Sulitudine

Allora a prossima volta
S'è tù ùn pigli micca un zattu
Caccia puru u to Minolta
È facci un bellu ritrattu
È ùn lintà a to pescia
Cà dopu avellu fattu

L'ai detta sò mudestu
Pocu impreme à cumparisce
Fattu ch'ellu hè u me colpu
Prestu u facciu sparisce
Chì par u sempre a mimoria
In capu u face fiurisce

Trà Circione é Erbaghju
U bisbigliu hè quasgi natu,
Un cunsigliu vi daraghju
Da cucinaru stiddatu
Nudda vali a qualità
Di un pisciucciu quadratu LOL

O cari à dilla m'incresce
Site i rè di a fughjichja
Unu lenta e so pesce
Inde l'onde di Crucichja
L'altru per esse stillatu
Cunnosce a minichichja

Sappia ch'ùn aghju malizia
Amicu ascolta bè,
Da fà piatti di divizia
Pari à mè quì ùn ci n'hè,
Chi u novu Michelin
Di steddi mi n'hà datu trè !

S'elli ti ne danu trè
Eiu ùn ti ne dò mancuna
Ci dici n'importa chè
Aiò! sè scemu di funa
Inquanti à mè tù cunfondi
E stelle incù a luna

T'assucuru n'aghju trè
Ùn essa cussì cunfusu,
Cù i frissoghji sò un rè
É cunnoscu ugni usu,
Ch'aghju furmatu à Hermè
À Ducasse é Bocusu

Incu a tocca incalfata
À un sceffu t'assumigli
Per fatti una frittata
Tandu a frissoghja a pigli
Ma pè a grande cucina
Ti possu dà i cunsigli

Cunnoscu ugni ricetta
I maneri vechji é novi,
Cù a tocca o a baretta
Aghju fattu i me provi,
E sè ti garba t'insegnu
A sciappà un coppiu d'ovi

Per priparà robba fina
Ti dò un colpu di manu
Quistione di cucina
Ùn sò micca un ciarlatanu
Ma s'ella hè per rompe l'ove
Hè vera sè u tarcanu

Haha


Sciappu l'ovi dui à dui
Sò un tarcanu in cucina,
I facciu cotti o crudi
In frittata ugni mattina,
Mentri chì tù cunfondi
L'ovu incù a ghjaddina ^^

Ùn si pò micca cantà
È dinù purtà a croce
Ma tù m'ai da dì avà
Ch'è t'ai una bella voce
È quand'è tù ùn ai ove
Inquanti à mè sciacchi noce

Cridìa chì dopu tant'anni
Di a me voci t'era avvistu,
Di u tinori portu i panni
Umilmenti sò un artistu,
Un omu cù i me talenti
Indocu ùn l'ai vistu !

Tramindui incù l'Erbaghju
Site dui uriginali
Ellu lenta pesce in fiume
È per isse machje cignali
È tù voli rompe l'ove
Invece rompi i stifali

Haha

Stifali ùn ni rompu mai
Adimetti ch'ai persu,
Ti trovi quì in i guai
Dunqua canti di traversu,
Chi sunnieghji d'avè
A me tocca é u me versu lol

Addimettu ch'aghju persu
U tempu à cantà cun tè
Sì a scrive mi sò messu
Era per fatti piacè
Hè stata per cumpassione
S'è tù a voli sapè

Circione a écrit:

Tramindui incù l'Erbaghju
Site dui  uriginali
Ellu lenta pesce in fiume
È per isse machje  cignali
È tù voli  rompe  l'ove
Invece rompi  i  stifali

A più bella o amichi
Eiu l'aghju letta avale
Ùn l'hè bastatu u sugettu
Di a pesca in fiuminale
Chì par divvi s'ellu hè mattu
Mi parla avà di cignale

S'è tù lenti pescia è cignale
Allora sè un artistu
U mondu intillittuale
Sarà subitu cunquistu
Quale l'avaria criduta
Ch'è tù fussi eculugistu?


Cù e bugie ch'è tù conti
Ma chì voli più ch'e dichi
Eiu crelgu chè tù monti
A seca à i t'amichi
Ma cumu voli ch'e sappii?
Appena chjappi i cappii

Allora da mè à tè
Parlaraghju cù u core
Postu ch'ùn a sai più
Hè vera sò cacciadore
Ma senza mai mette un cappiu
A ghjurgu annant'à l'onore

Dopu à ciò chì s'hè dettu
Ete vistu a riazzione
Sò dui ghjorni avale
Ch'ùn si sente più Circione
Attenti pesce è cignali
Ch'avà batte u machjone

Falla finita o Circiò
Ùn hè un tempu par move
Ancu tù l’avarè vista
Chì par piscà troppu piove
Rientri puru in casa
À salvà e piscaghjole

Corre appressu à i cignali
Par tè sò faccende nove
Ma cù ciò chì fala oghje
Ùn circà à fà tante prove
Chì sta sera avarè
Una frebba à  trenta nove  

S’hè rinfriscata a stagione
chì parimu d’inguernu
riaccendimu u fucone
è u cuntrastu fraternu
ma si stà mutu Circione
è l’Erbaghju chjama indernu

Aghju pruvatu à risponde
Cù u mo telefunacciu
Ma ùn passavanu l'onde
Nè in Niolu nè in Aiacciu
Avà sò torna in Aregnu
È vi mandu un abbracciu

Chì ùn sè micca cappiaghjolu
Leghju annantu à u mio screnu
S'ella hè vera po t'approvu
O Erbà t'approvu appienu
Ma cum'è chì per sti fiumi
Ci lampi tantu vilenu?

Volti dopu à dece ghjorni
È ti sbagli una antra volta
Ùn cunnoscu u patellu
Nè a cugna nè a nocca
Chì par u più u vilenu
Sempre u trovu in a to bocca