Ancey Olivier

Cibi

Sdighjuni di culori
Sparnucciati da l’alba
Cum’è tante carezze
Poste nant’à i chjassi,
Nutrite i mio passi.

Spuntini di l’adori
Chì viranu sumena,
Zingata à a mimoria
È i ricordi immersi,
Nutrite i mio versi.

Cullazione bagliori
Luce di miziornu
Ore bagnate d’oru,
Aria splunduriente,
Nutrite a mio mente.

Visparini di fiori
Da l’aliti azzicati,
Imbalsamati sciori,
Fiatu amasgiulime,
Nutrite e mio rime.

Cene di i dulciori
D’attrachjate languente,
Quandu tuttu si tace,
Stonde chiete, silenzii,
Nutrite i mio sensi.

Sopraccene d’amori
À cullane di stelle
È lune aghjumillate,
Cilesti matrimonii,
Nutrite i mio sonnii.

Cantata da Maï Pesce nantu à u so dischettu esciutu avà



 

euh sperenza...ti vulia dì...avà simu d'auturnu   

Avà ??????  

Cun 'sse belle ghjurnate di sole ùn a ci facciu à dì chì simu d'auturnu. 

Barcarola calvese

A luna  sparghje  i so  ragi
Annant’à l’onde innargentate,
In portu barattanu basgi
E barcelle incaramanciate,

Di luce splende a calata
Ascosa  da a citadella,
A punta di a Revellata
S’accende chì pare una  stella.

Sottu à u to balcone  
Sò vinutu à cantà
Sirinati è canzone
Colme di passione
È di filicità.

E stelle à una à una
S’accendenu quassù
Ma à lucendiluna
A mio capellibruna
A più bella sè tù.

Ti  tengu  caru, ti vogliu  amà
È u mio core hè toiu per l’eternità !
Sponde bramate, di  u vultà
Da tè luntanu  o bella nun possu  campà !

Stasera ti chjama l’amore
In li carrughji  addurmintati,
Si sente per solu rimore
Suspiri di l’innamurati

È u mio core  si ralegra
Quandi u  to purtellu s’apre,
I basgi ch’e mandu l’arreca
L’alitu nantu à e to labre.

Sottu à e stelle chjare
Per tè vogliu  cantà
Ma u to marinare
À  insulcà u mare
Prestu riparterà…

Piegne la mio ghitara
Sott’à u to balcò,
Addiu addiu o cara,
Dumane à l’alba chjara,
Luntanu mi ne vò.

Ti  tengu  caru, ti vogliu  amà
È u mio core hè toiu per l’eternità !
Sponde bramate, di  u vultà
Da tè luntanu  o bella nun possu  campà !

Mi paria d'avella digià messa, sarà stata annant'à u vechju Foru Corsu, almenu ch'ella sia quì piatta in qualchèi locu. Ma u sugettu essendu torna d'attualità a mettu quì.

Razzistu

Sò l’assassinu sò, u ladru, u maccarellu,
viulente sò natu, è da lu viculellu
a viulenza portu cum’è tutti i mei
chì di banditi noi, simu tutti l’eredi.
A curciaghjina à mè mi vene di natura
è face parte anch’ella di a nostra cultura,
sò dinù impignante è cumunitaristu,
mi facenu campà u statu è u turistu…
A sò ciò ch’è tù pensi : ogni difettu hè meiu,
Ma ùn purtà pinseri, u razzistu sò eiu.

Quandu l’inchjostru sumena

Sia vomara a mio penna
Sianu solchi ste righe
È a mio mente catena
Di e tribbiatoghje antiche
Quandu l’inchjostru sumena
E rime facenu spiche

Ne vogliu fà i mannelli
Carruzzà ogni mizinu
Ammansà tanti granelli
Metteci u San Martinu
Spulati ch’elli sò quelli
Purtalli à u mulinu

Quand’è tù era zitellu
Festi ancu a farina
Manighjendu u cruvellu
Cun tutta a to famiglia
Cù u Corsu d’oghje è quellu
Eiu nun vecu sumiglia

D’ùn esse più urtulanu
Ùn ai mancu rimorsu
Ùn sumineghji più granu
Tù cum’è l’anticu Corsu
Ormai hè bellu luntanu
U tempu di u carrozzu

Ùn ai mancu frastorni
A to cuscenza hè pulita
Ma oghje à mezi baroni
Ùn ci hè mancu più una trita
Sò spenti i nostri forni
Inde l’aghje ùn ci hè più vita

Oghje ci soffia u ventu
Ne face u giriolu
È cresce u to turmentu
Da a Balagna à Niolu
Mulini ci n’era centu
Da Bunnella à u Muricciolu

Avà ùn s’adopra più madia
Nè menu a stacciaghjola
Pulenda ùn si ne magna
Ùn s’azzinga più paghjola
Hè una vita di cuccagna
Quella chì hè ghjunta à a moda

O Corsica stammi à sente
Ch’elli torninu l’armacci
Ch’ella levi a sumente
Ch’elli cantinu i stacci
Osinnò si n’anu da pente
Cismuntinchi è Suttanacci

Ùn ti fidà

Ùn ti fidà d’incerti lindumani
è nu e so prumesse nun ti infonde,
ùn fidià cusì luntane sponde,
nant’à l’avvene ùn tirà i to piani.

Sbiadisciaranu prestu i verani,
l’amarantu cuntarà e so fronde
è u vascellu di l’albe più giuconde
s’affundarà per issi mari landani.

Cogli u ghjornu chì u tempu fughje
sacrifichendu l’ore à u so altare,
godi ciò chì a sorte ti cuncede.

Chì cum’è una candela chì si strughje
a vita si cunsume ad alte fiare
è ci ripiglia ciò ch’ella ci dede.