Antulugia

Sidussincu veni puru
À cantà quì una cria
Nantu à u to discu duru
Ai qualchì puesia
Stampale nant'à u muru
Di a nostra Antulugia

Sidussincu facci sente
I pueta di Niolu
Incù quelli di u Pumonte
Minicale è Pampasgiolu
U Furcatu, Peppu Flori
Maistrale è Buscaghjolu

Sidussincu per piacè
Datti appena di rimenu
Chì puesie ind'è tè
'Ci chì ne ai un saccu pienu
S'è tù ùn la voli cupià
Manda una copia di screnu

Arrisera ùn aghju vistu
O amichi e vostre chjame
Vi feraghju ssu piacè
Chi capiscu e vostre brame
E s'ella ùn hè fatta oghje
Sarà per dopu dumane.

Facci scopre i sicreti
Di i scrittori curscinchi
S'è tù ùn metti di sti pueti
I so versi più distinti
Tuttu ciò ch'è tù ti merdi
sò dui calci in li schinchi

Paragunendu i curscinchi
A voi astri lacqualacci
Mena puru nu i schinchi
Minaraghju nu i bracci
Videnduci à tocca tocca
L'astri minaranu in chjocca.

Ma quellu chì s'inframette
Trà Corscia Lozzi è L'Acquale
Faria megliu à riflette:
Hà da minà à quale?
Eiu sò prontu à scummette
Ch'ellu s'hà da fà male

Ùn ci vole micca à crede
Chì simu megliu chè l'astri
Ci sò in Petra di Verde
Chì valenu l'Acqualacci
È Aschesi o Pumuntinchi
Inseme cù i Buzinchi.

In lu nostru castagnetu
Resta qualchì fronda verde
Hè per l'altri ch'e m'inchietu
L'ultime fronde anu da perde...
Dimmi quant'ellu ne resta
Pueti in Petra di Verde...

http://www.lagazettepietrolaise.fr/La_gazette_pietrolaise/Musa_perdullaccia.html

Quì o amicu ti sbagli
Ancu s'è ùn vogliu dì
Guarda appena duve tu tagli
Chì ci sò i Degordì
Un sò picculi ghjamboni
Parlendu di i Straboni.

Ch'elli ci eranu i Degordì
Què tutt'ognunu a sà
Eiu ciò ch'e vogliu dì
A ti tornu à dumandà:
Pueti in Petra di Verde
Quantu ne resta AVÀ?

Ci sò chì campanu sempre
E chì danu li so frutti
Eppo forse nu stu situ
Un ci sonu micca tutti
Saria un bellu travagliu
D'entre più nu u detagliu.

Chjustappuntu o Sidussincu
Hè ciò ch'e ti dumandava
Accantu à Peppu o à Pincu
Sì qualchì puetu stava
Vidaremu sì a somma
S'accunciarà per istrada

Riposanu tutti in pace
Quelli ch'è tù ammenti tù
In Corscia ùn hè più capace
À cantà a giuventù
È vecu chì in Sidossi
Pueti ùn ci n'hè più

Postu ch'è tù sè scappatu
Senza fà mancu risposta
Vogliu risparmià u fiatu
O amicu di a Costa
A faremu un antru ghjornu
Sì a to musa hè disposta

Vecu ch'è tù sè vultatu
Forse avà poi risponde
Eiu stava abbambanatu
Cum'è e pesce indu l'onde
Chì quand'è tù ùn ci sè tù
Passu le gattive stonde

I pueti sidussinchi
Ti rispunderaghju allora
Chì sò faciule à truvà
Ma ti ci vole à sorte fora
Quandu tù stai in Sidossi
Ti ci piatti più chè l'orsi.

U puntu hè appena foscu
Ci vogliu mette u lume
È postu ch'e ti cunnoscu
Ti mettu à u parfume
S'è tù mi cerchi in Niolu
Mi truvarè forse in fiume

A sò chì sì sempre in fiume
Apressu à i mignoculacci
Incù lu t'arnese à collu
Perchè t'ùn ai altri lacci
Sò ch'elli sò diventati
I pueti lacqualacci !

Voli ch'in Sidossi stia
À vede e vostre chjocche?
Dimmi cosa ci faria
Chjosu in casa senza sorte
Privu di a cumpagnia
Di isse dolce filangrocche?

Or quessa la cumpagnia
Un vale dui quattrini
Infatti di puesia
Sò più scarsi i to terzini
Avà ti spezializeghji
Innù i corni marini !

Di truvà corni marini
Ùn t'inchiità chì a li provu
Ma indu i nostri cunfini
Da l'avà ùn ne aghju trovu
È s'e ne truvessi unu
Què saria un fattu novu.

Quandu omu ùn vole capisce
Un ci entre mancu à scapochji
S'elli ùn sò corni marini
I poi chjamà incrochji
Dumandali lu s'avisu
Quandu l'ai dananzu à l'ochji.

Ùn t'inchiità o amicu
Avia capitu l'affare
Ma quantunque a ti dicu
chì e cose sianu chjare
Perchè i corni marini
'Ci chì si trovanu in mare

Capisci è falla amparà
Perchè sì tù u maestru
Un ti vogliu ripiglià
Saria scortu è alpestru
Ma trovi corni marini
E tandu ti scappa l'estru.

Ma vultemu à u sugettu
Di u to caru paese
À u currente ti mettu
(Ci sò statu più d'un mese)
Quelle linguacce arrutate
Soca ancu tù l'ai intese?