Sulitudine

In bocca ci aghju e rime
Dolce chì parenu mele
Sò metafore sublime
È maravigiose idee
Invece in bocca toia
Ùn ci si trova cà fele

O a sarpe chì tù sè
Di tutte hè a più gattiva
Ch`ùn si sarà mai intesa
Nu paese di l'Acquaviva
Chì quandì tù canti tù
Cacci a pace è metti l'ira

L'ira sè tù chì a metti
Incù a to vuciaccia strana
Faci trimà muri è tetti
In paese di Marignana
È quand'è tù canti tù
A pescia scappa è s'intana

Sarà più bella a toia
Chì quandì tù canti à Lozzi
A pescia è ancu l’anguilla
Tutte fughjenu i pozzi
Chì da Castirla à Pont’ altu
A to voce hè un catafalcu

Eiu ùn sò micca l'Erbaghju
Quand'e cantu ùn mi strangolu
Quandu lu mio cantu sparghju
Ballanu e pesce in Golu
È l'altori stanu à sente
Tuttu sparghjendu lu volu

Da Valduniellu à Castirla
Ancu s'ellu fala Pincu
Cantadori ùn si ne sente
Di razzinu niulincu
Fora di u nostru amicu
Cugnumatu "Sidussincu"

S'ellu canta Sidussincu
Incù a so  forte schilla
Da Golu sin'à Bevincu
Scappanu pescia è anguilla  
Hà una voce di stentore
O Erbaghju ci vole à  dilla

Quandu canta Sidussincu
Da Castirla à Valduniellu
Par stallu à sente megliu
Si tace ancu l'acellu
Chì sta voce cristalina
Hè quella d'un anghjulellu

L'acellu ùn si pò tace
Si n'hè fughjitu luntanu
Sidussincu  ùn  hè  capace
Di cantichjà pianu pianu
Scappanu ancu le pesce
Eppuru arechje  ùn  ne  anu!

Dici chì da u spaventu
L'acellu piglia e sarre
È chì a pescia in esiliu
Hè pronta à francà u mare
Ma sarà chì sè ghjilosu
Par fà queste rime amare

Per cantà u so terzettu
Credi puru chì prateca
Hà fattu ancu Par un dettu
Invitatu da Petru Leca
Ma s'ellu cappia a voce
Ancu a pescia s'anneca

Avà sì capiscu megliu
In u ghjurnale sta mane
Petru Leca ci spiicava
Chì u cuncettu avale
Era di fà l'emissione
Cù e pesce in fiuminale

Petru Leca hè un birbante
Eppo ogni cosa spachja
Dopu à u fiume farà
L'emissione inde a machja
Da pudetti invità
À cantà cù una curnachja

Vulinteri mi ne passu
Di què l'accumpagnatore
Cù a to voce di bassu
Soca sè superiore?
A campa chì e canzone
E faci à l'urdinatore

Ma a curnachja sè tù
À cantà e to canzone
Da un paese à l'altru
Senza alcuna invitazione
Sempre prontu à acciuncà
D'ogni chjesgia u campanone

Sì a curnachja sò eiu
Tandu ùn cantaraghju più
Ti pare di cantà megliu
Ma quand'è tù canti tù
Si vedenu nantu à l'onde
Pesce morte à corpu insù

Allora s'ella hè cusì
Compiu stu cantu mischinu
Chì sì tù parti ancu tù
Ùn sò tantu induvinu
Ma prestu saraghju solu
Solu à cantà incù nimu

Allora statti una cria
Ùn cappià a to tastera
Ti tinarà cumpagnia
A mio musa à straziera
Perchè simu tramindui
Nantu à a listessa galera

Par fà campà quellu foru
Ai sunatu u cornu
È da tandu a ti prumettu
Sò vinutu ogni ghjornu
Ma puru e nostre legne
Ùn iscaldanu u fornu

Soca primura ùn anu
Sidussincu è Rappallinu
Caparrittu è Isulanu
Tittò è Rosumarinu
Ritrovu avia à Sperenza
Avà ci truvemu senza.

A galera chì tù campi
T'assicurgu hè dinò meia
Ma vucaremu à vuchera
Da truvanne a rileva
Basta à dì sì tù ti metti
À e rame o à a vela

O amicu ti cunsigliu
Di cambià spalla u fucile
Avà u cummandu pigliu
Ai finitu di ride
I remi piglali tù
Eiu mi mettu à u staffile

Dopu à questa sfrancisata*
Pacu caru u me arrore
Tù mi cacci u staffile
Da veru inquisitore
S'ellu hè cusì u battellu
U pigliaremu à mutore

*innò ùn a sapia micca ch'ella si dicia u remu...

( * Iè si chjamanu i remi
Si pò dì ancu e pale)
Avà vecu ch'è tù tremi
Hè tuttu à fattu nurmale
Ti capiscu o Erbaghju
U staffile face male

Allora ti diceraghju
O caru amicu Circiò
S'ellu mi piglia u spaventu
Ai puru a ragiò
Hè chì u staffile in manu
Pari un sadò masò