Era una bella nuttata ch’e quessa quì. Era una notte d’estata di l’annu scorsu, è malgratu e zinzale, a dulcezza di l’aria era tale chì m’era venutu u laziu d’andà fora, quellu laziu di viaghjà una cria in u paese ormai disertu, di pruffità infine di a friscura di u ventulellu chì s’era discitatu in dulcezza nant’à u poghju paesanu, anneghendu d’un colpu u calore assuffucante di a ghjurnata d’agostu.
In qualche minute, aviu francatu a girata di u locu dettu « A Ghjendarmeria », aviu francatu u vechju ponte catramatu, è eru ghjuntu davantu à u purtone di farru di l’anticu ortu in pianette ; u mio reame.
Quì, passava un fiumicellu inacquendu l’orticellu, dendullu u so fiatu di vita permettendu à tante piante di campà a so vita, iniziendu un ciculu quasi etereu di l’eterna vita.
Quì, m’eru pusatu nant’à una petra, à mezu à l’erbe è à l’arburi, accantu à i venerabile muri di petre siccate, per fighjulà u celu, è tuttu cio ch’ellu ci era in giru à mè, da a cosa a più chjuca à a più maghjore, ma tutte degne di u mio intaressu.
Era di notte è ùn si vedianu tant’affare ch’e di manera indistinta. Ma eru venutu per un festivale di sensazione è micca solu per i mio ochji. Eru dinù venutu per sente ogni rimore di a natura, di u fiume, di u ventu, di l’acelli è per muscà tant’odore, quelle dolce di ogni piante, o di a machja, vicina.
Avia bisognu di què per mette a mio anima in pace.
Era di notte è u paesaghju ch’o cuniscia tantu s’era scambiatu in una feeria indistinta. L’arburi duvintavanu eroi antichi, eroi di fole mentre chì e case à u luntanu, pigliavanu l’andatura d’un vechju castellu.
U tempu era chjaru, cume solu pudianu esselle e notte d’estate è u celu senza luna ci svelava a so fantasmaguria di stelle, cusì luntane è vicine attempu.
Ùn c’era nisun essare umanu cun mè, ùn ci era ch’e mè, è puru ùn eru solu. Tutta a natura era quì, in giru à mè, cun mè.
E petre di u vechju muru si mutavanu quì in putenze benevulente, cume per vulè prutegemmi d’ùn sò chì periculu ascosu, mentre chì l’arburi si facianu sintinelle mute di u gran’tuttu. Culà, un ciocciu paria batte a misura è cantava, regulare, una leggenda ch’ellu seria statu u solu à capì ; una legenda tutta piena di tennerezza.
L’erbe, in pedi à mè, è tuttu in giru pigliava a forma, in a mio mente, d’un picculu populu, quellu attempu di a notte è di a campagna, chì, grazie à u ventulellu, ballava. À mezu à stu populu in festa, eranu i mignoculi, elli cusì nucenti, chì celebravanu, branculendu o vulendu, a vita è a creazione ; elli cusì felice di a so esistenza.
A notte era bella è mi sentiu bè. À u luntanu, un russignolu scatenava a so voce per lodà, megliu ch’e mè, a bellezza di l’universalità, è vulia crede ch’e u so cantu sia statu a lascita d’un epica ascosa duve regnava a sticchidardena.
Chì a bellezza regna sempre in ogni locu, basta solu à sapè vedella. U benestà, a felicità è l’amore sò prisente dapertuttu, ancu in i lochi i più imprubabile, ancu duve s’aspettanu u menu.
A natura hè un anima diva ch’e l’omu un pò capì, ch’ellu pò solu percepì di manera indistinta cume un sonniu incompiu. A nostra saviezza persunale ùn basta à dàcci u putere d’inficcàcci in a so essenza cusì pura.
Cun a carezza di u ventu nant’à a mio pelle, a dulcezza di a terra à i mio pedi, nant’à e mio mani, mi sentia vivu, più vivu ch’e mai, è mi venia in u spiritu a voglia sacra di campà, di campà per vive, per risente altre emuzione simile, è per fàvvilla sparte à u megliu, cun e mio corcie parole.
Ruclì
Accueil 
