì bellu acquistu
L'hà purtatu in Bunifaziu
Pà cantà à u turistu

M'avvicu ch'ugni sicretu
In issu locu hè svilatu,
Hè vera chì sò pueta
In cantu impruvisatu,
Ma sappia pà u turistu
Ùn aghju mai cantatu !

Di cantà pà u turistu
À cuntrariu eiu a capiscu
A me paga d'arisera
Sola hè stata calchì fiscu
M'anu pigliatu un ghjornu
Oghje a me stagione finiscu

Ch'è tù canti pà u turistu
Caru amicu mi stoni,
È quantunqua pari stranu
Di fà simuli staghjoni
Quantu à mè l'ai intrunati
Cantendu i to canzoni

Davanti à u risturante
Mi paria d'esse un anfarte
I turisti invispiti
Mi tiravanu e carte
È dopu hè ghjuntu Circione
Ancu ellu m'hà dettu di parte

S'iddu c'era ancu Circione
Tuttu hè chjaru ad'avà,
Ùn mi stona mancu stampa,
Ch'ugnunu si missi à friscià
Chì sìa l'unu ch'è l'altru
Ùn seti capaci à cantà.

Ci vidiamu ind'è Ricordu
À arrighjistrà i dischi
Ma hè ghjuntu u patrone
Hà dettu "ch'ella finischi !!"
È semu vultati in casa
Solu cù e carte è i fischi

Sìa tù quant'è Circione
À sentavi hè un piccatu,
Vi cridiati i patroni
Di u cantu impruvisatu,
Vi vidìati indè Ricordu
Ma ugnunu v'hà scurdatu

Quandu cantai o amicu
Ti discrive u dicoru
Paria chì Leonardi
Mi purtessi un discu in oru
Ma sta sera chì calata
Cantu annant'à l'Isula Foru

Hè vera o chì falata
In l'abissi più prufondi,
Vi cridìati i tarcani
Pronti à campà beddi stondi,
È oghji ti ritrovi quì
À fà u chjam'è rispondi

À fà u chjam'è rispondi
Cum'è in tempi di ghjuventù
Ma a vita hè fatta à scala
Quessa a sai ancu tù
Ma u peghju hè chì Circione
Dipoi ùn u sentu più

T'aghju da dì francamenti
Ùn mi sentu tantu orfagnu,
Chì à boci di Circione
Arreca dulori è lagnu,
Ùn aghju mai infattatu
Un disgraziatu cumpagnu

Vene male à disprizzà
Quellu chì prisente ùn hè
Ch'ellu ùn vaca à pinsà
Chì l'attaccu hè di mè
D'appressu à mè sè ghjilosu
Chì canta megliu cà tè

Ghjelosu ùn sò di nimu
È ancu più pocu d'iddu,
A dicu com'è a pensu
À Circiò ùn m'assumiddu,
Chì u soiu ùn hè cantu
Chì pari tuttu un stridu 🫣

A toia sì a vuciaccia
Sumena u spaventu in a machja
Chì quand'ì tù canti tù
Pari tuttu una curnachja
Chì da a Rocca à a Giraglia
Canta sempre à grachja grachja

Mi pari caru Erbaghju
Chì ni sè propriu scimitu,
Cù a to boci strappata
U mondu hè impauritu,
È nantu à quissu foru
Tuttu ugnunu hè fughjitu!

Tuttu u mondu hè fughjitu
À vede ghjucà à Bastia
Postu chì sè un amicu
Stammi à sente una cria
Vai ci puru ancu tù
È pianta puru a puesia

T'aghju da dì ciò ch'è pensu
Incù tanta sincirità,
Sappia ch'ùn hè ancu natu
Quiddu chì mi supranarà,
È mai pò ùn sarè tù
Chì susteni à L'ACA 🫣

Di u ghjocu à ballò
Ne cunnoscu ogni pruduttu
Tal un babbu à un figliolu
Ti dò ogni bellu fruttu
Fussi Bastia o l'ACA
T'aghju amparatu tuttu !