Antulugia

un affare o Circiò
ci vole ch'è tù capischi
quandu collu in paese
certi affari sò previsti
i campinghi i lasciu corru
'lli ci vochinu i turisti

bon o zitè à bona notte !!!!

Hè vera chì in Sidossi
À cullazione è à cena
Ùn ci si vede cà Corsi
O ma arrestati appena
Soca in cucina u paghjolu
Hè azzingatu à a catena?

Avale lu nostru amicu
S'hè forse digià stracquatu
E ùn hè più Caparrittu
Piuttostu hè capi-calatu
Hà ingullitu e merghese
Vidite lu risultatu !

Invece di stà à veghja
Ellu si ne và in lettu
Mancu si licenzieghja
Hè un gattivu sughjettu
D'abbandunacci cusì
Ùn hà mancu core in pettu

Solu cù un antru puetu
O ghjente cumu faraghju?
Quessa ùn hè micca un sicretu
À mè mi ne ci vole un paghju
Caparittu si n'hè andatu
Ch'ellu u rimpiazzi l'Erbaghju...

Solu avà vecu u invitu
Chì m'hè fattu à l'usu Corsu
Allora s'ellu hè cusì
Vinaraghju à u succorsu
Di l'amicu Sidussincu
Chì hà bisognu di rinforzu

Avà vecu chì sè vinutu
À risponde à a mio chjama
Ma l'altru s'hè statu mutu
Soca ùn ci era tanta brama
Dunque cantu incù Speranza
Chì vive un veru drama

Chjamarebbe à Caparrittu
Ghjustu nanzu ch'ellu scrochji
Ma sarà megliu à stà zittu
Chì prestu hà da appiccià l'ochji
A sapete chì si chjina
À l'ora di i gallochji

ogni sera u ghjallochju
versu nov'ore si chjina
si ne và nù u so nidu
à truvà la so ghjallina
chì si disceta à bon'ora
per cantà ogni matina