Chjama à Ruclì

Postu ch'oghje sì u solu
À batte stu locu biancu
Provu à chjappatti in volu
Cun un versu mozzu è sciancu
È fà ribombà i mondi
Di tanti chjam'è rispondi

Ùn aviu micca vistu
Una cusì bella chjama

Di visione sò spruvistu
Ancu malgratu a brama

Di me ne sò vergugnosu
U mio vers'ùn hè famosu.

A surpresa hè tantu bella
Ch'ella fù longa a riposta

Tù u sceffu di a tela
L'averai fatta apposta

Ma pianta i to inghjicchetti
È metti i to spechjetti

Di spechjett'ùn abbisognu
Per impruvisà un pocu

Ch'ellu ci sia u sognu
È in noi quellu focu

Tandu impruviseremu
Fin'à l'alba canteremu.

Canteremu fin'à l'alba
Sè a musa hè gioconda

Ti deraghju a caralba,
Ùn piantà una siconda

Ma ùn poi sunnià
È à tempu impruvisà