Tandu eramu fratelli di lotta…
1934 -
Compagnon du Tour de France - testimoniu di Tristan Bernard
Prima edizione di u Giru di Francia in 1903…Sta corsa organizata da u giurnale
L’Auto, antenatu di
l’Equipe, fù un veru successu. L’edizione 1904, vittima di a so popularità, hà cunnisciutu di fattu parechji scandali…
Prima tappa : Maurice Garin è Lucien Pothier ricevenu scapochji da a parte di quattru omi mascherati esciuti d’una vittura.
Trà Lyon è Marseglia, Antoine Fauré dumineghja a tappa chì finisce in a so cità nativa quandu 200 sustenitori provanu à arrestà u plutone per permette li di guadagnà. A situazione s’arrangia solu quandu l’ufficiale tira una pistullitata.
Quandu u giru ghjunghje in Nîmes, i sustenitori di u locu mostranu a so colera per via di a squalifica di u so favuritu chì s’era ghjuvatu d’un «
engin motorisé ». Lampanu petre nant’à i ciclisti.
Durante a cinquesima tappa chjodi sò lampati nant’à a strada… L’aiutu mecanicu essendu pruibitu, Henri Cornet (vincidore di u giru quist’annu) hè ubligatu di finisce i quaranta ultimi chilometri cù i « pneus » crepati.
Statu francese…assassinu
Mémoire collective en Béarn 1910. Epica di a prima sperienza di u sinemà parlante cù Léon Gaumont, primu postu TSF dettu à galène, a cumeta di Halley passa vicina à a Terra è face suffià un ventu di panica nant’à a pianetta, l’omu riesce à vulà à 1000 metri d’altitudine in aviò, morenu Léon Tolstoï è Jules Renard …
Ghjè l’ottesima edizione di u giru di Francia. A tappa trà Luchon è Bayonne hè omerica. Face a paura postu chì e strade sò piuttostu chjassi per e bande di l'animali. Certi dicenu ancu ch’elli anu vistu orsi fendu a ricunniscenza per a corsa. Sti chjassi fangosi è pieni à ciottuli sò chjamati « u circulu di a morte ». A parolla Tourmalet vole ancu dì « mauvais détour ». Ma l’organizatori (trattati di tuttu) dicenu chì, si Madama di Maintenon fendu a so cura à Cauterets, hà francatu u Tourmalet in carreia à latore, si passa propiu ben in bissicletta ! Solu 59 ciclisti aspettanu per parte. Sò trè ore è mezu di matina. L’aspettanu 326 chilometri durante quindeci ore nant’à bissiclette di vinti chilò, sei foce è micca hè più faciule : Aspin, Tourmalet, Peyresourde, Aubisque. Ottaviu Lapize dettu « Tatave » o « u ricciutu » mortu à u fronte durante a Grande Guerra, sarà u vincidore. Ghjuntu à 5 ore è mezu (di sera…) stancu mortu, lamperà à l’organizatori : « site assassini ! iè assassini !!!! ». L’ultimi ghjunghjeranu à una ora è quartu di matina u lindumane... Averanu pensatu à quelli chì durante l’edizione 1905 avianu decisu di piglià u trenu per i passagi i più difficiuli ?
Parigot tête de …
"La vélocipédie pour tous ", Philippe Daryl, 1892.
"A velocipedia in cità
A pratica di u velocipède in cità ùn hè tantu piacente, soprattuttu in Parigi induve a circulazione hè eccessiva. Sta pratica hè ancu assai periculosa per u nuviziu à u quale a scunsigliemu, in u so interessu persunale, è per quellu di a velocipedia in generale…
Ci vulerà ch'ellu s'impedischi u velocipedistu di apustrufà i passanti ch'ùn si mettenu micca da cantu abbastanza ben o in furia, è, s’ellu hè ellu stessu apustrufatu da un scrianzatu farà di manera à ùn risponde micca. Hè solamente si qualchissia tocca à a so mascina o à ellu ch’ellu puderà intervene per fà si rispettà".
U veru corsu ùn face micca bissicletta 
Un articulu trovu in u
Petit Bastiais di u mese di ferraghju di u 1895 (peccatu mi manca a prima parte... ) ci face capisce quantunque chì a bissicletta pone un prublemu à a Corsica dipoi più di cent'anni... s'ellu ùn riescia micca à truvà a so piazza ind'è noi in lu 1895, in lu 2013, a scelta di unipochi ci face suppurtà u Giru, cù e so suvvenzione sceme, e so spese è i so rompistacche... leghjendu i cummenti nant'à a tela mi dicu chì in fine di contu stu prublemu ùn hè ancu smaritu
una ultima infurmazione di prima trinca: i prefetti di l'epica eranu veri precursori di a pulitica attuale è di u matrimoniu per tutti
"Bastia-vélo
In u mo ultimu articulu avia parlatu di ciò chì avia impeditu u sviluppu di a velocipedia in Corsica, è m’era dumandatu si ste cagione eranu abbastate per sbannì per sempre u ciclisimu di a nostra isula.
E nostre sucetà velocipediche si sò incaricate di risponde à a questione, dendu prove sicure di vitalità. U
Veloce Club Aiaccinu, creatu dipoi qualchì mese, ci prumette da quèi à pocu una grande seratina mundana. U prugramma ( cunniscimu l’attrazione principale perchè l'hà palisata un sociu) hè propiu piacevule è a riescita hà da esse cumpletta. U VCA farà ancu sunà, per a cavalcata di u carnavale, un gruppu speciale ch’ùn sarà micca a minima attrazione di a festa.
M. Paoli, secretariu di l’UVA chì scrive sottu à u cugnome di P. d’Alfort croniche velocidepiche in a
République, hà riesciutu à fà move a cità sana sana è e più grande persunalità d’Aiacciu praticheghjanu avà a bissicletta. Si dice ancu chì u prefettu dinù stuzzica a pedala.
U
Veloce Club Bastiacciu, più giovanu chè u VCA ma valente anch'ellu, ci offre un grande ballu di beneficenza chì sarà seguitatu d’una
tombola. I premii si trovanu in a vitrina di u sartore Poggi.
U prezzu di l’entrata hè di dece franchi. Ancu s’elli riprisentanu una somma u successu hè sicuru. Tutti i Bastiacci vuleranu participà à sta prima manifestazione velocipedica è passà una bella serata fendu u ben. Ùn possu chè felicità l’organizatori è pregà li une bella ricetta.
Assai rimarcati in i magazini Marinetti dui custumi ciclisti
dernier genre chì staranu sicuramente pocu in vitrina.
Guy d’Hon "
Accueil 
)