puisia U PASTORI

U PASTORI

Bona sera à tutti quanti
Omi é donni attillati,
Vò chì steti spinsirati
Senza fatica nè stanti,
Asculteti un istanti
I me rimi strapazzati.

Ma parchì o bedda ghjenti
Seti tutti russuriti ?
Com’hè ch’ùn ricunnisciti
U vosciu vechju parenti,
Chi deti sangu é pienti
Da fà vi cussì cumpiiti.

Ùn circheti à capiscia
Qual’sò, nimu ùn sà più,
Eti scurdatu ugni virtù
Da pudè bè cumpariscia,
Lachendu puri spariscia
A richezza di ciò chì fù.

Forsa ch’oghji v’imbarazza
A noscia storia passata,
Ma ùn pò essa scurdata
Com’è pula chi si spazza,
Chi sempri quì hè a razza
Ùn hè ancu suttarrata.

Ùn àbbiiti cumpassioni
Fighjuleti li issi mani,
Ch’ani stantatu u pani
Da fà ch’oghji da ricconi,
Ricuseti i tradizioni
È l’anima di l’anziani.

Eu socu un pastori
A dicu senza paura,
Ùn fasciu la me natura
Da pratendami signori,
Chì tengu sempri l’unori
Di ciò ch’era a cultura.